ສະບາຍດີທ່ານຜູ້ຟັງທີ່ເຄົາຣົບແລະຍິນດີຕ້ອນຮັບທ່ານຜູ້ຟັງ
ເຂົ້າສູ່ລາຍການສຽງເພງຈາກແດນໄກຊອງ VOA ຄ່ຳຄືນນີ້
ພິເສດແດ່ ເພາະວ່າເປັນວັນແມ່ ໃນສະຫະລັດ ຊຶ່ງກົງກັບວັນ
ອາທິດ ທີ 2 ຂອງເດືອນພຶດສະພາຂອງທຸກປີ ເພາະສະນັ້ນ
ວັນນະສອນຈຶ່ງຂໍນໍາສະເໜີເພງທີ່ກ່ຽວຂອງກັບວັນແມ່ ມາ
ມອບໃຫ້ ເພື່ອສະແດງເຖິງຄວາມກະຕັນຍູ ກະຕະເວທີ
ຄວາມຈົງຮັກພັກດີແລະຄວາມປາດຖະນາດີ ດັ່ງເນື້ອໃນ
ຂອງເພງນີ້ ຄ່າຂອງນໍ້ານົມ ທີ່ຂັບຮ້ອງໂດຍ ເຈົ້າຄໍາຜາຍ ກຸນລະວຸດ ຈາກ ວົງແມ່ຂອງຂຽວ ຈາກປະເທດຝຣັ່ງ … ແລະກໍຫວັງວ່າ ທ່ານຜູ້ຟັງກໍຄົງມີຄວາມຮູ້ສຶກແບບດຽວກັນ
ກັບວັນນະສອນ ທີ່ຊາບຊຶ້ງເຖິງຄວາມຮັກທີ່ແມ່ມີໃຫ້ແກ່ພວກລູກໆ.
ເພງ: “ຄ່າຂອງນໍ້ານົມ” ໂດຍ ແມ່ຂອງຂຽວ
ເພງ “ແມ່” ທີ່ຂັບຮ້ອງໂດຍ ດາຣາເພັດ ນີ້ ກໍເປັນອີກເພງນຶ່ງທີ່ຟັງຍາມໃດກໍປະທັບໃຈ
ຍາມນັ້ນ ສໍາລັບວັນນະສອນແລ້ວ ເຫັນວ່າ ຈະຮ້ອງເພງນັບຮ້ອຍ ນັບພັນ ກໍຈະບໍ່ສາມາດ
ທົດແທນບຸນຄຸນຂອງແມ່ໄດ້ ຊຶ່ງເພິ່ນໄດ້ອົດທົນອູ້ມລູກຢູ່ໃນທ້ອງເຖິງ 9 ເດືອນຈົນຄອດ
ອອກມາ ທັງຍັງພະຍາຍາມລ້ຽງດູ ພວກລູກໆຈົນໃຫ້ເຕີບໃຫຍ່ ເພື່ອໃຫ້ເປັນຄົນທີ່ມີຄວາມ
ຮູ້ ຄວາມສາມາດ ເປັນຄົນດີແລະມີຄຸນຄ່າຂອງຄອບຄົວແລະສັງຄົມ…ວັນນະສອນຄິດວ່າ
ສິ່ງທີ່ພວກລູກໆສາມາດກະທໍາໄດ້ໃນຕອນນີ້ ກໍຄືຕອນທີ່ທ່ານຍັງມີຊີວິດຢູ່ນັ້ນ ເພາະວັນ
ນະສອນບໍ່ໄດ້ມີໂອກາດນັ້ນ ອີກຕໍ່ໄປແລ້ວ ເພາະສະນັ້ນສິ່ງທີ່ດີທີ່ສຸດກໍຄືເຮັດທຸກສິ່ງຢ່າງ
ເພື່ອທົດແທນບຸນຄຸນແມ່ ໃຫ້ສົມກັບທີ່ເພິ່ນໄດ້ຖະໜອມລ້ຽງດູເຮົາມາ ແລະກໍຢ່າລືມບອກ
ແມ່ວ່າ…”ຮັກແມ່ຫຼາຍ.”
ເພງ: “ແມ່” ໂດຍ ດາຣາເພັດ
ສ່ວນເພງສຸດທ້າຍນີ້ ວັນນະສອນຂໍຈັດມອບໃຫ້ທັງບິດາມານດາ ທັງສອງທ່ານເລີຍ ເພາະ
ວ່າ ບຸບພະກາລີນັ້ນແມ່ນເປັນພື້ນຖານອັນແໜ້ນໜາໝັ້ນຄົງຂອງພວກລູກໆ ເຖິງຈະເປັນ ວັນສະເຫຼີມສະຫຼອງວັນແມ່ ແຕ່ວັນນະສອນວ່າ ຜູ້ເປັນພໍ່ ກໍມີສ່ວນສໍາຄັນໃນຊີວິດຂອງພວກ
ລູກໆເຊັ່ນກັນ ເພາະສະນັ້ນຈຶ່ງຂໍມອບເພງ “ບຸນຄຸນພໍ່ແມ່” ທີ່ປະພັນໂດຍ ເຈົ້າຄໍາຜາຍ
ກຸນລະວຸດ ແລະ ຂັບຮ້ອງໂດຍ ກ. ສັກສີ ແລະກ່ອນນອນໃນຄໍ່າຄືນນີ້ ກໍໃຫ້ກາບຂອບໃຈແລະຫອມແກ້ມທັງພໍ່ແລະແມ່ ເພື່ອຈະໄດ້ເປັນ ສິຣິມົງຄຸນແກ່ຊີວິດ… ຈະໄດ້ ຈະເຣີນ ກ້າວໜ້າ ປະສົບຜົນສໍາເລັດໃນຊີວິດ…ນອນຫລັບຝັນດີ. Happy Mother’s Day.
ເພງ: “ບຸນຄຸນພໍ່ແມ່” ໂດຍ ກ. ສັກສີ
