ຊາວມຸສລິມ ນ້ອຍໃຫຍ່ທຸກໆຄົນ ໄດ້ຮັບອະນຸຍາດໃຫ້ເຂົ້າໄປສູດ
ມົນພາວະນາ ໃນວັນສຸກມື້ນີ້ ຢູ່ທີ່ວັດໃຫຍ່ Temple Mount ຊຶ່ງ
ເປັນສະຖານທີ່ສັກສິດຢູ່ໃນ ນະຄອນເຈຣູຊາແລັມ ທີ່ຊາວມຸສລິມ
ຮ້ອງວ່າ ວັດ al-Aqsa.
ອິສຣາແອລ ໄດ້ຈຳກັດກ່ຽວກັບການເຂົ້າໄປສູດມົນພາວະນາ ຢູ່
ທີ່ວັດດັ່ງກ່າວ ຫວ່າງມໍ່ໆມານີ້ ໂດຍອະນຸຍາດໃຫ້ແຕ່ພວກຜູ້ຍິງ
ແລະຜູ້ຊາຍ ທີ່ມີອາຍຸ 35 ປິ ຂຶ້ນໄປ ເພາະຢ້ານກົວວ່າ ພວກຊາວ
ໜຸ່ມອາດຈະກໍ່ຄວາມຮຸນແຮງຂຶ້ນ.
ໂຄສົກຕຳຫຼວດ ອິສຣາແອລ ທ່ານ Mickey Rosenfeld ກ່າວ
ວ່າ ອິສຣາແອລ “ຫວັງວ່າທຸກສິ່ງທຸກຢ່າງ ຈະງຽບແລະສະຫງົບ ໃນມື້ນີ້.”
ທ່ານ Rosenfeld ກ່າວວ່າ ມີການສົ່ງຕຳຫລວດເພີ້ມເຕີມໄປຍັງ ນະຄອນເຈຣູຊາແລັມ
ເພື່ອປ້ອງກັນບໍ່ໃຫ້ເກີດເຫດຮ້າຍໃດໆ ທັງຢູ່ໃນແລະອ້ອມແອ້ມເຂດ ເມືອງເກົ່າ ບ່ອນທີ່
ວັດ Temple Mount ຕັ້ງຢູ່ນັ້ນ.
ການຕັດສິນໃຈຍົກເລີກຂໍ້ຈຳກັດໃນເລື່ອງອາຍຸ ໄດ້ປະກາດໃຫ້ຊາບຫລັງຈາກການເຈ ລະຈາໃນວັນພະຫັດວານນີ້ ລະຫວ່າງລັດຖະມົນຕີຕ່າງປະເທດສະຫະລັດ ທ່ານ John
Kerry ກັບນາຍົກລັດຖະມົນຕີອິສຣາແອລ ທ່ານ Benjamin Netanyahu ປະທານາ
ທິບໍດີປາແລສໄຕນ໌ ທ່ານ Mahmound Abbas ແລະກະສັດ Abdullah ແຫ່ງຈໍແດນ.
ທ່ານ Kerry ກ່າວວ່າ ທຸກຝ່າຍໃຫ້ການຄໍ້າປະກັນແກ່ທ່ານວ່າ ເຂົາເຈົ້າໝາຍໝັ້ນທີ່ຈະຟື້ນ
ຟູຄວາມສະຫງົບ ແລະເອົາໃນອັນທີ່ທ່ານຮ້ອງວ່າ “ບາດກ້າວອັນແທ້ຈິງ” ແທນທີ່ຈະເປັນ
ພຽງແຕ່ສຳນວນໂວຫານເທົ່ານັ້ນ. ທ່ານບໍ່ໄດ້ໃຫ້ລາຍລະອຽດກ່ຽວກັບບາດກ້າວເຫລົ່ານັ້ນ.
ໃນການໃຫ້ຄວາມເຫັນ ກ່ຽວກັບໂອກາດທີ່ຈະຟຶ້ນຟູການເຈລະຈາສັນຕິພາບໃນ ພາກຕາ
ເວັນອອກກາງນັ້ນ ທ່ານ Kerry ກ່າວວ່າ ນີ້ບໍ່ແມ່ນເວລາອັນເໝາະສົມທີ່ຜູ້ນຳ ອິສຣາແອລ ແລະປາແລສໄຕນ໌ ຈະຈັດໃຫ້ມີການພົບປະແບບເຊິ່ງໜ້າ.
ພາຍໃຕ້ຂໍ້ຕົກລົງ ທີ່ມີມາເປັນເວລາດົນນານແລ້ວນັ້ນ ຊາວຢີວສາມາດເຂົ້າໄປຢ້ຽມຢາມ
ວັດ Temple Mount ໄດ້ ແຕ່ບໍ່ໃຫ້ສູດມົນພາວະນາຢ່າງເປີດເຜີຍຢູ່ທີ່ນັ້ນເພື່ອຫລີກລ້ຽງ
ຕໍ່ການສ້າງຄວາມບໍ່ພໍໃຈໃຫ້ແກ່ຊາວອາຣັບ. ຊາວຢິວຈຳນວນນຶ່ງ ຊຸກຍູ້ໃຫ້ຂະຫຍາຍສິດ
ທິ ໃນການສູດມົນພາວະນາຂອງເຂົາເຈົ້າ ຢູ່່ສະຖານທີ່ດັ່ງກ່າວ.
ໃນຕອນຕົ້ນເດືອນນີ້ມືປືນປາແລສໄຕນ໌ຄົນນຶ່ງ ໄດ້ຍິງນັກສອນສາສະໜາຊາວຢິວ ທີ່ເກີດຢູ່ໃນສະຫະລັດ ບາດເຈັບສາຫັດ ຫລັງຈາກໄດ້ປະຊຸມຮຽກຮ້ອງໃຫ້ຊາວ ຢິວມີສິດເພີ້ມຂຶ້ນ
ໃນການສູດມົນພາວະນາຢູ່ທີ່ວັດ Temple Mount. ຕຳຫຼວດ ອິສຣາແອລ ໄດ້ຍິງສັງຫານມືປືນມືປືນຄົນນັ້ນ.