ອົງການຊ່ອຍເຫຼືອນາໆຊາດຫຼາຍອົງການທີ່ເຮັດວຽກໃນເຄນຢາ ໄດ້ກ່າວເຕືອນວ່າການ
ຂາດແຄນເງິນທຶນທີ່ສຳຄັນນັ້ນ ຈະມີຜົນກະທົບຕໍ່ຫຼາຍໆສິບພັນຄົນທີ່ອາໄສຢູ່ໃນສູນ
ອົບພະຍົບທີ່ໃຫຍ່ທີ່ສຸດຂອງໂລກ ຢູ່ໃນປະເທດດັ່ງກ່າວ.
8 ອົງການຊ່ອຍເຫຼືອຂອງນາໆຊາດ ຮວມທັງ Oxfam, Save the Children ໄດ້ກ່າວ
ໃນຖະແຫຼງຂ່າວສະບັບນຶ່ງວ່າ ບັນດາອົງການຊ່ອຍເຫຼືອຈຳເປັນຕ້ອງໄດ້ຮັບເງິນທຶນຈໍານວນ 25 ລ້ານໂດລາ ເພື່ອສືບຕໍ່ໃຫ້ການຊ່ອຍເຫຼືອແກ່ອົບພະຍົບ ຈໍານວນ 465 ພັນຄົນ ທີ່ສູນອົບພະຍົບ Dadaab ໃນປະເທດເຄນຢາ. ຖະແຫຼງ ຂ່າວຍັງກ່າວວ່າ ເງິນທຶນສຳຫຼັບການໃຫ້ບໍລິການທີ່ສຳຄັນໆ ຈະໝົດລົງພາຍໃນໄລຍະສອງສາມເດືອນຂ້າງໜ້ານີ້.
ພວກອົບພະຍົບທີ່ສູນດັ່ງກ່າວແມ່ນສືບຕໍ່ເພີ່ມຈຳນວນຂຶ້ນເລື້ອຍໆໃນຮອບປີຜ່ານມາ ເຖິງແມ່ນວ່າຄວາມແຫ້ງແລ້ງໃນຂົງເຂດໄດ້ດີຂຶ້ນແດ່ແລ້ວກໍຕາມ. ແຕ່ວ່າ ບັນດາອົງການໃຫ້ຄວາມຊ່ອຍເຫຼືອໄດ້ເຕືອນວ່າ ເງິນຊ່ອຍເຫຼືອຂອງນາໆຊາດສຳຫຼັບສູນອົບພະຍົບດັ່ງກ່າວ ແມ່ນບໍ່ໄດ້ເພີ່ມຂຶ້ນໃນລະດັບດຽວກັນກັບຈຳນວນອົບພະຍົບ.
ພວກອົບພະຍົບສ່ວນໃຫຍ່ໃນສູນ Dadaab ແມ່ນເປັນຊາວໂຊມາເລຍທີ່ໄດ້ຫຼົບໜີ ຈາກບ້ານເກີດເມືອງນອນຂອງພວກເຂົາເຈົ້າ ຍ້ອນບັນຫາຂັດແຍ້ງຢ່າງຮຸນແຮງຄວາມທຸກຈົນ ແລະໄພແຫ້ງແລ້ງຢ່າງໜັກ ໃນປີກາຍນີ້.
