ລັດຖະມົນຕີຕ່າງປະເທດສະຫະລັດ ທ່ານ John Kerry ໄດ້ໄປຢ້ຽມຢາມຂົ້ວ ໂລກໃຕ້ໃນວັນສຸກວານນີ້ ກ່ອນໜ້າກອງປະຊຸມວ່າດ້ວຍການປ່ຽນແປງຂອງດິນຟ້າອາກາດນາໆຊາດ ທີ່ນະຄອນ Marrakesh ໃນອາທິດໜ້ານີ້.
ຫລັງຈາກການເດີນທາງໃນຕອນເຊົ້າມືດຈາກເມືອງ Christchurch ປະເທດ New Zealand ທ່ານ Kerry ໄດ້ບິນໄປຍັງສະຖານີ McMurdo ຊຶ່ງເປັນທີ່ຕັ້ງບ່ອນປະຕິບັດງານຂອງສະຫະລັດໃນຂົ້ວໂລກໃຕ້. ທ່ານ Kerry ເດີນທາງຈາກສະຖານີ McMurdo ໄປຫາບ່ອນປະຕິບັດງານຄົ້ນຄວ້ານ້ອຍໆຂອງສະຫະ ລັດ ໃກ້ກັບຂົ້ວໂລກໃຕ້ ບ່ອນທີ່ທ່ານຈະສົນທະນາກັບບັນດາຜູ້ຊ່ຽວຊານຢູ່ທີ່ນັ້ນກ່ອນທີ່ທ່ານກັບຄືນມາສະຖານີ McMurdo ໃນຕອນກາງຄືນ.
ບັນດາຜູ້ຊ່ວຍທ່ານ Kerry ກ່າວວ່າ ການເດີນທາງນີ້ເປັນໂອກາດໃຫ້ທ່ານ ໄດ້ ຮຽນຮູ້ກ່ຽວກັບການປ່ຽນແປງຂອງດິນຟ້າອາກາດຢູ່ທີ່ຂົ້ວໂລກໃຕ້.
ທ່ານ Kerry ບໍ່ໄດ້ອອກຖະແຫລງການໃດໆ ໃນຂະນະທີ່ຢູ່ຂົ້ວໂລກໃຕ້ ແຕ່ວ່າໃນວັນພະຫັດ ທີ່ຜ່ານມາ ຢູ່ເມືອງ Christchurch ທ່ານໄດ້ສະແດງຄວາມຍິນດີ ຕໍ່ປະທານາທິບໍດີທີ່ໄດ້ຮັບເລືອກໃໝ່ຂອງສະຫະລັດ ທ່ານ Donald Trump ຕໍ່ ໄຊຊະນະໃນອັນທີ່ທ່ານ Kerry ຮ້ອງວ່າ “ເປັນການເລືອກຕັ້ງສຳຄັນສຸດ” ໃນຕົ້ນອາທິດນີ້.
ທ່ານ Kerry ກັບຄືນໄປ New Zealand ໃນວັນເສົາມື້ນີ້ ພື່ອພົບປະກັບນາຍົກລັດຖະມົນ ຕີ ທ່ານ John Key. ຈາກນັ້ນ ທ່ານຈະເດີນທາງໄປຍັງພາກຕາເວັນອອກກາງເພື່ອເຈລະ ຈາຫາລື ແລະຫລັງຈາກນັ້ນໄປນະຄອນ Marrakesh ປະເທດ Morocco ບ່ອນທີ່ທ່ານຈະກ່າວຄຳປາໃສອັນສຳຄັນ.
