ລັດຖະມົນຕີການຕ່າງປະເທດສະຫະລັດ ທ່ານ John Kerry
ກ່າວວ່າ ການຈັດຕັ້ງປະຕິບັດ ຂໍ້ຕົກລົງນິວເຄລຍ ກັບອີຣ່ານ
ແມ່ນຍັງອີກບໍ່ເທົ່າໃດມື້ກໍຈະເລີ້ມມີຜົນບັງຄັບຖ້າຫາກທຸກສິ່ງ
ຢ່າງເປັນໄປດ້ວຍດີ.
ທ່ານ Kerry ໃຫ້ຄວາມເຫັນດັ່ງກ່າວໃນລະຫວ່າງການລາຍ
ງານຊີ້ແຈງໃນວັນພະຫັດວານນີ້ ທີ່ທ່ານໄດ້ກ່າວເນັ້ນຢ້ຳເຖິງ
ຄວາມກ້າວໜ້າໃນນະໂຍບາຍການຕ່າງປະເທດຂອງສະຫະ
ລັດໃນຮອບປີທີ່ຜ່ານມາ ແລະຮຽກຮ້ອງໃຫ້ສະມາຊິກລັດຖະ
ສະພາ ໃຫ້ການຢືນຢັນກ່ຽວກັບການແຕ່ງຕັ້ງທາງດ້ານການ
ທູດທີ່ສຳຄັນໆທີ່ຍັງຄ້າງຄາຢູ່ໃນສະພາສູງນັ້ນ.
ທ່ານ Kerry ເວົ້າວ່າ ທ່ານໄດ້ໂອ້ລົມກັບລັດຖະມົນຕີການຕ່າງປະເທດອີຣ່ານ ທ່ານ Mo-
hammad Javad Zarif ທີ່ໄດ້ໃຫ້ການຄ້ຳປະກັນ ແກ່ທ່ານວ່າ ອີຣ່ານ ຕັ້ງໃຈທີ່ຈະເຮັດ
ຫລ້ອນພັນທະຂອງຕົນ ໂດຍໄວເທົ່າທີ່ຈະໄວໄດ້.
ອັນທີ່ເອີ້ນວ່າ ວັນຈັດຕັ້ງປະຕິບັດ ຈະເລີ້ມຂຶ້ນເວລາອົງການຄຸ້ມຄອງປະລະມານູຂອງສະ
ຫະປະຊາຊາດໃຫ້ການຢັ້ງຢືນວ່າອີຣ່ານໄດ້ປະຕິບັດຕາມຂໍ້ບັງຄັບຕ່າງໆທີ່ຢູ່ໃນຂໍ້ຕົກລົງ
ທີ່ຮູ້ກັນໃນຊື່ແຜນການປະຕິບັດງານຮ່ວມໃນຂອບເຂດທີ່ກວ້າງຂວາງນັ້ນ.
ອັນເປັນຜົນຂອງການປະຕິບັດຕາມຂໍ້ຕົກລົງນີ້ອີຣ່ານຈະໄດ້ຮັບການບັນເທົາກ່ຽວກັບການ
ລົງໂທດຕ່າງໆຂອງນາໆຊາດທີ່ພົວພັນໃນເລື້ອງນິວເຄລຍ. ໃນທ້າຍປີກາຍນີ້ປະທານາທິ
ບໍດີອີຣ່ານ ທ່ານ Hassan Rouhani ໄດ້ທຳນາຍວ່າ ອີຣ່ານຈະກ້າວໄປເຖິງວັນຈັດຕັ້ງປະ
ຕິບັດພາຍໃນກາງເດືອນມັງກອນນີ້.
ທ່ານ Kerry ກ່າວໃນວັນພະຫັດວານນີ້ວ່າ ເຕຫະຣ່ານໄດ້ຈັດສົ່ງສ່ວນໃຫຍ່ຂອງທາດຢູເຣ
ນຽມ ທີ່ຕົນເກັບສະສົມໄວ້ນັ້ນ ໄປຕ່າງປະເທດແລ້ວ ໂດຍກ່າວວ່າ ອີຣ່ານທີ່ຈິງແລ້ວໄດ້ສົ່ງ
ຄວາມສາມາດ ທີ່ຕົນມີຢູ່ໃນປັດຈຸບັນ ເພື່ອສ້າງອາວຸດນິວເຄລຍໄປຕ່າງປະເທດ.
ຂະນະດຽວກັນ ສະມາຊິກຂອງພັກຣີພັບບລີກັນຢູ່ໃນລັດຖະສະພາໄດ້ທຳການເຄື່ອນໄຫວ
ເພື່ອໃຫ້ລັດຖະສະພາ ມີສິດອຳນາດຫຼາຍຂຶ້ນ ໃນການຍົກເລີກຂໍ້ຕົກລົງດັ່ງກ່າວ.
