ລັດຖະມົນຕີການຕ່າງປະເທດສະຫະລັດ ທ່ານ John Kerry
ໄດ້ກ່າວໃນວັນອັງຄານມື້ນີ້ວ່າ ຄວາມພະຍາຍາມຂອງນາໆຊາດ
ທີ່ຈະເອົາຊະນະກຸ່ມລັດອິສລາມນັ້ນ ແມ່ນ “ກຳລັງເຄື່ອນໄຫວໄປ
ໃນທິດທາງທີ່ຖືກຕ້ອງ, ແຕ່ທ່ານໄດ້ເຕືອນວ່າ ຈະຕ້ອງມີການ
ດຳເນີນຄວາມ ພະຍາຍາມເພີ້ມຕື່ມ ເພື່ອສະໜັບສະໜຸນການ
ສ້າງສະຖຽນລະພາບໃນລີເບຍແລະອິຣັກ.”
ທ່ານ Kerry ໄດ້ກ່າວໃນການເປີດກອງປະຊຸມ ຂອງບັນດາ
ລັດຖະມົນຕີ ທີ່ນະຄອນໂຣມບ່ອນທີ່ຜູ້ຕາງໜ້າຂອງປະມານ 20
ປະເທດ ເຂົ້າຮ່ວມການສົນທະນາຫາລື ເພື່ອຊອກຫາຊ່ອງທາງ
ໃນການເສີມຂະຫຍາຍການຕ້ານຢັນກຸ່ມລັດອິສລາມ.
ທ່ານໄດ້ກ່າວເນັ້ນ ເຖິງຄວາມສ່ຽງ ໃນການພວກຫົວຮຸນແຮງ ເຂົ້າຄວບຄຸມໃນລີເບຍ ທີ່ອຸດົມຮັ່ງມີໄປດ້ວຍບໍ່ນ້ຳມັນ, ແຕ່ໄດ້ກ່າວວ່າ ລັດຖະບານສາມັກຊີຊາດຊຸດໃໝ່ ແມ່ນຍັງຕ້ອງໄດ້ດຳເນີນໄປຕື່ມອີກໄກ ເພື່ອປ້ອງກັນບໍ່ໃຫ້ເກີດສະພາບການດັ່ງກ່າວຂຶ້ນ.
ນອກນັ້ນ ທ່ານ Kerry ໄດ້ຮຽກຮ້ອງຄວາມສົນໃຈ ຕໍ່ສະຖານະການທາງດ້ານມະນຸດສະທຳໃນຊິເຣຍ ໂດຍໄດ້ກ່າວວ່າ ນີ້ແມ່ນຄວາມຫາຍະນະທີ່ບໍ່ເຄີຍເຫັນ ນັບຕັ້ງແຕ່ສົງຄາມໂລກຄັ້ງທີ 2 ເປັນຕົ້ນມາ. ທ່ານໄດ້ກ່າວອີກວ່າ ຫຼາຍໆປະເທດຈຳເປັນ “ທີ່ຈະຕ້ອງອອກສຽງຢ່າງແຮງ” ກ່ຽວກັບຄວາມຈຳເປັນຂອງການຢຸດຍິງ ຍຸດຕິການປິດລ້ອມ ແລະຮຽກຮ້ອງໃຫ້ມີການ
ຈັດສົ່ງ ສະບຽງອາຫານ ຢຸກຢາຕ່າງໆ ທີ່ຈຳເປັນ ໄປໃຫ້ປະຊາຊົນທີ່ຂາດ ຢ່າງຮີບດ່ວນໃນ
ທຸກໆເຂດ.
