ຄູ່ແຂ່ງຂັນໃນການສະມັກເລືອກຕັ້ງປະທານາທິບໍດີອັຟການິສ
ຖານ ໄດ້ຕົກລົງທີ່ ຈະຢຸດຕິການຜິດຖຽງກັນກ່ຽວກັບການ
ເລືອກຕັ້ງ ແລະເລີ້ມປະຕິບັດງານໄປສູ່ການສ້າງຕັ້ງລັດຖະ
ບານເອກະພາບແຫ່ງຊາດ.
ທ່ານ Abdullah Abdullah ແລະ ທ່ານ Ashraf Ghani ບໍ່
ສາມາດຕົກລົງກັນໄດ້ ກ່ຽວກັບການກວດສອບທີ່ກຳລັງດຳເນີນ
ໄປຢູ່ ບັດເລືອກຕັ້ງ 8 ລ້ານບັດ ຈາກການເລືອກຕັ້ງປະທານາທິ
ບໍດີຮອບຕັດສິນຊີ້ຂາດເມື່ອເດືອນແລ້ວນີ້ ຊຶ່ງໄດ້ມີການກວດ
ສອບບັດ ໄດ້ພຽງຈຳນວນນ້ອຍໆເທົ່ານັ້ນ ມາຮອດປັດຈຸບັນ.
ຫຼັງຈາກການເຈລະຈາກັນ ກັບລັດຖະມົນຕີຕ່າງປະເທດສະຫະລັດ ທ່ານ John Kerry
ເປັນມື້ທີສອງຢູ່ກາບູລ ໃນວັນສຸກວານນີ້ ຜູ້ສະມັກທັງສອງໄດ້ລົງນາມໃນ ຂໍ້ຕົກລົງທີ່ກ່າວ
ວ່າ ພວກເຂົາເຈົ້າຈະຮ່ວມມືກັນໃນການຈັດຕັ້ງ ລັດຖະບານເອກະພາບແຫ່ງຊາດ ຫຼັງຈາກ
ການກວດສອບໄດ້ສິ້ນສຸດລົງຢ່າງສົມບູນ.
Kerry in Afghanistan
ຢູ່ໃນການຖະແຫລງຕໍ່ຜູ້ສື່ຂ່າວ ຄຽງຂ້າງທ່ານ ທ່ານ Ghani ກັບທ່ານ Kerry ທ່ານ
Abdullah ກ່າວວ່າ ຂໍ້ຕົກລົງນີ້ ແມ່ນ “ບາດກ້າວໄປຂ້າງໜ້າອີກອັນນຶ່ງ ໃນຜົນປະ
ໂຫຍດ ຂອງການເສີມສ້າງ ຄວາມເປັນເອກະພາບຂອງປະເທດ ເສີມຄວາມ
ເຂ້ມແຂງ ໃຫ້ແກ່ຕົວບົດກົດໝາຍ ໃນປະເທດ ແລະ ນຳມາຊຶ່ງຄວາມຫວັງ
ສຳຫລັບອະນາຄົດ ທີ່ດີຂຶ້ນ ເພື່ອປະຊາຊົນຂອງອັຟການິສຖານ.”
ທ່ານ Kerry ກ່າວວ່າ ຜູ້ສະມັກທັງສອງໄດ້ຕົກລົງທີ່ຈະຍອມຮັບເອົາ ຜົນການກວດກາ
ບັດນັ້ນ ແລະ ທ່ານໃຫ້ຂໍ້ສັງເກດວ່າ “ຜູ້ ໃດຜູ້ນຶ່ງໃນນີ້ ແມ່ນຈະໄດ້ເປັນປະທານາທິ
ບໍດີ ແຕ່ ເຖິງຢ່າງໃດກໍຕາມ ພວກເຂົາເຈົ້າທັງສອງ ແມ່ນຈະມີບົດບາດທີ່ສຳຄັນ
ຕໍ່ອະນາຄົດ ຂອງອັຟການິສຖານ.”
ສະຫະລັດຕ້ອງການ ໃຫ້ປະທານາທິບໍດີອັຟການິສຖານຄົນໃໝ່ ເຂົ້າຮັບຕຳແໜ່ງ ກ່ອນ
ທ້າຍເດືອນນີ້ ກ່ອນກອງປະຊຸມສຸດຍອດ NATO ໃນວັນທີ 4 ເດືອນກັນຍາທີ່ແຄ້ວນ
Wales ຂອງອັງກິດ ທີ່ຈະເພັ່ງເລັງໃສ່ ບົດບາດຂອງປະຊາຄົມນາໆຊາດ ໃນອັຟການິສ
ຖານນັ້ນ.
