ຜູ້ສະໝັກເປັນຮອງປະທານາທິບໍດີຂອງພັກຣີພັບບລີກັນ ທ່ານ Mike Pence ແລະຜູ້ສະ ໝັກ ເປັນຮອງປະທານາທິບໍດີພັກເດໂມແຄຣັດ ທ່ານ Tim Kaine ໄດ້ໃຊ້ເວລາໃນແລງວັນອັງຄານ ໂຈມຕີຂໍ້ສະເໜີ ກ່ຽວກັບນະໂຍບາຍຂອງກັນແລະກັນ ຕະຫຼອດທັງປະຫວັດ ຂອງຜູ້ສະໝັກເປັນປະທານາທິບໍດີ ຮ່ວມກັບພວກທ່ານ ຄືທ່ານ Donald Trump ແລະທ່ານນາງ Hillary Clinton.
ທ່ານ Pence ແລະທ່ານ Kaine ຊຶ່ງໄດ້ປະເຊີນໜ້າ ຢູ່ໃນການໂຕ້ວາທີພຽງຄັ້ງດຽວເທົ່ານັ້ນກ່ອນການເລືອກຕັ້ງໃນເດືອນໜ້າໄດ້ລົບກວນຊຶ່ງກັນແລະກັນຢູ່ເລື້ອຍໆໃນຂະນະທີ່ພວກທ່ານສົນທະນາກັນກ່ຽວກັບເລື້ອງອາວຸດນິວເຄລຍ ສະຖານະການໃນຊີເຣຍ ແລະການປະຕິຮູບລະບົບຍຸຕິທຳຢູ່ພາຍໃນສະຫະລັດ.
ທ່ານ Pence ເອີ້ນທ່ານນາງ Clinton ວ່າ ເປັນສະຖາປະນິກນະໂຍບາຍການ ຕ່າງປະເທດຂອງປະທານາທິບໍດີບາຣັກ ໂອບາມາທີ່ທ່ານກ່າວວ່າ ເຮັດໃຫ້ພາກ ຕາເວັນອອກກາງ ເກີດຄວາມວຸ້ນວາຍ ຈົນຄວບຄຸມບໍ່ໄດ້. ທ່ານໄດ້ຖິ້ມໂທດໃສ່ທ່ານນາງ Clinton ທີ່ໄດ້ປ່ອຍໃຫ້ກຸ່ມລັດອິສລາມ ມີອິດທິພົນເພີ້ມຂຶ້ນ ແລະໃນອັນທີ່ທ່ານເອີ້ນວ່າ ການມີຄວາມກ້າຫານໃໝ່ຫຼາຍຂຶ້ນຂອງຣັດເຊຍ.
ໃນຂະນະດຽວກັນ ທ່ານ Kaine ກ່າວວ່າ ທ່ານ Trump ເປັນຄົນເຫັນແກ່ໂຕ ແລະໄດ້ກ່າວຫາທ່ານ Trump ວ່າ ມີການພົວພັນທາງດ້ານທຸລະກິດກັບຣັດເຊຍ ທີ່ຜູ້ກ່ຽວບໍ່ຍອມເປີດເຜີຍໃຫ້ຊາບ.
ຜູ້ສະໝັກເປັນຮອງປະທານາທິບໍດີທັງສອງຕ່າງກໍໄດ້ເຫັນພ້ອມນຳກັນເຖິງຄວາມ ຈຳເປັນທີ່ຈະຕ້ອງໄດ້ດຳເນີນການສິ່ງໃດສິ່ງນຶ່ງ ເພື່ອປົກປ້ອງພົນລະເຮືອນຢູ່ໃນ ພາກເໜືອຂອງຊີເຣຍ. ທ່ານ Pence ການດຳເນີນຄວາມພະຍາຍາມຄວນຈະ ຮວມທັງການສ້າງຕັ້ງເຂດຫ້າມບິນ ແລະຖ້າຫາກຣັດເຊຍຍັງສືບຕໍ່ມີສ່ວນພົວພັນ ນຳການໂຈມຕີເມືອງງ Aleppo ຫລັງຈາກນັ້ນ ກຳລັງສະຫະລັດກໍຄວນຈະໂຈມ
ຕີເປົ້າໝາຍທາງທະຫານຂອງຊີເຣຍ ເພື່ອເປັນການຕອບໂຕ້.
ຜູ້ສະໝັກທັງສອງ ຍັງໄດ້ເຫັນພ້ອມນຳກັນ ເຖິງຄວາມຈຳເປັນໃນການປະຕິບັດງານຂອງຕຳຫຼວດແບບມີປະຊາຄົມເຂົ້າຮ່ວມ ແຕ່ບໍ່ແມ່ນໃນການປະຕິຮູບລະບົບຍຸຕິທຳ.
ທ່ານ Pence ໄດ້ສະເໜີໃຫ້ຢຸດເຊົາ ການກວດເພື່ອຄົ້ນຫາອາວຸດ ທີ່ເອີ້ນວ່າ stop-and- frisk ແລະກ່າວວ່າ ຊາວອາເມຣິກັນບໍ່ຄວນທີ່ຈະຕັ້ງຂໍ້ສັນນິດຖານ ໃນທາງທີ່ບໍ່ດີກ່ຽວກັບຕຳຫຼວດ ເວລາບຸກຄົນໃດນຶ່ງ ຖືກຍິງຕາຍ ໂດຍຕຳຫລວດ ໃນຂະນະທີ່ທ່ານ Kaine ໄດ້ກ່າວຊົມເຊີຍຂໍ້ສະເໜີການຄວບຄຸມອາວຸດ ແລະປະຕິຮູບເລື້ອງສຸຂະພາບຈິດຂອງທ່ານນາງ Clinton.
