ຊາວເຄັນຢາ ກຳລັງໄວ້ອາໄລ ແກ່ພວກເສຍຊີວິດ ຫຼັງຈາກ
ການບຸກໂຈມຕີ ໂດຍພວກຫົວຮຸນແຮງ al-Shabab ຕະຫລອດ
ມື້ ຢູ່ທີ່ມະຫາວິທະຍາໄລແຫ່ງນຶ່ງ ທາງພາກຕາເວັນອອກ
ຂອງປະເທດ ໃນວັນພະຫັດວານນີ້ ທີ່ໄດ້ເຮັດໃຫ້ 147 ຄົນ
ເສຍຊີວິດ ພ້ອມກັນກັບ ພວກທຳການໂຈມຕີ 4 ຄົນ.
ລັດຖະບານ ເຄັນຢາ ສະເໜີໃຫ້ລາງວັນເງິນ 220,000 ດອນລາ
ສຳຫລັບສະມາຊິກ al-Shabab ອີກຄົນນຶ່ງ ທີ່ມີສ່ວນກ່ຽວພັນ
ກັບການໂຈມຕີ ຄື ທ້າວ Mohammed Mohamud Kuno ຜູ້ທີ່
ມີຊື່ ຢູ່ໃນບັນຊີຕິດຕາມສິ້ງຊອມເບິ່ງ ຂອງລັດຖະບານແລ້ວນັ້ນ. ຜູ້ກ່ຽວໄດ້ຖືກສົງໄສວ່າ ເປັນຫົວໜ້າດ້ານປະຕິບັດການພາຍນອກ ຕໍ່ຕ້ານເຄັນຢາ ຂອງກຸ່ມ al-Shabab. ຜູ້ກ່ຽວຍັງມີຊື່ວ່າ Gamadhere ຫຼື Dulyadayna.
ທາງການຕ້ອງການໂຕ ທ້າວ Kuno ເພື່ອສອບປາກຄຳ ກ່ຽວກັບການໂຈມຕີ ຢູ່ທີ່ ມະຫາວິທະຍາໄລ Garissa ບ່ອນທີ່ພວກໂຈມຕີ ໄດ້ບຸກເຂົ້າໄປໃນວິທະຍາເຂດ ກ່ອນຟ້າແຈ້ງໃນວັນພະຫັດວານນີ້ ແລະ ໄດ້ເປີດສາກຍິງໃສ່ນັກສຶກສາ. ກອງກຳລັງຮັກສາຄວາມປອດໄພ ໄດ້ຕໍ່ສູ້ກັບພວກຫົວຮຸນແຮງ ເປັນເວລາ 15 ຊົ່ວໂມງ ແລະ ໄດ້ຊ່ວຍເຫຼືອພວກນັກຮຽນ ຫຼາຍກວ່າ 500 ຄົນອອກມາໄດ້ ກ່ອນທີ່ຈະຍິງສັງຫານພວກໂຈມຕີ.
ກຸ່ມ Al-Shabab ກ່າວວ່າ ການໂຈມຕີນັ້ນ ແມ່ນເປັນການແກ້ແຄ້ນ ຕໍ່ການປະຕິບັດງານຂອງກອງທະຫານເຄັນຢາ ຢູ່ໃນ Somalia ປະເທດເພື່ອບ້ານ ຊຶ່ງເປັນຖານທີ່ໝັ້ນຂອງພວກກຸ່ມຫົວຮຸນແຮງອິສລາມ ດັ່ງກ່າວ.
ປະທານາທິບໍດີ ໂຊມາເລຍ ທ່ານ Hassan Sheikh Mohamud ໄດ້ຮຽກຮ້ອງໃຫ້ມີການ
ຮ່ວມມື ດ້ານຄວາມໝັ້ນຄົງ ກັບ ເຄັນຢາ ຫຼາຍຂຶ້ນຕື່ມອີກ ໂດຍສະແດງຄວາມເສົ້າສະຫລົດໃຈ ແລະ ເອີນການໂຈມຕີດັ່ງກ່າວວ່າ “ປ່າເຖື່ອນ.” ທ່ານ ກ່າວໃນວັນສຸກມື້ນີ້ ວ່າ ການສັງຫານນັ້ນ ສະແດງໃຫ້ເຫັນເຖິງຄວາມຈຳເປັນທີ່ຈະຕ້ອງໄດ້ລົບລ້າງ “ໄພຄຸກຄາມ” ຂອງກຸ່ມ al-Shabab ໃຫ້ໝົດສິ້ນໄປຈາກຂົງເຂດນີ້.
