ບັນດາເຈົ້າໜ້າທີ່ໃນເຄັນຢາ ໄດ້ລະບຸຕົວມືປືນຄົນໜຶ່ງ ໃນ
ບັນດາພວກມືປືນຂອງກຸ່ມ al-Shabab ທີ່ໄດ້ສັງຫານໝູ່
ປະຊາຊົນ 148 ຄົນຢູ່ມະຫາວິທະຍາໄລແຫ່ງນຶ່ງ ວ່າເປັນ
ລູກຊາຍຂອງເຈົ້າໜ້າທີ່ລັດຖະບານ ເຄັນຢາທ່ານໜຶ່ງ.
ໂຄສົກກະຊວງພາຍໃນ ກ່າວໃນວັນອາທິດມື້ນີ້ວ່າ ທ້າວ
Abdirahim Abdullahi ເປັນຜູ້ໜຶ່ງໃນບັນດາພວກໂຈມ
ຕີສະຫລະຊີບທີ່ເສຍຊີວິດໄປໃນລະຫວ່າງການສັງຫານ
ໝູ່ປະຊາຊົນ ທີ່ມະຫາວິທຍາໄລ Garissa ນັ້ນ. ໂຄສົກ
ກ່າວຕື່ມວ່າ ເຈົ້າໜ້າທີ່ລັດຖະບານຜູ້ເປັນພໍ່ ໄດ້ລາຍງານ
ກ່ອນໜ້ານັ້ນ ວ່າ ລູກຊາຍຂອງທ່ານໄດ້ຫາຍສາບສູນໄປ.
ຂະນະດຽວກັນ ຊາວເຄັນຢາພາກັນອຸທິດພິທີສະຫຼອງຕ່າງໆໃນວັນອິສເຕີນີ້ ແກ່ພວກເຄາະຮ້າຍ 147 ຄົນໃນການສັງຫານໝູ່ ເມື່ອວັນພະຫັດຜ່ານມາ ໂດຍພວກຫົວຮຸນແຮງ
al-Shabab ນັ້ນ. ການທຳພິທີຕ່າງໆໄດ້ມີຂຶ້ນໃນທົ່ວເຄັນຢາໃນວັນອາທິດມື້ນີ້ ທ່າມກາງ
ການຮັກສາຄວາມປອດໄພຢ່າງເຂັ້ມງວດ.
ໃນຂະນະດຽວກັນ ຫົວໜ້າກຳລັງຮັກສາຄວາມປອດໄພ ກ່າວປ້ອງກັນໃນການຕອບໂຕ້ໂດຍພວກກຳລັງພິເສດຕໍ່ການໂຈມຕີນັ້ນ.
ອົງການຂ່າວຝຣັ່ງ ລາຍງານວ່າ ພວກກຳລັງພິເສດໃຊ້ເວລາຢ່າງໜ້ອຍ 7 ຊົ່ວໂມງ ກ່່ວາຈະ
ໄປຮອດສະຖານທີ່ເກີດເຫດ ຫຼັງຈາກບິນໄປຈາກນະຄອນຫຼວງໄນໂຣບີ ຫຼາຍຊົ່ວໂມງຫຼັງ
ຈາກພວກກຳລັງຮັກສາຄວາມປອດໄພຈຸອື່ນໆໄດ້ສູ້ລົບກັບພວກຫົວຮຸນແຮງນັ້ນຢູ່ແລ້ວ.
ມີລາຍງານວ່າ ພວກນັກຂ່າວບາງຄົນ ທີ່ໄດ້ຂັບລົດລະຍະທາງໄກ 365 ຫຼັກກິໂລແມັດ ຈາກໄນໂຣບີນັ້ນ ໄດ້ເດີນທາງໄປຮອດບ່ອນເກີດເຫດ ກ່ອນພວກກຳລັງພິເສດ. ໃນວັນ
ອາທິດມື້ນີ້ ໜັງສືພິມຫຼາຍສະບັບໃນເຄັນຢາໄດ້ຕຳໜິຕິຕຽນຢ່າງແຂງແຮງ ຕໍ່ການຕອບໂຕ້
ຂອງຝ່າຍລັດຖະບານ.
ໃນວັນເສົາວານນີ້ ປະທານາທິບໍດີ Uhuru Kenyatta ຮຽກຮ້ອງໃຫ້ມີຄວາມສາມັກຄີກັນ ຫຼັງຈາກການສັງຫານໝູ່ໂດຍກຸ່ມ al-Shabab ທີ່ແນເປົ້າໝາຍການໂຈມຕີຂອງພວກເຂົາ
ໃສ່ຊາວຄຣິສຕຽນ ເປັນສ່ວນໃຫຍ່ນັ້ນ.
ພົນລະເມືອງເຄັນຢາປະມານ 83 ເປີເຊັນເຊື່ອຖືສາສະໜາຄຣິສ.
ໃນການກ່າວປາໄສ ທາງໂທລະພາບ ປະທານາທິບໍດີ ໄດ້ປະກາດໄວ້ອາໄລຢ່າງເປັນທາງການເປັນເວລາ 3 ມື້ ໂດຍຮຽກຮ້ອງໃຫ້ຊາວເຄັນຢາ ພາກັນປົກປ້ອງຄຸ້ມຄອງ “ສັນຕິພາບແລະສະຖຽນລະພາບຂອງປະເທດຊາດ ເອົາໄວ້.”
