ເຈົ້າໜ້າທີ່ເຄັນຢາກ່າວວ່າ ຈໍານວນຜູ້ເສຍຊີວິດໃນເຫດທໍ່ນໍ້າມັນລະເບີດຂະໜາດແຮງ ແລະໄຟໄໝ້ທີ່ຕິດຕາມມາ ໃນນະຄອນຫລວງໄນໂຣບີນັ້ນ ຍັງສືບຕໍ່ເພີ່ມຂຶ້ນ ໂດຍໄດ້ມີຢ່າງນ້ອຍ 82 ຄົນແລ້ວທີ່ຕາຍໄປໃນໄຟ ແລະບາດເຈັບຫລາຍກວ່າ 100 ຄົນ. ບັນດາຊາວເມືອງໄດ້ສົມທົບກັບພວກເຈົ້າໜ້າທີ່ທ້ອງຖິ່ນ ສືບຕໍ່ຊອກຫາພວກໄດ້ຮັບເຄາະຕື່ມອີກ ໃນວັນອັງຄານມື້ນີ້.
ທາງການເຄັນຢາກ່າວວ່າ ເຫດການຮ້າຍດັ່ງກ່າວໄດ້ເລີ້ມຂຶ້ນໃນເຊົ້າວັນຈັນວານນີ້ ຫຼັງຈາກເຄື່ອງອັດທໍ່ນໍ້າມັນລະເບີດຂຶ້ນ ເຮັດໃຫ້ນໍ້າມັນຮົ່ວໄຫລ ອອກມາໃສ່ທໍ່ລະບາຍນໍ້າເສຍໃນຄຸ້ມຄົນທຸກ Sinai ທີ່ມີປະຊາຊົນອາໄສຢູ່ຢ່າງໜາແໜ້ນນັ້ນ ຊຶ່ງພວກປະຊາຊົນພາກັນຟ້າວແລ່ນໄປຕັກເອົານໍ້າມັນທີ່ຮົ່ວໄຫລອອກມາ.
ທ່ານ Kiraitu Murungi ລັດຖະມົນຕີກະຊວງພະລັງງານເຄັນຢາ ກ່າວຕໍ່ວີໂອເອວ່າ
ປະຊາຊົນບາງຄົນຢູ່ໃນເຂດດັ່ງກ່າວກໍາລັງຄົວກິນຢູ່ແລະອີກບາງຄົນກໍກໍາລັງສູບຢາ ຊຶ່ງ
ເບິ່ງຄືວ່າ ເປັນຕົ້ນເຫດທີ່ພາໃຫ້ເກີດໄຟລຸກໄໝ້ຂຶ້ນ ແລະລຸກລາມໄປສູ່ບໍລິເວນທີ່ກວ້າງ ໃຫຍ່ນັ້ນ.
ໄຟໄໝ້ໄດ້ເຜົາຜູ້ຄົນເປັນເຖົ່າຖ່ານໃນຖະໜົນຫົນທາງສາຍຕ່າງໆ ແລະຢູ່ໃນຫ້ວຍນໍ້າສາຍນຶ່ງທີ່ຢູ່ໃກ້ໆ ບ່ອນທີ່ຫລາຍໆຄົນພາກັນໂຕນລົງນໍ້າເພື່ອພະຍາຍາມມອດໄຟທີ່ກໍາລັງໄໝ້ເຄື່ອງນຸ່ງຫົ່ມແລະຜົມຂອງເຂົາເຈົ້ານັ້ນ. ແປວໄຟຈາກແຮງລະເບີດ ຍັງໄດ້ໄໝ້ພວກຕຶກອາຄານແລະຕູບຈໍານວນນຶ່ງ ທີ່ຕັ້ງຢູ່ໃກ້ໆນັ້ນ.
