ລິ້ງ ສຳຫລັບເຂົ້າຫາ

ກະຊວງຍຸຕິທຳ ທີ່ປາບປາມ ການເປີດເຜີຍ ຂໍ້ມູນລັບ ອາດຈະແນເປົ້າ ໃສ່ພວກນັກຂ່າວ


ັລັດຖະມົນຕີ ກະຊວງຍຸຕິທຳ ສະຫະລັດ ທ່ານ Jeff Sessions ພ້ອມດ້ວຍຫົວໜ້າຕໍ່ຕ້ານການສືບລັບແລະສູນກາງຄວາມໝັ້ນຄົງ ທ່ານ William Evanina (ຊ້າຍ) ແລະຫົວໜ້າ ອົງການສືບລັບແຫ່ງຊາດ ທ່ານ Dan Coats ພວມຖະແຫຼງຂ່າວ ທີ່ກະຊວງຍຸຕິທຳ ໃນນະຄອນວໍຊິງຕັນ. (4 ສິງຫາ 2017)

ລັດຖະມົນຕີ​ກະຊວງ​ຍຸຕິ​ທຳ​ຂອງ​ສະຫະລັດ ທ່ານ Jeff Sessions ​ເຕືອນ​ພວກ​ນັກ​ຂ່າວ​ ​ໃນ​ຂະນະ​ທີ່​ທ່ານ​ເລີ້ມລົງມືປາບ​ປາມ​ ພວກ​ທີ່​ລັກ​ເປີດ​ເຜີຍ​ຂໍ້​ມູນ​ລັບ ທີ່​ໄດ້​ມີ​ຂຶ້ນຢ່າງ​ຕໍ່​ເນື່ອງ ນັບ​ແຕ່​ລັດຖະບານ​ທ່ານ​ທຣຳ ​ເຂົ້າຮັບ​ຕຳ​ແໜ່​ງ​ໃນ​ເດືອນ​ມັງກອນ ຕົ້ນປີນີ້.

ທ່ານ​ Sessions ກ່າວ​ໃນ​ວັນ​ສຸກ​ວານ​ນີ້ວ່າ “ພວກ​ເຮົາ​ໃຫ້​ການ​ເຄົາລົບ​ຕໍ່​ຄວາມ​ສຳຄັນ ກ່ຽວ​ກັບ​ບົດບາດ​ຂອງ​ອົ​ງການ​ຂ່າວ ​ແລະ​ຈະ​ໃຫ້ການ​ເຄົາລົບ​ແກ່​ພວກ​ເຂົາ ​ແຕ່​ບໍ່​ແມ່ນ​ວ່າ ​ແບບ​ບໍ່​ມີ​ຂີດ​ຈຳກັດ” ​ໃນ​ຂະນະ​ທີ່​ທ່ານປະກາດ​ວ່າ ກະຊວງ​ຍຸຕິ​ທຳ​ ໄດ້ສືບສວນ ກ່ຽວ​ກັບ​ການ​ຮົ່ວ​ໄຫລ​ຂອງ​ຂໍ້​ມູນ ​ເພີ່ມຂຶ້ນ​ເປັນຫຼາຍກວ່າ​ສາມ​ເທົ່າ ​ໃນ​ປີນີ້.

ທ່ານ Sessions ​ເວົ້າວ່າ ກະຊວງ​ຍຸຕິ​ທຳ ກຳລັງ​ທົບ​ທວນ​ເບິ່ງ​ກົດ​ລະບຽບ ກ່ຽວ​ກັບ​ການ​ອອກ​ໝາຍ​ສານ​ເພື່ອ​ກວດເບິ່ງບັນທຶກ​ຂອງ​ພວກ​ນັກ​ຂ່າວ ​ໃນ​ຖານະ​ທີ່​ເປັນ​ພາກສ່ວນ​ນຶ່ງ​ຂອງ​ການ​ດຳ​ເນີນ​ຄວາມ​ພະຍາຍາມ​ເພີ່ມ​ຕື່ມ ​ເພື່ອ​ສືບ​ສວນ​ແລະ​ດຳ​ເນີນ​ຄະດີ​ພວກ​ທີ່​ເປີດ​ເຜີຍຂໍ້​ມູນ​ຄວາມ​ລັບ.

​ກົດ​ລະບຽບ​ ທີ່​ເລີ້ມມີ​ການຈັດຕັ້ງປະຕິບັດ​ໂດຍ​ລັດຖະບານ​ທ່ານ​ໂອ​ບາ​ມາ ​ໃນ​ປີ 2015 ນັ້ນ ​ເຮັດ​ໃຫ້​ມີ​ຄວາມ​ຫຍຸ້ງຍາກ​ຕື່ມ​ຂຶ້ນທີ່​ກະຊວງ​ຍຸຕິ​ທຳ ຈະ​ອອກ​ໝາຍ​ສານ ​ເພື່ອ​ນຳ​ເອົາບັນທຶກ​ໂທລະສັບ​ແລະ​ອີ​ແມ​ລຂອງ​ພວກ​ນັກ​ຂ່າວ ມາສະ​ເໜີ​ຕໍ່​ສານ ​ໃນ​ການ​ສືບສວນ​ກ່ຽວ​ກັບ​ການ​ຮົ່ວ​ໄຫລ​ຂອງ​ຄວາມ​ລັບ​ນັ້ນ.

​ໃນ​ຂະນະ​ທີ່​ກົດ​ລະບຽບ ບໍ່​ໄດ້​ມີ​ຜົນບັງຄັບ​ທາງ​ກົດໝາຍ ພວກ​ສະໜັບ​ສະໜຸນ​ສິດ​ເສລີ ພາບ​ໃນ​ດ້ານ​ການ​ຂ່າວ ຈຶ່ງ​ມອງ​ເຫັນ​ວ່າ ມັນ​ມີ​ຄວາມ​ສຳຄັນ​ຕໍ່​ຄວາມ​ສາມາດ​ ​ໃນ​ການ​ຕິດ​ຕໍ່​ໂອ້​ລົມ​ຂອງ​ພວກ​ນັກ​ຂ່າວ ກັບ​ແຫຼ່ງຂ່າວ​ທີ່​ໜ້າ​ເຊື່ອ​ຖື.

ອົງການ​ຄຸ້ມ​ຄອງ​ນັກ​ຂ່າວ CPJ ​ທີ່​ມີ​ສຳນັກງານ ​ຢູ່​ນະຄອນ​ນິວຢອກ ກ່າວ​ວ່າ ການປັບ​ປ່ຽນໃນ​ກົດ​ລະບຽບ​ ກ່ຽວ​ກັບ​ການ​ອອກ ​ໝາຍ​ສານ ຈະ​ມີ​ຜ່ອນ​ກະທົບ​ຢ່າງ​ຮ້າຍ​ແຮງ ​ຕໍ່​ສິດ​ເສລີພາບ​ໃນ​ດ້ານ​ການ​ຂ່າວ.

ທ່ານ Alex Ellerbeck ນັກຄົ້ນຄວ້າ​ຂອງ​ອົງການ​ຄຸ້ມ​ຄອງ​ນັກ​ຂ່າວ CPJ ກ່າວ​ຢູ່​ໃນ​ຖະ​ແຫຼງ ການ​ສະ​ບັນ​ນຶ່ງ​ວ່າ “ການ​ຫຼຸດຜ່ອນ ​ໃນ​ການ​ປົກ​ປ້ອງ​ແບບ​ຈຳກັດ ​ໃນ​ການ​ສື່ສານ​ໂອ້​ລົມ ລະຫວ່າງ​ພວກ​ນັກ​ຂ່າວ ​ແລະແຫຼ່ງຂ່າວ​ຂອງ​ພວກ​ເຂົາ​ເຈົ້າ​ແລ້ວ ຈະ​ເຮັດ​ໃຫ້ຄວາມ​ສາມາດ​ ຂອງສາທາລະນະ​ຊົນ ມີ​ໜ້ອຍ​ລົງ ​ເພື່ອ​ບັງຄັບ​ໃຫ້​ພວກ​ຜູ້ນຳ​ທີ່​ຖືກ​ເລືອກ ​ເປັນ​ຜູ້​ຮັບຜິດຊອບ ​ແລະ​ເຮັດ​ໃຫ້​ມາດຕະຖານ​ທີ່​ໄດ້​ມາ​ດ້ວຍ​ຄວາມ​ຍາກ​ລຳບາກ​ນັ້ນ ອ່ອນ​ແອ​ລົງ ​ໃນ​ການ​ປົກ​ປ້ອງ​ແຫຼ່ງຂ່າວ ຢູ່​ໃນ​ທົ່ວ​ໂລກ.”

ກະຊວງ​ຍຸຕິ​ທຳ​ໄດ້​ດັດ​ແປງ​ກົດ​ລະບຽບ​ຂອງ​ຕົນ ​ໃນ​ປີ 2015 ຫລັງ​ຈາກ​ມີ​ການ​ເປີດ​ເຜີຍ​ວ່າ ຕົນ​ໄດ້​ຮັບ​ບັນທຶກ​ໂທລະສັບ​ຂອງ​ນັກ​ຂ່າວ ອົງການ​ຂ່າວ​ເອພີມາ​ຢ່າງ​ລັບໆ ​ແລະ​ໄດ້​ລະບຸ​ນັກ​ຂ່າວ​ຂອງ​ໂທລະພາບ Fox News ວ່າ ​ເປັນ​ຜູ້​ສົມຮູ​ຮ່ວມ​ຄິດ ​ໃນ​ການ​ສືບສວນ​ກ່ຽວ​ກັບ​ການ​ຮົ່ວ​ໄຫຼຂອງ​ຂໍ້​ມູນ ອີກ​ຄັ້ງນຶ່ງ​ຕ່າງຫາກ​ນັ້ນ.

ນະ​ໂຍບາຍ​ທີ່​ໄດ້​ມີ​ການ​ປ່ຽນ​ແປງ​ໃໝ່ ​ແມ່ນ​ຮຽກຮ້ອງ​ໃຫ້​ເພີ່ມ​ ລະດັບ​ໃນ​ການ​ອະນຸມັດຕື່ມ ກ່ອນ​ທີ່ຈະ​ອອກ​ໝາຍ​ສານ​ຮຽກ​ຕົວ​ພວກ​ນັກ​ຂ່າວ​.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG