ຣັດເຊຍໄດ້ເຕືອນເຖິງຜົນທີ່ຈະຕິດຕາມມາຢ່າງຮ້າຍແຮງທາງດ້ານກົດໝາຍ ໃນວັນສຸກວານນີ້ ທີ່ເກີດຈາກ ການໃຫ້ຄວາມເຫັນ ຂອງລັດຖະມົນຕີ ການຕ່າງປະເທດສະຫະລັດ ທ່ານ John Kerry ທີ່ກ່າວວ່າ ມົສກູແລະດາມັສກັສ ຄວນຈະຖືກສືບສວນໃນການກໍ່ອາ ຊະຍາກຳສົງຄາມອັນເປັນຜົນເນື່ອງມາຈາກການໂຈມຕີທາງອາກາດຕໍ່ເປົ້າໝາຍພົນລະເຮືອນໃນຊີເຣຍ.
ທີ່ກະຊວງການຕ່າງປະເທດສະຫະລັດ ພວກເຈົ້າໜ້າທີ່ບໍ່ໄດ້ໃຫ້ຄວາມສຳຄັນຫຍັງຫຼາຍ ກ່ຽວກັບການໃຫ້ຄວາມເຫັນ ຂອງທ່ານ Kerry ນັ້ນວ່າ ບໍ່ມີຫຍັງໃໝ່. ລັດຖະມົນຕີການຕ່າງປະເທດສະຫະລັດ ໄດ້ໃຊ້ຄຳເວົ້າທີ່ຄ້າຍຄືກັນນີ້ ຢູ່ທີ່ອົງການສະຫະປະຊາຊາດໃນເດືອນແລ້ວ ເວລາທ່ານກ່າວປະນາມການໂຈມຕີທາງ ອາກາດຕໍ່ໂຮງໝໍແລະພວກເດັກ ນ້ອຍວ່າເປັນການລະເມີດຢ່າງເປີດແປນຕໍ່ກົດ ໝາຍຂອງນາໆຊາດ.
ແຕ່ທ່ານ Kerry ໄດ້ເພີ້ມທະວີການໂຈມຕີດັ່ງກ່າວໃນວັນສຸກວານນີ້ໂດຍປະກາດວ່າ ການໂຈມຕີຄັ້ງໃໝ່ ໃນອາທິດນີ້ ຕໍ່ໂຮງໝໍຕ່າງໆ ໃນຊີເຣຍນັ້ນ ຄວນຈະໄດ້ຮັບການສືບສວນທີ່ເໝາະສົມໃນການກໍ່ອາຊະຍາກຳສົງຄາມ.
ລັດຖະມົນຕີ Kerry ໄດ້ກ່າວຖະແຫຼງຢູ່ທີ່ກະຊວງການຕ່າງປະເທດ ຮ່ວມກັບລັດຖະມົນຕີການຕ່າງປະເທດຝຣັ່ງທ່ານ Jean-Marc Ayrault ທີ່ພວມຢູ່ໃນລະຫວ່າງການຢ້ຽມຢາມ ສະຫະລັດ. ໃນລະຫວ່າງການຖະແຫລງຂ່າວ ໃນເວລາຕໍ່ມານັ້ນ ໂຄສົກກະຊວງການຕ່າງ ປະເທດສະຫະລັດ ທ່ານ John Kirby ກ່າວວ່າ ການໃຫ້ຄວາມເຫັນຂອງທ່ານ Kerry ບໍ່ໄດ້ສະທ້ອນໃຫ້ເຫັນເຖິງການປ່ຽນແປງໃນນ້ຳສຽງ ໃນທັດສະນະຂອງສະຫະລັດກ່ຽວກັບກົນລະຍຸດຂອງຣັດເຊຍແລະຊີເຣຍ.
ທ່ານ Kirby ໄດ້ປະຕິເສດບໍ່ຍອມຕອບຄຳຖາມຊ້ຳແລ້ວຊ້ຳອີກຂອງພວກນັກຂ່າວກ່ຽວກັບວ່າຜູ້ໃດ ທີ່ທ່ານ Kerry ຈະນຳພາການສືບສວນ ກ່ຽວກັບການກໍ່ອາຊະຍາກຳສົງຄາມ.
ການໂຈມຕີຕໍ່ໂຮງໝໍຊີເຣຍ ໃນຄືນວັນພະຫັດຜ່ານມາ ມີລາຍງານວ່າ ໄດ້ສັງຫານ 20 ຄົນ ແລະເຮັດໃຫ້ມີຜູ້ບາດເຈັບ ອີກ 100 ຄົນ. ພວກນາຍແພດບໍ່ມີພົມແດນກ່າວວ່າ ການໂຈມຕີໃນອາທິດນີ້ຕໍ່ໂຮງໝໍໃຫຍ່ 4 ແຫ່ງ ຢູ່ໃນເຂດຄວບຄຸມ ຂອງພວກຕໍ່ຕ້ານໃນຊີເຣຍ ແມ່ນເປັນການລະເມີດຕໍ່ກົດໝາຍມະນຸດສະທຳ ທີ່ບໍ່ໜ້າເຊື່ອ ຊຶ່ງໄດ້ຈຳກັດຂັດຂວາງບໍ່ໃຫ້ພົນ ລະເຮືອນໄດ້ຮັບການປິ່ນປົວທາງດ້ານການແພດ.
