ໃນສານທີ່ເຕັມໄປດ້ວຍຜູ້ຄົນຢູ່ນະຄອນ Istanbul ປະເທດເທີກີ ໃນການດຳເນີນຄະດີ
ພວກນັກຂ່າວ 17 ຄົນທີ່ພົວພັນກັບການກໍ່ລັດຖະປະຫານທີ່ປະສົບກັບຄວາມລົ້ມແຫຼວ
ໃນເດືອນກໍລະກົດປີກາຍນີ້ ແມ່ນໄດ້ເລີ່ມຂຶ້ນໃນວັນຈັນວານນີ້ ຊຶ່ງທັງໝົດໄດ້ປະເຊີນໜ້າ
ກັບໂທດໜັກທີ່ຮວມທັງ ການຕິດຄຸກຕະຫຼອດຊີວິດນຳ ຖ້າຫາກຖືກພົບເຫັນວ່າ ມີຄວາມຜິດ.
ບັນດາໄອຍະການກ່າວຫາພວກນັກຂ່າວວ່າ ຢູ່ໃນກຸ່ມຂອງພວກທີ່ຕິດຕາມທ່ານ Fethu-
llah Gulen ນັກສອນສາສະໜາ ທີ່ອາໄສຢູ່ໃນສະຫະລັດ ຜູ້ຊຶ່ງລັດຖະບານເທີກີ
ຖິ້ມໂທດໃສ່ວ່າ ເປັນຜູ້ພະຍາຍາມກໍ່ລັດຖະປະຫານນັ້ນ.
ທ່ານນາງ Nazli Ilicak ແມ່ນເປັນນັກຂຽນແຖວໜ້າທີ່ໄດ້ປະຕິເສດຕໍ່ຂໍ້ກ່າວຫາທີ່ວ່ານີ້
ໂດຍ ກ່າວຕໍ່ສານວ່າ ທ່ານນາງແມ່ນເປັນຜູ້ສະໜັບສະໜຸນ ປະທານາທິບໍດີ Recep
Tayyip Erdogan ກ່ອນທີ່ທ່ານຈະຂຶ້ນມາກຳອຳນາດ ແລະໃຊ້ຊີວິດຂອງທ່ານນາງ
ຄັດຄ້ານຕໍ່ການກໍ່ລັດຖະປະຫານ ພ້ອມທັງການຊີ້ໃຫ້ເຫັນວ່າ ພໍ່ຂອງທ່ານນາງ ກໍແມ່ນ
ລັດຖະມົນຕີຂັ້ນອະວຸໂສ ຜູ້ຊຶ່ງໄດ້ຕິດຄຸກ ຫຼັງຈາກທີ່ໄດ້ເກີດການກໍ່ລັດຖະປະຫານ
ແລະຍຶດອຳນາດໂດຍພວກທະຫານໃນຊຸມປີ 1960.
ທ່ານນາງ Ilicak ໄວ 74 ປີ ພ້ອມທັງທ່ານ Mehmet ແລະທ່ານ Ahmet Altan ແມ່ນ
ພວກທີ່ຢູ່ໃນກຸ່ມນັກຂຽນແລະນັກຂ່າວທີ່ເປັນທີ່ຮູ້ຈັກກັນດີ ໃນແວດວົງສັງຄົມ ທີ່ປະເຊີນ
ໜ້າກັບການຖືກລົງໂທດ ຊຶ່ງທັງສາມທ່ານ ໄດ້ຖືກຄຸມຂັງມາເປັນເວລາຫຼາຍໆເດືອນ
ກ່ອນການດຳເນີນຄະດີ.
ນຶ່ງໃນສາມຊົ່ວໂມງທຳອິດ ຂອງການດຳເນີນຄະດີໃນວັນຈັນວານນີ້ ແມ່ນການອ່ານ
ລາຍງານ 200 ໜ້າ ກ່ຽວກັບເຫດຜົນໃນການຖືກກ່າວຫາ. ສ່ວນໃຫຍ່ຂອງຫຼັກຖານ
ແມ່ນບໍ່ໄດ້ອ້າງເຖິງທີ່ມາໃນການປະພຶດປະຕິບັດຂອງພວກນັກຂ່າວເລີຍ ແຕ່ໄດ້ເພັ່ງ
ເລັງໃສ່ນັກສອນສາສະໜາ Gulen. ຄະນະໄອຍະການໄດ້ກ່າວອ້າງວ່າ ມີບັນຊີຢູ່ໃນ
ທະນາຄານຂອງທ່ານ Gulen ແລະການຄອບຄອງເງິນໃບນຶ່ງໂດລ່າ ຈຳນວນຫຼວງ
ຫຼາຍ ນັ້ນແມ່ນເປັນຫລັກຖານ ທີ່ວວ່າເຂົາເຈົ້າເປັນສ່ວນນຶ່ງຂອງຕາໜ່າງລັບນັກສອນ
ສາສະໜາ ແລະພົວພັນເຂົ້າໃນການກໍ່ລັດຖະປະຫານ.
ກ່ອນໜ້າການດຳເນີນຄະດີເລີ່ມຂຶ້ນນັ້ນ ຫຼັກຖານຕ່າງໆ ແມ່ນໄດ້ເຮັດໃຫ້ມີການຕຳນິ
ຕິຕຽນຈາກປະຊາຄົມນາໆຊາດ. “ການດຳເນີນຄະດີທີ່ວ່ານີ້ ໄດ້ສະແດງໃຫ້ເຫັນເຖິງ
ຄວາມໂງ່ຈ້າ ໃນລະດັບໃໝ່ ຂອງການກ່າວຫາຕໍ່ພວກນັກຂ່າວ,” ນັ້ນແມ່ນບົດຄວາມ
ຂອງນັກຂ່າວທີ່ບໍ່ມີພົມແດນ ທີ່ມີສຳໜັກງານໃນນະຄອນປາຣີ ຊຶ່ງເປັນອົງການທີ່ຕໍ່ສູ້
ເພື່ອປົກປ້ອງສິດເສລິພາບຂອງສື່ມວນຊົນ.
ບັນດາກຸ່ມປົກປ້ອງສິດທິມະນຸດ ທັງສາກົນແລະພາຍໃນປະເທດ ຕ່າງກໍໄດ້ໄປຮ່ວມ
ການດຳເນີນຄະດີໃນວັນຈັນວານນີ້.
ອ່ານຂ່າວນີ້ເພີ້ມຕື່ມເປັນພາສາອັງກິດ
