ສະມາຊິກສະພາສູງ ສັງກັດພັກເດໂມແຄຣັດ ທ່ານ Harry Reid ໄດ້ສະແດງທ່າທີ ສະໜັບສະໜູນ ຂໍ້ຕົກລົງທີ່ສະຫະລັດ ແລະ ບັນດາ 5 ປະເທດ ໄດ້ບັນລຸກັບ ອີຣ່ານ ເພື່ອຈຳກັດໂຄງການນິວເຄລຍຂອງ ອີຣ່ານ ໃນການແລກປ່ຽນກັບການຜ່ອນຜັນມາດຕການລົງໂທດຕ່າງໆ.
ຢູ່ໃນຄຳຖະແຫລງສະບັບໜຶ່ງ ໃນວັນອາທິດວານນີ້ ຜູ້ນຳສະພາສູງສຽງສ່ວນໜ້ອຍ ທ່ານ Reid ໄດ້ເອີ້ນຂໍ້ຕົກລົງດັ່ງກ່າວວ່າ “ເປັນເສັ້ນທາງທີ່ດີທີ່ສຸດ ເພື່ອຍຸດຕິອີຣ່ານຈາກການມີອາວຸດນິວເຄລຍໃນຄອບຄອງ.”
ການສະໜັບສະໜູນຂອງທ່ານ ເຮັດໃຫ້ມີໂອກາດໜ້ອຍລົງ ທີ່ພັກຣີພັບບລີກັນໃນສະພາ ຈະສາມາດລະດົມຄະແນນສຽງພຽງພໍ ທີ່ຈະສະກັດກັ້ນຂໍ້ຕົກລົງດັ່ງກ່າວໄດ້ ຊຶ່ງພວກເຂົາເຈົ້າ ແລະ ອິສຣາແອລ ຕຳນິຕິຕຽນ ວ່າ ປ່ອຍໃຫ້ ອີຣ່ານ ມີໂຄງການນິວເຄລຍຫຼາຍເກີນໄປ ຊຶ່ງພ້ອມດຽວກັນກໍປ່ອຍເງິນທຶນໃຫ້ ອີຣ່ານ ຫຼາຍໆຕື້ໂດລານັ້ນ.
ທ່ານ Reid ກ່າວວ່າ ສ່ວນຂອງການສະໜັບສະໜູນຕໍ່ຂໍ້ຕົກລົງຂອງທ່ານນັ້ນ ແມ່ນນອນຢູ່ໃນອັນທີ່ທ່ານເອີ້ນວ່າ ການຂາດທາງເລືອກແນວອື່ນ ເພື່ອນຳສະເໜີໂດຍບັນດາຝ່າຍຄ້ານ ຜູ້ທີ່ບໍ່ເຫັນດີດ້ວຍນັ້ນ.
ທ່ານ Reid ເວົ້າວ່າ “ມັນແມ່ນເລື້ອງຄວາມໄຝ່ຝັນອັນນຶ່ງທີ່ຈະເວົ້າວ່າຖ້າ ລັດຖະສະພາ ຄັດຄ້ານຂໍ້ຕົກລົງດັ່ງກ່າວ ລັດຖະບານກໍຈະສາມາດກັບຄືນໄປ ແລະ ເຈລະ ຈາເອົາຂໍ້ຕົກລົງທີ່ດີກວ່ານັ້ນ ຢ່າງງ່າຍດາຍ. ອັນນັ້ນ ບໍ່ແມ່ນທາງເລືອກທີ່ເປັນໄປໄດ້ ແລະ ພວກເຮົາບໍ່ຄວນທຳທ່າວ່າມັນເປັນເຊັ່ນນັ້ນ.”
ທ່ານຍັງໄດ້ ເນັ້ນໜັກ ວ່າ ທັດສະນະຂອງທ່ານ ຕໍ່ການເຈລະຈາ ໂດຍ ສະຫະລັດ ອັງກິດ ຈີນ ຝຣັ່ງ ຣັດເຊຍ ແລະ ເຢຍຣະມັນ ເຮັດໃຫ້ເກີດຜົນມີເງື່ອນໄຂຕ່າງໆ ທີ່ຈະຊ່ວຍປົກປ້ອງ
ອິສຣາແອລ ທີ່ເປັນພັນທະມິດ ຈາກການຂົ່ມຂູ່ທີ່ອາດເປັນໄປໄດ້ ໂດຍປະເທດ ອີຣ່ານ ທີ່ມີອາວຸດນິວເຄລຍນັ້ນ.
ທ່ານ Reid ເວົ້າອີກວ່າ “ການຮັບປະກັນຄວາມປອດໄພຂອງອິສຣາແອລນັ້ນ ແມ່ນເລື້ອງທີ່ສຳຄັນທີ່ສຸດ ສຳຫລັບຂ້າພະເຈົ້າ ແລະ ຂ້າພະເຈົ້າສະໜັບສະໜູນ ຂໍ້ຕົກລົງນີ້ ກໍເພາະວ່າ ຂ້າພະເຈົ້າເຊື່ອວ່າ ມັນເປັນທາງເລືອກທີ່ດີທີ່ສຸດ ເພື່ອຍຸດຍັ້ງໂຄງການ ສ້າງອາວຸດນິວເຄລຍ ໃດໆຂອງອີຣ່ານ ແລະ ເພາະສະນັ້ນ ມັນຈຶ່ງຈະເປັນການປ້ອງກັນປະເທດອິສລາແອລ.”
ອີຣ່ານ ໄດ້ຢືນຢັດມາຕະຫຼອດວ່າ ໂຄງການນິວເຄລຍຂອງຕົນ ແມ່ນເພື່ອຈຸດປະສົງທາງພົນລະເຮືອນ ພຽງຢ່າງດຽວເທົ່ານັ້ນ ແລະ ບໍ່ຮ່ວມເອົາແມ່ນໂຄງການສ້າງອາວຸດນິວເຄລຍເຂົ້ານຳ.
