ກະສັດ Abdullah ຂອງຈໍແດັນ ໄດ້ຊົງປະຕິຍານວ່າ ຈະເອົາ
ມາດຕະການແບບເດັດຂາດ ຕໍ່ພວກຫົວຮຸນແຮງລັດອິສລາມ
ຫຼັງຈາກກຸ່ມດັ່ງກ່າວ ໄດ້ສັງຫານຢ່າງໂຫດຫ້ຽມ ນັກບິນຈໍແດັນ
ທີ່ຖືກຈັບໂຕໄດ້ ຫຼັງຈາກເຮືອບິນລົບຂອງລາວ ຕົກໃນລະຫວ່າງ
ປະຕິບັດພາລະກິດໂຈມຕີເປົ້າໝາຍພວກຫົວຮຸນແຮງ ໃນຊີເຣຍ.
ການຄາດຕະກຳນັກບິນ Muath al-Kaseasbeh ໄດ້ກໍ່ໃຫ້
ເກີດການປະນາມຂອງນາໆຊາດ ແລະ ໄດ້ເຮັດໃຫ້ບັນດາ
ເຈົ້າໜ້າທີ່ຈໍແດັນ ປະຫານຊີວິດນັກໂທດຊາວອີຣັກ 2 ຄົນ ຄື
ນາງ Sajida al-Rishawi ຜູ້ວາງລະເບີດສະຫລະຊີບ ທີ່ບໍ່ປະສົບ
ຜົນສຳເລັດ ແລະ ນາຍ Ziad al-Karbouly ຄົນອີຣັກ ຜູ້ເປັນສາຍລັບ ຂອງກຸ່ມກໍ່ການ ຮ້າຍອາລກາອິດາ ນັ້ນ.
ກະສັດ Abdullah ຊົງກ່າວເນັ້ນວ່າ ຈໍແດັນ ຈະ “ບໍ່ມີການຢຸດຢ່ອນຜ່ອນຜັນໃດໆເລີຍ” ໃນການທຳສົງຄາມຕໍ່ຕ້ານພວກລັດອິສລາມ.
ພະອົງຊົງຕັດວ່າ “ພວກເຮົາກຳລັງທຳສົງຄາມເພື່ອປົກປ້ອງຄວາມເຊື່ອຂອງພວກເຮົາ ຄຸນຄ່າຂອງພວກເຮົາ ແລະ ຫຼັກການພື້ນຖານຕ່າງໆຂອງຄວາມເປັນມະນຸດ. ແລະ ສົງຄາມຂອງພວກເຮົານີ້ ແມ່ນເພື່ອຫຼັກ ການເຫຼົ່ານັ້ນ ຈະບໍ່ມີການຢຸດຢ່ອນຜ່ອນຜັນ ແລະ ຈະໂຈມຕີພວກເຂົາ ໃນດິນແດນຂອງພວກເຂົາ.”
ຈໍແດັນ ໄວ້ທຸກ ໃຫ້ນັກບິນ ທີ່ຖືກຂ້າຕາຍ
ກຸ່ມຫົວຮຸນແຮງລັດອິສລາມ ໄດ້ຮຽກຮ້ອງໃຫ້ປ່ອຍໂຕ ນາງ al-Rishawi ເພື່ອເປັນການແລກປ່ຽນນັກໂທດກັນ ແຕ່ຈໍແດັນໄດ້ປະຕິເສດທີ່ຈະດຳເນີນການຕໍ່ໄປ ໂດຍທີ່ບໍ່ມີຫລັກຖານຢັ້ງຢືນວ່າ ນັກບິນ Muath al-Kaseasbeh ແມ່ນຍັງມີຊີວິດຢູ່.
ວີດີໂອທີ່ນຳອອກເຜີຍແຜ່ທາງອິນເຕີແນັດ ໃນວັນອັງຄານຜ່ານມາ ທີ່ອ້າງວ່າ ນັກບິນຄົນນີ້ ຖືກຂັງໄວ້ໃນກົງຂັງ ແລ້ວນັກຕໍ່ສູ້ຫົວຮຸນແຮງຄົນນຶ່ງຈູດນ້ຳມັນເຊື້ອໄຟຢູ່ໃນຮ່ອງນ້ອຍໆ ທີ່ເນັ່ງໄປໃສ່ກົງຂັງ ແລະເຮັດໃຫ້ໄຟໄໝ້ລາວຕາຍ.
ທ່ານ Brian P. Hale ຫົວໜ້າປະຊາສຳພັນ ຂອງຫ້ອງການສືບລັບແຫ່ງຊາດຂອງສະຫະລັດ ກ່າວວ່າ “ຄະນະສືບລັບຂອງສະຫະລັດ ບໍ່ມີເຫດຜົນທີ່ຈະມີຄວາມສົງໄສໃດໆກ່ຽວກັບຄວາມແທ້ຈິງຂອງພາບວີດີໂອນີ້.”
