ລິ້ງ ສຳຫລັບເຂົ້າຫາ

ໂຕປະກັນຝຣັ່ງ ທີ່ຖືກລັກພາຕົວ ທີ່ປະເທດເຄນຢາ ເສຍຊີວິດແລ້ວ

  • ທອງປານ ເທບວົງສາ

ນາງ Marie Dedieu ຊາວຝຣັ່ງ ທີ່ຖືກມືປືນລັກພາຕົວໄປ

ກະຊວງຕ່າງປະເທດຂອງຝຣັ່ງເວົ້າວ່າ ແມ່ຍິງຊາວຝຣັ່ງສູງອາຍຸຄົນນຶ່ງທີ່ ຖືກລັກພາຕົວໄປທີ່
ປະເທດເຄນຢາໃນຕົ້ນເດືອນນີ້ ໄດ້ເສຍຊີວິດແລ້ວ.

ເຈົ້າໜ້າທີ່ຝຣັ່ງ ທີ່ໄດ້ທໍາການເຈລະຈາຕໍ່ຮອງຂໍໃຫ້ປ່ອຍຕົວນາງ Marie Dedieu ໄດ້ປະ
ກາດ ກ່ຽວກັບການເສຍຊີວິດຂອງລາວ ເມື່ອວັນພຸດມື້ນີ້ ແຕ່ພວກເຂົາເຈົ້າບໍ່ໄດ້ແຈ້ງໃຫ້ຊາບ
ກ່ຽວກັບສາເຫດ ຫລືວັນເວລາໃນ ການເສຍຊີວິດ.

ພວກມືປືນທີ່ບໍ່ຊາບຝ່າຍໄດ້ລັກພາຕົວນາງ Dedieu ເມື່ອວັນທີ່ 1 ເດືອນຕຸລາ ຈາກບ້ານ
ພັກແຄມທະເລຂອງລາວໃນເຂດພາກເໜືອຂອງປະເທດເຄນຢາ ຜູ້ກ່ຽວຢູ່ໃນໄວ 60 ກວ່າປີ
ແລະໃຊ້ລົດເຂັນໄປມາ ຊຶ່ງພວກ ລັກພາຕົວບໍ່ໄດ້ເອົາລົດເຂັນດັ່ງກ່າວໄປນໍາ.

ພວກເຈົ້າໜ້າທີ່ເຄນຢາສົງໄສວ່າ ພວກຫົວຮຸນແຮງຈາກກຸ່ມກະບົດ al-Shabab ຂອງໂຊມາ
ເລຍ ມີສ່ວນພົວພັນໃນການລັກພາຕົວຄັ້ງນີ້ ພ້ອມ ດ້ວຍການລັກພາໂຕນັກທ່ອງທ່ຽວຊາວ ອັງກິດຄົນນຶ່ງແລະພະນັກງານຊ່ວຍເຫລືອຊາວສະເປນສອງຄົນເມື່ອໝໍ່ໆມານີ້ນໍາ.

ເມື່ອວັນອາທິດຜ່ານມານີ້ ພວກເຈົ້າໜ້າທີ່ເຄນຢາ ໄດ້ສົ່ງທະຫານຈຸນຶ່ງເຂົ້າ ໄປປະຕິບັດງານ
ໃນໂຊມາເລຍ ເພື່ອຕາມລ່າຫາສະມາຊິກຂອງກຸ່ມຫົວຮຸນແຮງອີສລາມທີ່ເປັນເຄື່ອຂ່າຍຂອງ
ກຸ່ມກໍ່ການຮ້າຍອາລຄາອີດາ.

ເວລານີ້ກໍາລັງທະຫານດັ່ງກ່າວຂອງເຄນຢາ ກໍາລັງປະເຊີນກັບສະພາວະຝົນຕົກໜັກ ແລະ
ດິນຕົມ ໃນຂະນະທີ່ພວກເຂົາເຈົ້າກໍາລັງບຸກຄືບໜ້າເຂົ້າໄປໃນຢ່າງໜ້ອຍສອງຂົງເຂດທາງ
ພາກໃຕ້ຂອງໂຊມາເລຍນັ້ນ.

XS
SM
MD
LG