ປະທານາທິບໍດີສະຫະລັດ ທ່ານບາຣັກ ໂອບາມາໄດ້ປະນາມຢ່າງແຮງຕໍ່ການໂຈມຕີທາງອາກາດຢ່າງປ່າເຖື່ອນຂອງຣັດເຊຍແລະອຳນາດການປົກຄອງຊີເຣຍຕໍ່ພົນລະເຮືອນ ໃນກ້ຳຕາເວັນອອກຂອງເມືອງ Aleppo.
ທຳນຽບຂາວກ່າວວ່າ ທ່ານໂອບາມາ ໄດ້ໂອ້ລົມທາງໂທລະສັບໃນວັນພະຫັດວານນີ້ກັບນາຍົກລັດຖະມົນຕີເຢຍຣະມັນ ທ່ານນາງ Angela Merkel ຊຶ່ງ ທັງສອງທ່ານຕ່າງກໍໄດ້ເຫັນພ້ອມນຳກັນວ່າ ຣັດເຊຍແລະອຳນາດການປົກຄອງ Assad ແມ່ນມີຄວາມຮັບຜິດ ຊອບພິເສດ ທີ່ຈະຕ້ອງຢຸດເຊົາການໂຈມຕີ ແລະອະນຸຍາດໃຫ້ ສົ່ງການຊ່ອຍເຫຼືອທາງດ້ານມະນຸດສະທຳເຂົ້າໄປໃນເມືອງດັງກ່າວ.
ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວກ່ອນໜ້ານີ້ວ່າ ສະຫະ ລັດເກືອບຈະໂຈະການເຈລະຈາທາງການທູດກັບຣັດເຊຍຍ້ອນມົສກູຍັງສືບຕໍ່ຖິ້ມລະເບີດໃສ່ພວກຕໍ່ຕ້ານ ທາງກ້ຳຕາເວັນອອກຂອງເມືອງ Aleppo.
ກຸ່ມສັງເກດການກ່າວໃນວັນສຸກມື້ນີ້ວ່າ ການໂຈມຕີທາງອາກາດຂອງຣັດເຊຍ ໃນທົ່ວປະເທດໃນຮອບປີທີ່ຜ່ານມາ ໄດ້ສັງຫານຫລາຍກວ່າ 9,000 ຄົນ ຮວມທັງພົນລະເຮືອນຈຳ ນວນນຶ່ງ. ກຸ່ມສິ້ງຊອມສິດທິມະນຸດໃນຊີເຣຍທີ່ມີສຳນັກງານຢູ່ອັງກິດກ່າວວ່ານອກນັ້ນຍັງ ມີພົນລະເຮືອນອີກຈຳນວນນຶ່ງ ໄດ້ຮັບບາດເຈັບ ຈາກການໂຈມຕີທາງອາກາດຂອງຣັດເຊຍ.
ທີ່ເມືອງ Aleppo ມີພົນລະເຮືອນຫລາຍຮ້ອຍພັນຄົນຍັງຕົກຄ້າງຢູ່ໃນເມືອງດັ່ງກ່າວແລະເຄິ່ງນຶ່ງຂອງຈຳນວນນີ້ ແມ່ນພວກເດັກນ້ອຍ.
ທ່ານ Kerry ກ່າວວ່າ “ບໍ່ມີເຫດຜົນ” ທີ່ຈະສືບຕໍ່ການໂອ້ລົມ ແລະຖືເອົາການກະທຳເຫຼົ່າ ນີ້ເປັນເລື້ອງຮ້າຍແຮງ ຫລັງຈາກຣັດເຊຍປະກາດວ່າ ຈະສືບຕໍ່ການໂຈມຕີທາງອາກາດຂອງຕົນ.
ທ່ານ Kerry ກ່າວວ່າ “ມັນເປັນນຶ່ງໃນບັນດາໂອກາດບ່ອນທີ່ພວກເຮົາຈະສືບຕໍ່ດຳເນີນການທາງເລືອກສຳລັບໄລຍະໃດນຶ່ງແລະທ່ານກ່າວຕື່ມວ່າມັນເປັນເລື້ອງທີ່ໜ້າກັງວົນທີ່ສຸດ ກ່ຽວກັບອະນາຄົດຂອງປະຊາຊົນຊາວຊີເຣຍ.”
ໂຄສົກຂອງທ່ານ Kerry ກ່າວຕໍ່ພວກນັກຂ່າວວ່າ ກະຊວງການຕ່າງປະເທດສະຫະລັດ ແມ່ນຍັງຕິດຕໍ່ກັບວັງເຄຣັມລິນຢູ່ ແຕ່ກໍໄດ້ກະກຽມທີ່ຈະເອົາບາດກ້າວ ທີ່ຫ່າງເຫີນອອກໄປ ຂັດຂວາງຕໍ່ການເອົາບາດກ້າວທີ່ສຳຄັນຂອງຣັດເຊຍ.
