ຊາວກໍາປູເຈຍ ຕີດຕາມເບິ່ງ ຂັ້ນສຸດທ້າຍຂອງ ການດໍາເນີນຄະດີ ນວນ ເຈຍ ກັບ ຂຽວ ສໍາພັນ (ວີດີໂອ)

ບັນດາ​ຜູ້​ລອດ​ຊີວິດມາ​ຈາກ​ ພວກຂະ​ເໝນ​ແດງ ຂອງກໍາປູ​ເຈຍ​
ໄດ້​ໄປແອ​ອັດ​ກັນຢູ່​ໃນ​ສານ​ແຫ່ງ​ນຶ່ງທີ່​ນະຄອນຫລວງ​ພະນົມ​ເປັນ
​ໃນ​ວັນ​ພຸດ​ມື້​ນີ້ ​ເພື່ອ​ຟັງຄໍາ​ໂຕ້ແຍ້ງ​ໃນມື້​ເລີ້ມ​ຕົ້ນ​ການ​ສະຫລູ​ບ
ການດໍາ​ເນີນ​ຄະດີ ຜູ້​ນໍາຂະ​ເໝນ​ແດງ​ຂັ້ນ​ສູງສອງ​ຄົນ ກໍ​ຄື Nuon
Chea ກັບ Khieu Samphan ທີ່ປະ​ເຊີນກັບ​ຂໍ້​ຫາ ຂ້າ​ລ້າງ
ເຊື້ອ​ຊາດ​ເຜົ່າພັນ ແລະ​ກໍ່​ອາ​ຊະ​ຍາ​ກໍາ​ຕ້ານມະ​ນຸດ​ຊາດ ຍ້ອນ
ບົດບາດ​ຂອງ​ເຂົາ​ເຈົ້າ​ ​ໃນ​ລະຫວ່າງ​ການ​ປົກຄອງ​ຂອງ​ພວກ
ຄອ​ມມິ​ວນິສຂະ​ເໝນ​ແດງ ໃນຊຸມ​ປີ 1970 ທີ່​ໄດ້​ຖືກ​ຖິ້ມ​ໂທດ
​ໃສ່​ວ່າ ​ເປັນສາ​ເຫດ​ຂອງ​ການ​ຕາຍຂອງ​ຊາວ​ກໍາປູ​ເຈຍ ເກືອບ
ສອງ​ລ້ານ​ຄົນນັ້ນ.

ທັງ​ສອງ​ຄົນ ຊຶ່ງປັດຈຸບັນ​ນີ້ ມີ​ອາຍຸ​ 80 ປີປາຍ ກໍ​ໄດ້​ມີໜ້າ​ຢູ່​ໃນ​ສານ ໃນ​ການດໍາ​ເນີນ​ຄະດີມື້​ນີ້ ​ທີ່​ໜູນ​ຫລັງ​ໂດຍ ສານອາຊ​ະ ຍາກໍາສົງຄາມ ສະຫະ​ປະຊາ​ຊາດ. ຄາດ​ວ່າ ການ​ສະຫລູບ​ຄະດີ ຈະ​ດໍາ​ເນີນ​ໄປຈົນ​ຮອດ​ທ້າຍ​ເດືອນ​ຕຸລາ ​ແລະ​ການ​ຕັດສິນ​ນັ້ນ ຄາດ​ວ່າ ຈະ​ມີ​ຂຶ້ນໃນ​ໄລຍະ 6 ​ເດືອນ​ຕົ້ນຂອງປີໜ້າ.

Long Mom ​ຊາວບ້ານ​ຄົນ​ນຶ່ງ ໄດ້​ເດີນທາງ​ມາ​ຈາກແຂວງ Kompong Speu ​ເພື່ອ​ເຂົ້າ​ຮັບ​ຟັງການ​ສະຫລູ​ບຄະດີ ຊຶ່ງ ເປັນ​ຂີດ​ໝາຍຂັ້ນ​ຕອນ​ສຸດ​ທ້າຍ ທີ່​ມີ​ການລໍຖ້າ​ກັນ​ມາ​ຢ່າ​ງ​ຍາວ​ນານ ​ຂອງ​ການ​ດໍາ​ເນີນຄະດີ​ຕໍ່​ຊາຍ​ສອງ​ຄົນດັ່ງກ່າວ.

ລາວ​ເວົ້າ​ວ່າ “ຂ້າພະ​ເຈົ້າ ຢາກ​ໃຫ້​ສານ​ຕັດສິນຈໍາ​ຄຸກ ຜູ້​ນໍາ​ສອງ​ຄົນ​ນີ້​ຕະຫລອດ​ຊີວິດ ​ເພາະວ່າ​ຫລາຍ​ຄົນ​ໄດ້​ຖືກ​ສັງຫານ​ຢູ່​ໃນ​ລະ​ບອບ​ນັ້ນ.”

Nuon Chea ​ໄດ້​ເປັນ​ຫົວໜ້າຝ່າຍ​ອຸດົມ​ການ​ຂອງ​ກຸ່ມຂະ​ເໝນ​ແດງ. ສ່ວນ Kieu Samphan ​ເປັນ​ປະມຸກປະ​ເທດ. ບັນດາ​ໄອ​ຍະ​ການ ກ່າວ​ວ່າ ​ທັງ​ສອງ​ຄົນໄດ້​ຊ່ວຍວາງ​ແຜນ​ກໍ່​ຄວາມ​ໂຫດຮ້າຍ​ທາລຸນ​ທີ່​ໃຫຍ່​ຫລວງ​ທີ່​ສຸດ​ບັ້ນ​ນຶ່ງ ຂອງ​ສັດຕະວັດ​ທີ 20​. ທັງ​ສອງ​ໄດ້​ປະຕິ​ເສ​ດການ​ກ່າວ​ຫາ ໂດຍ​ອ້າງ​ວ່າ ​ພວກ​ຕົນ ​ໄດ້​ພະຍາຍາມຈະ​ສ້າງ​ຕັ້ງ ລັດສັງຄົມນິຍົມທີ່​ດີ​ເລີດສົມ​ບຸນ​ແບບ.


​