ໃນຂະນະທີ່ ກຸ່ມລັດອິສລາມ ພວມສືບຕໍ່ສູນເສຍດິນແດນ ແລະພວກນັກລົບ ຢູ່ໃນອີຣັກ ແລະ ຊີເຣຍນັ້ນ ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວວ່າ ກຸ່ມຫົວຮຸນແຮງດັ່ງກ່າວ ກຳລັງປັບປ່ຽນ ເພື່ອທຳການຂົ່ມຂູ່ແບບໃໝ່ ທີ່ມີທ່າທາງວ່າ ຈະ ມີຄວາມຫຍຸ້ງຍາກຫຼາຍຂຶ້ນ ທີ່ຈະເອົາຊະນະໄດ້.
ໃນການຖະແຫລງຕໍ່ກອງປະຊຸມຕໍ່ຕ້ານກຸ່ມລັດອິສລາມໃນວັນພະຫັດວານນີ້ທ່ານ Kerry ກ່າວຕໍ່ບັນດາລັດຖະມົນຕີການຕ່າງປະເທດ ແລະ ລັດຖະມົນນຕີປ້ອງກັນປະເທດ ຈາກ 30 ກວ່າປະເທດວ່າ ກະແສຟອງໄດ້ຕ່າວປີ້ນແລ້ວ.
ແນວໂຮມແລະພາຄີຂອງພວກເຮົາທາງພາກພື້ນດິນໄດ້ຂັບໄລ່ກຸ່ມ Daesh ອອກຈາກດິນແດນ 50 ເປີເຊັນ ທີ່ຄັ້ງນຶ່ງ ພວກເຂົາເຄີຍຄວບຄຸມ ຢູ່ໃນອີຣັກ ແລະ 20 ເປີເຊັນ ຂອງດິນແດນ ທີ່ພວກເຂົາເຄີຍຄວບຄຸມ ຢູ່ໃນຊີເຣຍ. ທ່ານ Kerry ກ່າວເພີ້ມຕື່ມ ໂດຍໃຊ້ຄຳວ່າ Daesh ຊຶ່ງເປັນຊື່ຫຍໍ້ໃນພາສາອາຣັບຂອງກຸ່ມລັດອິສລາມ.
ໂລກເຮົາສາມາດເບິ່ງໄປຂ້າງໜ້າໃນເວລາທີ່ກຸ່ມລັດອິສລາມຖືກຂັບໄລ່ອອກໄປໝົດແລ້ວຈາກອີຣັກແລະຊີເຣຍ ນັ້ນຄືຄຳເວົ້າຂອງຫົວໜ້ານັກການທູດສະຫະລັດໄດ້ກ່າວ ແລະວັນເວລາທີ່ເກີດຂຶ້ນນັ້ນຈະເປັນຂີດໝາຍຂອງບາດລ້ຽວທີ່ສຳຄັນໃນການຕໍ່ສູ້ຕ້ານກຸ່ມລັດອິສ ລາມ.
ທ່ານ Kerry ກ່າວວ່າ ແມ່ນແຕ່ໃນເວລານີ້ ແນວໂຮມພາຍໃຕ້ການນຳພາຂອງສະຫະລັດ ສາມາດຮັບຮູ້ຄວາມຈິງທີ່ວ່າ ກຳລັງສູ້ລົບຂອງກຸ່ມລັດອິສລາມແມ່ນປະມານນຶ່ງສ່ວນສາມ ໜ້ອຍກວ່າທີ່ມີຢູ່ໃນປີກາຍນີ້. ພວກນັກລົບຕ່າງປະເທດທີ່ເກັບເກນໂດຍກຸ່ມລັດອິສລາມໃນໄລຍະຜ່ານມາ ໄດ້ລ່າຖອຍໜີ ໄປຈາກເຂດແນວໜ້າ ນັບຕັ້ງແຕ່ລາຍໄດ້ທີ່ມີໜ້ອຍລົງເຮັດໃຫ້ມີການຈ່າຍເງິນເດືອນແກ່ພວກນັກລົບຊ້າແລະການຊອກຫາພວກນັກລົບໃໝ່ມາແທນ ແມ່ນຍາກຂຶ້ນເລື້ອຍໆ.
ທ່ານ Kerry ກ່າວວ່າ ຖ້າປາສະຈາກດິນແດນທີ່ເປັນຖານທັບແລ້ວ ກຸ່ມລັດອິສ ລາມກໍຈະບໍ່ສາມາດຄຸຍໂມ້ໄດ້ວ່າ ຕົນເປັນດິນແດນຂອງລັດອິສລາມທີ່ພວກນັກລົບສາມາດໄປເຕົ້າໂຮມກັນໄດ້.