ທ່ານ Joe Biden ຮອງປະທານາທິບໍດີສະຫະລັດ ໄດ້ກ່າວຍ້ອງຍໍການຫັນປ່ຽນຂອງ Mongolia ໄປສູ່ລະບອບປະຊາທິປະໄຕ ໃນວັນຈັນມື້ນີ້ ໃນລະຫວ່າງການຢ້ຽມຢາມເປັນ ເວລາ 1 ມື້ ຊຶ່ງທ່ານໄດ້ໂອ້ລົມສົນທະນາກັບພວກຜູ້ນໍາມົງໂກເລຍເລື້ອງຄວາມຮ່ວມໄມ້ ຮ່ວມມືກັນ ຢ່າງໃກ້ຊິດຂຶ້ນ ທາງດ້ານເສດຖະກິດແລະປ້ອງກັນປະເທດ.
ທ່ານ Biden ທີ່ເດີນທາງໄປຮອດນະຄອນຫລວງ Ulan Bator ຫລັງຈາກທໍາການຢ້ຽມຢາມຈີນ 5 ມື້ ເປັນຮອງປະທານາທິບໍດີສະຫະລັດຄົນທໍາອິດ ທີ່ໄປຢ້ຽມຢາມ Mongolia ນັບແຕ່ປີ 1944 ເປັນຕົ້ນມາ ແຕ່ອະດີດປະທານາທິບໍດີ George W. Bush ໄດ້ຢຸດແວ່ເປັນເວລາສັ້ນໆ ໃນປີ 2005.
ທ່ານ Biden ໄດ້ກ່າວຂອບອົກຂອບໃຈ Mongolia ສໍາລັບການປະກອບສ່ວນທາງທະ
ຫານໃນອີຣັກ ແລະໃນອັຟການີສຖານ ຕະຫຼອດທັງເຂົ້າຮ່ວມໃນການປະຕິບັດງານຮັກສາ ສັນຕິພາບອື່ນໆ.
ການຢ້ຽມຢາມ Mongolia ຂອງທ່ານ Biden ໃນຄັ້ງນີ້ ແມ່ນເປັນການສະໜອງຕອບການຢ້ຽມຢາມກຸງວໍຊິງຕັນ ຂອງປະທານາທິບໍດີ Mongolia ທ່ານ Tsakhia Elbegdorj ໃນເດືອນມິຖຸນາປີນີ້. ນອກນັ້ນ ທ່ານ Biden ຍັງໄດ້ພົບປະສົນທະນາກັບນາຍົກລັດຖະມົນຕີ Bukhbaatar Batbold ໃນວັນຈັນມື້ນີ້ເຊ່ນກັນ.
ເຖິງແມ່ນໄດ້ຮັບການຕ້ອນຮັບຢ່າງອົບອຸ່ນໂດຍທົ່ວໄປ ທີ່ Mongolia ນັ້ນກໍຕາມ ແຕ່ຂະບວນລົດຂອງທ່ານ Biden ກໍໄດ້ປະເຊີນກັບການປະທ້ວງຈາກພວກປະທ້ວງກຸ່ມນ້ອຍໆ ທີ່ ຖືປ້າຍຮຽກຮ້ອງ ອະເມຣິກາບໍ່ໃຫ້ມາຫຍຸ້ງກ່ຽວກັບ Mongolia.