ພວກນັກກູ້ໄພໃນພາກກາງຂອງເຄັນຢາຍັງສືບຕໍ່ພະຍາຍາມເພື່ອຊອກຫາຊ່ອງ ທາງໃຫ້ເຂົ້າໄປເຖິງເຮືອບິນເຮລິຄອບເຕີຂອງກອງທັບອູການດາ 2 ລໍາ ທີ່ໄດ້ປະສົບອຸບປະຕິເຫດ ຕົກໃນບໍລິເວນພູເຄັນຢາ.
ເຈົ້າໜ້າທີ່ທາງທະຫານຂອງເຄັນຢາ ໄດ້ກ່າວໃນວັນອັງຄານມື້ນີ້ວ່າ ໄດ້ມີການ ແນມເຫັນຊາກຂອງເຮືອບິນເຮລິຄອບເຕີຈາກເທິງອາກາດ ແຕ່ຍັງບໍ່ຊາບເຖິງຊະຕາກຳຂອງພະນັກງານເຮືອບິນເຮລິຄອບເຕີທັງສອງ.
ໃນວັນຈັນວານນີ້ ພວກນັກກູ້ໄພໄດ້ພົບເຮືອບິນເຮລິຄອບເຕີລໍາທີ 3 ທີ່ໄດ້ລົງຈອດສຸກເສີນ ຢູ່ພູເຄັນຢາ ແລະໄດ້ໃຫ້ການຊ່ອຍເຫຼືອແກ່ຜູ້ຮ່ວມເດີນທາງແລະພະນັກງານທັງໝົດ 7 ຄົນຢູ່ໃນເຮືອບິນລຳດັ່ງກ່າວ.
ເຈົ້າໜ້າທີ່ກ່າວວ່າ ພວກສືບສວນສອບສວນໄດ້ສົງໄສວ່າ ສະພາບດິນຟ້າອາ ກາດປັ່ນປ່ວນ ອາດເປັນສາເຫດທີ່ພາໃຫ້ເກີດອຸບປະຕິເຫດດັ່ງກ່າວ.
ໄດ້ມີລາຍງານທີ່ຍັງມີການຂັດແຍ້ງກັນນັບຕັ້ງແຕ່ວັນຈັນວານນີ້ ກ່ຽວກັບຊະຕາກໍາຂອງພວກເຮືອບິນເຮລິຄອບເຕີເຫຼົ່ານັ້ນ. ລາຍງານກ່ອນໜ້ານີ້ແຈ້ງວ່າ ພວກກູ້ໄພ ໄດ້ເຂົ້າໄປຮອດໄປເຖິງເຮືອບິນເຮລິຄອບເຕີແລະໃຫ້ການຊ່ອຍເຫຼືອພວກເຂົາເຈົ້າ ທັງໝົດແລ້ວ.
ບັນດາເຮືອບິນເຮລິຄອບເຕີຂອງອູການດາເຫຼົ່ານີ້ ແມ່ນກໍາລັງຢູ່ໃນລະຫວ່າງການເດີນທາງໄປຍັງໂຊມາເລຍ ເພື່ອຮ່ວມການປະຕິບັດງານ ຂອງກຳລັງຮັກສາສັນຕິ ພາບສະຫະພາບອາຟຣິກາ ຕໍ່ສູ້ກັບກຳລັງຂອງກຸ່ມຫົວຮຸນແຮງ al-Shabab.
ເຮືອບິນເຮລິຄອບເຕີລໍາທີ 4 ທີ່ບິນໄປພ້ອມກັນນັ້ນ ໄດ້ລົງຈອດຢ່າງປອດໄພໃນພາກຕາເວັນອອກສຽງເໜືອຂອງເຄັນຢາ.
