ທ່ານ Tim Kaine ທີ່ສັງກັດພັກເດໂມແຄຣັດ ແລະ ທ່ານ Mike Pence ທີ່ສັງກັດພັກ ຣີພັບບລິກັນ ຈະມີໂອກາດຊົ່ວລະຍະນຶ່ງຢູ່ຕໍ່ໜ້າແສງໄຟ ໃນແລງວັນອັງຄານມື້ນີ້ ທີ່ເມືອງ Farmville ລັດ Virginia ຊຶ່ງເປັນເຈົ້າພາບຈັດການໂຕ້ວາທີຂອງຮອງປະທານາທິບໍດີ ປີ 2016.
ການປະເຊີນໜ້າດັ່ງກ່າວ ມີຂຶ້ນນຶ່ງອາທິດຫລັງຈາກການໂຕ້ວາທີຂອງຜູ້ສະໝັກເປັນປະ ທານາທິບໍດີເທື່ອທຳອິດ ຂອງຈຳນວນທັງໝົດສາມເທື່ອ ລະຫວ່າງຜູ້ສະໝັກພັກເດໂມ
ແຄຣັດທ່ານນາງ Hillary Clinton ແລະພັກຣີພັບບລິກັນ ທ່ານ Donald Trump ຊຶ່ງເປັນການໂຕ້ວາທີ ທີ່ໄດ້ສ້າງຄວາມຕື່ນເຕັ້ນໃຫ້ແກ່ພັກເດໂມແຄຣັດ ແຕ່ສ້າງຄວາມຜິດ ຫວັງໃຫ້ແກ່ພັກຣີພັບບລິກັນຈຳນວນນຶ່ງ. ການຢັ່ງ ສຽງຫລັງຈາກການໂຕ້ວາທີແລ້ວ ໄດ້ເຮັດໃຫ້ທ່ານນາງ Clinton ມີຄະແນນສູງ ຂຶ້ນ ແລະພາໃຫ້ເກີດຄຳຖາມໃໝ່ ກ່ຽວກັບສະພາບອາລົມຂອງທ່ານ Trump ໂດຍສະເພາະ ຫລັງຈາກໄດ້ມີການສົ່ງຂໍ້ຄວາມ ຜ່ານທາງ Twitter ຫຼາຍຄັ້ງທີ່ແນໃສ່ອະດີດນາງງາມຈັກກະວານ Alicia Machado ທີ່ໄດ້ຕົກເປັນເປົ້າຍ້ອນ ວ່າມີນໍ້າໜັກສູງຂຶ້ນ.
ການໂຕ້ວາເທື່ອທຳອິດລະຫວ່າງທ່ານນາງ Clinton ແລະທ່ານ Trump ໄດ້ດຶງດູດເອົາຜູ້ຊົມໂທລະພາບຫຼາຍເປັນປະຫວັດການ ຄືຫລາຍກວ່າ 80 ລ້ານຄົນ. ການໂຕ້ວາທີຂອງຜູ້ສະໝັກເປັນຮອງປະທານາທິບໍດີ ລະຫວ່າງ ທ່ານ Kaine ແລະທ່ານ Pence ຈະດືງດູດຜູ້ຊົມໜ້ອຍກວ່າ ຖ້າຫາກປະຫວັດສາດຫາກຖືກຕ້ອງ. ການໂຕ້ວາທີໃນປີ 2008 ລະຫວ່າງ ຜູ້ສະໝັກຂອງພັກເດໂມແຄຣັດ ທ່ານ Joe Biden ແລະຜູ້ສະໝັກພັກຣີພັບບລິກັນ ທ່ານນາງ Sarah Paling ໄດ້ດຶງດູດເອົາຜູ້ຊົມເກືອບ 70 ລ້ານຄົນ ຄືມີຜູ້ຊົມຫລາຍທີ່ສຸດ ສຳ ລັບການໂຕ້ວາທີຮອງປະທານາທິບໍດີໃດໆໃນປະຫວັດສາດ.
ທ່ານ Pence ຜູ້ປົກຄອງລັດ Indiana ຫຍຸ້ງຍາກຢູ່ກັບການການໂຄສະນາຫາສຽງ ແຕ່ ວ່າມັກຈະຢູ່ໃນເງົາຂອງທ່ານ Trump. ທ່ານ Pence ໄດ້ຖືກຮ້ອງຂໍຢູ່ເປັນປະຈຳໃຫ້ປ້ອງ ກັນໃນການກ່າວອ້າງແລະຄຳຖະແຫລງທີ່ເປັນບັນຫາໂຕ້ແຍ້ງ ຈຳນວນນຶ່ງ ຂອງທ່ານ Trump ແຕ່ໃນຂະນະດຽວກັນ ທ່ານກໍຍັງພະຍາຍາມທີ່ ວາດພາບພົດຂອງທ່ານເອງ ດັ່ງທີ່ທ່ານໄດ້ກະທຳໃນການໂຄສະນາຫາສຽງຂອງທ່ານຫວ່າງມໍ່ໆມານີ້ ຢູ່ທີ່ເມືອງ Mesa ລັດ Arizona.
“ຂ້າພະເຈົ້າໃຫ້ຄຳໝັ້ນສັນຍາ ແກ່ພວກທ່ານວ່າ ທີມຂອງ ທ່ານ Trump ແລະທ່ານ Pence ຈະເຮັດວຽກຢ່າງສຸດອົກສຸດໃຈ ທຸກໆມື້ຂອງສັບປະດາ ຈົນກວ່າວ່າພວກເຮົາ ຈະສາມາດຟື້ນຄວາມຝັນຂອງອາເມຣິກັນ ໃຫ້ແກ່ຊາວອາເມຣິກັນທຸກໆຄົນ ບໍ່ສຳຄັນວ່າຈະມີຜິວພັນ ຫລືເຊື່ອຖື ຫລືສີ ຫລືວ່າເພດໃດ. ພວກເຮົາ ຈະນຳເອົາຄວາມຝັນຂອງອາເມຣິກັນກັບມາມີຊີວິດອີກ.
