ລິ້ງ ສຳຫລັບເຂົ້າຫາ

ວັນພະຫັດ, ໒໘ ມີນາ ໒໐໒໔

ທ່ານແຄຣີ ພົບປະກັບ ທ່ານ Lavrov ທີ່ນະຄອນ ເຈນີວາ


ທ່ານ John Kerry ລັດຖະມົນຕີຕ່າງປະເທດສະຫະລັດ(ຂວາ) ພົບປະກັບທ່ານ Sergey Lavrov ລັດຖະມົນຕີຕ່າງປະເທດຣັດເຊຍ, ວັນທີ 2 ມີນາ 2015.
ທ່ານ John Kerry ລັດຖະມົນຕີຕ່າງປະເທດສະຫະລັດ(ຂວາ) ພົບປະກັບທ່ານ Sergey Lavrov ລັດຖະມົນຕີຕ່າງປະເທດຣັດເຊຍ, ວັນທີ 2 ມີນາ 2015.

ທ່ານ John Kerry ລັດຖະມົນຕີ​ການ​ຕ່າງປະ​ເທດ​ສະຫະລັດ
​ໄດ້​ພົບ​ປະ​ກັບ​ຄູ່​ຕຳ​ແໜ່​ງຈາກຣັດ​ເຊຍ ໃນ​ວັນ​ຈັນ​ມື້​ນີ້ ​ແລະ​ໄດ້
​ໂອ້ລົມສົນທະນາ​ກັນ ​ເປັນ​ເວລາ​ນຶ່ງ​ຊົ່ວ​ໂມງ​ປາຍ​ ກ່ຽວ​ກັບ​ເລື້ອງ
​ຕ່າງໆ ​ລະຫວ່າງສອງ​ປະ​ເທດ.

ທ່ານ Kerry ​ໄດ້​ພົບ​ປະ​ກັບ​ທ່ານ Sergei Lavrov ລັດຖະມົນຕີ
​ຕ່າງປະ​ເທດຣັດ​ເຊຍ ​ທີ່​ນະຄອນເຈ​ນີ​ວາ ກ່ຽວ​ກັບ​ບັນຫາ​ຂັດ​ແຍ້​ງກັນ​ຢູ່​ໃນ​ຢູ​ເຄຣນ ​ແລະ​ການ​ຍິງ​ສັງຫານ​ທ່ານ Boris Nemtsov ຜູ້ນຳ​ຝ່າຍ​ຄ້ານຣັດເຊຍນັ້ນ. ທັງ​ສອງ​ທ່ານ​ບໍ່​ໄດ້​ຍິ້ມ​ແຍ້ມ ​ເວລາຈັບ​ມື​ກັນ​ແລະ​ຖ່າຍຮູບ​ຮ່ວມ​ກັນ​ ກ່ອນ​ການສົນທະນາ​ກັນ​ນັ້ນ.

ລັດຖະມົນຕີ​ທັງ​ສອງ ​ໄດ້​ພົບ​ປະກັນ​ຄັ້ງ​ຫຼ້າ​ສຸດ ​ເມື່ອ​ເກືອບ​ນຶ່ງ​ເດືອນ​ຜ່ານ​ມາ ຢູ່​ຂ້າງ​ນອກ
ກອງ​ປະຊຸມ​ວ່າ​ດ້ວຍ​ຄວາມ​ປອດ​ໄພ ຢູ່​ນະຄອນ Munich ທີ່​ເຢຣະມັນ​.

ການ​ພົບ​ປະກັນ​ໃນ​ວັນ​ຈັນ​ມື້​ນີ້ ມີ​ຂຶ້ນ​ໃນ​ເວລາ​ບໍ່​ຮອດ​ນຶ່ງ​ສັບປະດາ ຫຼັງ​ຈາກ​ທ່ານ Kerry
ກ່າວ​ຕໍ່ລັດຖະ​ສະພາ​ສະຫະລັດ​ວ່າ ບັນດາ​ເຈົ້າ​ໜ້າ​ທີ່ຣັດ​ເຊຍ ​ໄດ້​ຕົວະລ່າຍ​ຕໍ່​ທ່ານ ກ່ຽວ​
ກັບ​ການ​ພົວພັນ​ຂອງ​ມົສກູ​ໃນ​ຢູ​ເຄຣນນັ້ນ.

ສະຫະລັດ​ແລະ​ພວກ​ປະ​ເທດ​ພັນທະ​ມິດ​ຂອງ​ຕົນ ກຳລັງ​ພິຈາລະນາ​ຈະທຳ​ການ​ລົງ​ໂທດ
​ຕື່ມ​ອີກ​ຕໍ່​ມົສກູ ​ຍ້ອນ​ພຶດຕິ​ກຳ​ຂອງຣັດ​ເຊຍ​ທີ່ຢູເຄຣນ ນັ້ນ ບ່ອນ​ທີ່​ປະທານາທິບໍດີ Petro Poroshenko ກ່າວ​ວ່າ ພວກ​ຫົວ​ແບ່ງແຍກ​ທີ່​ໄດ້​ຮັບ​ການ​ສະໜັບສະໜຸນ​ຈາກຣັດ​ເຊຍ
ຍັງ​ສືບ​ຕໍ່​ລະ​ເມີດ​ຂໍ້​ຕົກລົງຢຸດ​ຍິງ​ຢູ່​ຕໍ່​ມາ.

​ໃນ​ເວລາ​ດຽວ​ກັນ ທ່ານ Kerry ​ໄດ້​ຮຽກຮ້ອງ​ໃຫ້​ມີ​ການ​ສືບສວນ​ສອບ​ສວນ​ຢ່າງ​ຖີ່​ຖ້ວນ
ກ່ຽວ​ກັບ​ການ​ເສຍ​ຊີວິດ​ຂອງ​ທ່ານ Nemtsov​. ວັງ Kremlin ກ່າວ​ວ່າ ປະທານາທິບໍດີ
ຣັດ​ເຊຍ ທ່ານ Vladimir Putin ກຳລັງ​ກຳກັບ​ດູ​ແລ​ການ​ສືບສວນ​ສອບ​ສວນ ​ແຕ່​ພວກ​
ຕຳ​ໜິຕິຕຽນ ​ເວົ້າ​ວ່າ​ປະທານາທິບໍດີ​ອາດ​ຈະ​ບໍ່​ເປັນ​ຄົນ​ດີ​ທີ່​ສຸດ​ສຳລັບ​ວຽກ​ນີ້ ​ເພາະວ່າ
ທ່ານ Newtsov ​ໄດ້ກ່າວ​ຕໍ່​ສື່​ມວນ​ຊົນຣັດ​ເຊຍ ຫວ່າງ​ບໍ່​ເທົ່າ​ໃດ​ສັບປະດາ​ຜ່ານ​ມາ​ວ່າ
ທ່ານ​ຄຶດ​ວ່າ ​ທ່ານ​ພູ​ຕິນ ຢາກ​ໃຫ້​ທ່ານ​ຕາຍ.

ຕໍ່​ໄປ​ໃນ​ແລງ​ວັນ​ຈັນ​ມື້​ນີ້ ທ່ານ Kerry ​ຈະເລີ້ມ​ທຳ​ການ​ໂອ້​ລົມ​ສົນທະນາ​ກັນ​ເປັນ​ເວລາ 3
ມື້ ກັບ​ທ່ານ Mohammmad Javad Zarif ລັດຖະມົນຕີ​ຕ່າງປະ​ເທດ​ອິຣ່ານ ​ໃນ​ຄວາມ​ພະຍາຍາມ​ເພື່ອ​ເຮັດລາຍ​ລະອຽດ​ຕ່າງໆ ຂອງ​ຂໍ້​ຕົກລົງ​ນີວ​ເຄລຍ ກັບ​ອິຣ່ານນັ້ນ.

XS
SM
MD
LG