ປັດຈຸບັນໃນທົ່ວໂລກ ພວມມີປະຕິກິຍາຕໍ່ຂ່າວມໍລະນະກໍາຂອງທ່ານ ກິມ ຈົງອິລ ຜູ້ນໍາເກົາ
ຫລີເໜືອ. ທີ່ວໍຊິງຕັນດີຊີ ປະທານາທິບໍດີສະຫະລັດ ທ່ານບາຣັກ ໂອບາມາ ແລະທ່ານນາງ
ຮິລແລຣີ ຄລິນຕັນ ລັດຖະມົນຕີຕ່າງປະເທດສະຫະລັດ ໄດ້ຖືກແຈ້ງໃຫ້ຊາບເຖິງຂ່າວ
ມໍລະນະກໍາຂອງຜູ້ນໍາເກົາຫລີເໜືອແລ້ວ.
ໃນຖະແຫລງການສະບັບນຶ່ງທີ່ອອກເມື່ອຕອນເຊົ້າວັນຈັນມື້ນີ້ ທໍານຽບຂາວ ກ່າວວ່າ ຕົນໄດ້ຕິດຕໍ່ກັນຢ່າງໄກ້ຊິດ ກັບພວກປະເທດພັນທະມິໃນເກົາຫລີ ໃຕ້ ແລະຍີ່ປຸ່ນ ຄືທໍານຽບຂາວກ່າວວ່າ ທ່ານ ໂອບາມາ ໄດ້ໂອ້ລົມກັບ ປະທານາທິບໍດີເກົາຫລີໃຕ້ ທ່ານ ລີ ມຽງບັກ ແລະຢືນຢັນຄືນໃໝ່ຕໍ່ຄວາມ ໝັ້ນໝາຍເພື່ອສ້າງສະຖຽນລະພາບໃນຂົງເຂດແຫລມເກົາຫລີ ແລະຕໍ່ ເສລີພາບແລະຄວາມໝັ້ນຄົງຂອງພວກປະເທດພັນທະມິດຂອງຕົນ. ຖະແຫລງການດັ່ງກ່າວຍັງເວົ້າອີກວ່າ ຜູ້ນໍາທັງສອງ ເຫັນພ້ອມກັນເພື່ອກໍາກັບ ທີມຄວາມໝັ້ນຄົງແຫ່ງຊາດໂດຍກົງ ເພື່ອປະສານງານກັນຢ່າງໄກ້ຊິດ.
ທັງສອງເກົາຫລີ ຍັງຄົງຢູ່ໃນສະພາວະທໍາສົງຄາມກັນ ນັບຕັ້ງແຕ່ຂໍ້ ພິພາດກັນເປັນເວລາສາມປີຂອງປະເທດທັງສອງສິ້ນສຸດລົງ ໂດຍພຽງແຕ່ສັນຍາຍຸດຍິງໃນປີ 1953 ເທົ່ານັ້ນ.
ທີ່ນະຄອນຫລວງໂຕກຽວ ທ່ານ Yoshihiko Noda ນາຍົກລັດຖະມົນຕີ ຢີ່ປຸ່ນ ໄດ້ເປີດກອງປະຊຸມກັບພວກທີ່ປຶກສາອາວຸໂສ ເພື່ອຄິດຫາວິທີຕອບ ສະໜອງຕໍ່ການມໍລະນະກໍາຂອງຜູ້ນໍາເກົາຫລີເໜືອ.
ອົງການຂ່າວຊິນຫົວທາງການຂອງຈີນ ເວົ້າວ່າ ພວກເຈົ້າໜ້າທີທີ່ປັກກິ່ງເສຍໃຈຕໍ່ຂ່າວມໍລະນະກໍາຂອງທ່ານ ກິມ ຈົງອິລ ແລະໄດ້ສະແດງຄວາມ ເສົ້າສະລົດໃຈຕໍ່ປະຊາຊົນເກົາຫລີເໜືອ ຈີນ ຖືວ່າເປັນປະເທດພັນທະມິດ ແລະພາຄີການຄ້າທີ່ໄກ້ຊິດທີ່ສຸດຂອງເກົາຫລີເໜືອ.
ເບິ່ງສະໄລດ໌ທີ່ສະແດງປະຫວັດຫຍໍ້ຂອງມື້ລາງ ທ່ານ ກິມ ຈົງອິລ
