ກະຊວງຍຸຕິທຳສະຫະລັດ ລະບຸວ່າຕົນກຳລັງປະຕິບັດງານຮ່ວມກັບອົງການສັນຕິບານຂອງລັດຖະບານກາງ ຫຼື FBI ເພື່ອທຳການສືບສວນສອບສວນຄືນໃໝ່ ກ່ຽວກັບເລື້ອງ emails ຂອງທ່ານນາງ Hillary Clinton “ໃຫ້ໄວເທົ່າທີ່ຈະໄວໄດ້.”
ເຈົ້າໜ້າທີ່ອະວຸໂສກະຊວງຍຸຕິທຳ ທ່ານ Peter Kadzik ໄດ້ສົ່ງຈົດໝາຍຄ້ຳປະກັນ ໃນວັນຈັນວານນີ້ ໄປຫາສະມາຊິກສະພາສູງພັກ Democrats ທີ່ສຳຄັນໆຫຼາຍທ່ານຊຶ່ງມີຄວາມໂກດແຄ້ນ ຕໍ່ການທີ່ອົງການ FBI ໄດ້ປະກາດ ກ່ຽວກັບການສືບສວນຄືນໃໝ່ ໃນໄລຍະ ໃກ້ໆ ກັບການເລືອກຕັ້ງປະທານາທິບໍດີ.
ທ່ານ Kadzik ໄດ້ຂຽນວ່າ “ພວກເຮົາຄ້ຳປະກັນພວກທ່ານວ່າ ທາງກະຊວງຈະສືບຕໍ່ປະຕິ ບັດງານຢ່າງໃກ້ຊິດກັບອົງການ FBI ແລະຮ່ວມກັນແລ້ວ ພວກເຮົາຈະນຳໃຊ້ທຸກອົງປະກອບທີ່ຈຳເປັນ ແລະເອົາທຸກໆບາດກ້າວຢ່າງວ່ອງໄວ ເທົ່າທີ່ຈະທຳໄດ້.” ຊຶ່ງທ່ານຍັງກ່າວຕື່ມອີກວ່າ “ພວກເຮົາຫວັງວ່າ ຂໍ້ມູນນີ້ຈະເປັນປະໂຫຍດ.”
ຜູ້ອຳນວຍການອົງການ FBI ທ່ານ James Comey ໄດ້ແຈ້ງລັດສະຖະສະພາຊາບໃນວັນສຸກຜ່ານມານີ້ວ່າ ບັນດາເຈົ້າໜ້າທີ່ປະຕິບັດກົດໝາຍ ຈະກວດສອບເບິ່ງ email ຈຸໃໝ່ຂອງທ່ານນາງ Clinton ທີ່ໄດ້ຄົ້ນພົບໃນເຄື່ອງຄອມພິວເຕີ ໃນລະຫວ່າງທີ່ໄດ້ມີການສືບສວນ ອະດີດສະມາຊິກສະພາຕ່ຳ Anthony Weiner. ຜູ້ກ່ຽວເປັນສາມີຂອງທ່ານນາງ Huma Abedin ທີ່ເປັນຜູ້ຊ່ອຍຄົນໃກ້ຊິດທ່ານນາງ Clinton.
ທ່ານ Weiner ໄດ້ຖືກກ່າວຫາ ໄດ້ແລກປ່ຽນ emails ຂໍ້ຄວາມລາມົກທາງເພດກັບເດັກຍິງອາຍຸ 15 ປີ. ທ່ານ Weiner ແລະທ່ານນາງ Abedin ອາດຈະໃຊ້ເຄື່ອງ ຄອມພິວເຕີນີ້ ຮ່ວມກັນ.
ທ່ານ Comey ໄດ້ກ່າວວ່າ ການສືບສວນສອບສວນ ໄດ້ຄົ້ນພົບພວກ emails ກ່ອນໜ້ານີ້
ທີ່ຖືກສົ່ງແລະຮັບໂດຍທ່ານນາງ Clinton ໃນຊ່ວງທີ່ທ່ານດຳລົງຕຳແໜ່ງເປັນລັດຖະມົນຕີການຕ່າງປະເທດ.
ທ່ານນາງ Clinton ກັບພັກ Democrats ແມ່ນດີໃຈ ເວລາທ່ານ Comey ໄດ້ຍຸຕິ ການສືບສວນສອບສວນໃນເດືອນກໍລະກົດ ໂດຍກ່າວວ່າທ່ານນາງ Clinton ລະຫຼວມ
ແລະບໍ່ເອົາໃຈໃສ່ ໃນການເກັບຮັກສາ emails ຂອງທ່ານນາງ ແຕ່ທ່ານນາງບໍ່ໄດ້ກະທຳຜິດກົດໝາຍແຕ່ຢ່າງໃດເລີຍ.
ຈົນເທົ່າເຖິງປະຈຸບັນນີ້ ທ່ານ Comey ຍັງບໍ່ໄດ້ໃຫ້ຂໍ້ມູນໃດໆເພີ່ມຕື່ມ ກ່ຽວກັບອັນທີ່ເຈົ້າໜ້າທີ່ສອບສວນໄດ້ພົບເຫັນ ທີ່ພາໃຫ້ມີການສືບສວນຄືນໃໝ່ ແລະໄລຍະເວລາທີ່ໃກ້ກັບການລົງຄະແນນເລືອກຕັ້ງ ຊຶ່ງພາໃຫ້ສະມາຊິກ Democrats ແລະພັກພັກ Republican ຫຼາຍໆຄົນ ພາກັນເກົາຫົວຂອງພວກເຂົາເຈົ້າ ແລະງຸນງົງ ກ່ຽວກັບວ່າ ມີຫຍັງເກີດຂຶຶ້ນແທ້.
ອ່ານຂ່າວນີ້ເພີ້ມຕື່ມເປັນພາສາອັງກິດ
