ທ່ານ Javad Zarif ລັດຖະມົນຕີຕ່າງປະເທດອີຣ່ານ ກ່າວໃນ
ວັນພະຫັດມື້ນີ້ວ່າ ມີ “ຄວາມຄືບໜ້າຫຼາຍສົມຄວນ” ໃນການ
ເຈລະຈາກັນເລື້ອງໂຄງການນີວເຄລຍຂອງອີຣ່ານ ແຕ່ວ່າອີຣ່ານ
ແລະກຸ່ມປະເທດມະຫາອຳນາດຂອງໂລກ ຍັງບໍ່ທັນໄດ້ບັນລຸຂໍ້
ຕົກລົງກັນເທື່ອ.
ທ່ານ Zarif ກ່າວເຊັ່ນນີ້ຕໍ່ບັນດານັກຂ່າວທີ່ເມືອງ Lausanne ສະວິດເຊີແລນໃນລະຫວ່າງການຢຸດພັກຜ່ອນໃນການໂອ້ລົມ ສົນທະນາກັນ ຊຶ່ງໄດ້ດຳເນີນມາເປັນມື້ທີສອງກາຍເວລາເສັ້ນຕາຍໃນຕອນທ່ຽງຄືນ ວັນອັງ ຄານມື້ກ່ອນນີ້ ເພື່ອໃຫ້ບັນລຸໂຄງຮ່າງຂອງຂໍ້ຕົກລົງກັນ ທີ່ຄວບຄຸມການເຄື່ອນໄຫວດ້ານນີວເຄລຍຂອງອີຣ່ານ ເພື່ອແລກປ່ຽນກັບການຍົກ ເລີກການລົງໂທດດ້ານເສດຖະກິດຕໍ່ອີຣ່ານນັ້ນ.
ການເຈລະຈາ ກັບອີຣ່ານ ກ້າວໜ້າ ແຕ່ຍັງຕົກລົງກັນ ບໍ່ໄດ້
ທ່ານ Zarif ໄດ້ທຳການພົບປະເປັນເວລາຫຼາຍຊົ່ວໂມງໃນເຊົ້າວັນພະຫັດມື້ນີ້ ກັບທ່ານ John Kerry ລັດຖະມົນຕີການຕ່າງປະເທດສະຫະລັດ ແລະບັນດານັກຊ່ຽວຊານຈາກຄະນະຜູ້ຕາງໜ້າອີຣ່ານແລະນາໆຊາດ.
ທ່ານນາງ Marie Harf ໂຄສົກປະຈຳກະຊວງການຕ່າງປະເທດສະຫະລັດ ກ່າວໃນແລງວັນພຸດວານນີ້ວ່າ ສອງຝ່າຍໄດ້ທຳຄວາມຄືບໜ້າ ແຕ່ “ຍັງບໍ່ທັນບັນລຸຄວາມເຂົ້າອົກເຂົ້າໃຈກັນທາງດ້ານການເມືອງ ເທື່ອ.”
ຖ້າ ຫາກອີຣ່ານ ແລະກຸ່ມເຈລະຈາ ທີ່ຮວມທັງສະຫະລັດ ອັງກິດ ຈີນ ຝຣັ່ງ ຣັດເຊຍ ແລະເຢຍຣະມັນ ຕົກລົງກັນໄດ້ກ່ຽວກັບໂຄງຮ່າງແລ້ວ ຫຼັງຈາກນັ້ນ ພວກເຂົາເຈົ້າຈຶ່ງຈະດຳເນີນການຮ່າງຂໍ້ຕົກລົງຂັ້ນສຸດທ້າຍກັນໃຫ້ ແລ້ວເສັດພາຍໃນວັນເສັ້ນຕາຍທີ່ກຳນົດໃສ່ວັນທີ 30 ມິຖຸນາປີນີ້.
