ປະທານປະເທດຈີນ ທ່ານ ສີ ຈິ້ນຜິງ ກ່າວໃນວັນຈັນມື້ນີ້ວ່າ ຈີນຈະເອົາບາດກ້າວ
ຕ່າງໆ ເພື່ອຂະຫຍາຍຊ່ອງທາງເຂົ້າເຖິງຕະຫລາດຂອງຕົນ ໃນຂະນະທີ່ທ່ານເປີດ
ງານຕະຫລາດນັດ ທີ່ຍິ່ງໃຫຍ່ ແຫ່ງນຶ່ງ ຢູ່ນັ້ນ ທ້າມກາງການຕິຕຽນ ຈາກປະເທດ
ຕ່າງໆ ກ່ຽວກັບວິທີການດຳເນີນທຸລະກິດຂອງຈີນ.
ທ່ານ ສີ ເວົ້າວ່າ ຈີນຈະຫລຸດອັດຕາພາສີນຳເຂົ້າ, ຈະເອົາມາດຕະການໃນການ
ລະເມີດສິດທິ ໃນດ້ານຊັບສິນທາງປັນຍາ, ແລະປະຕິບັດການເພີ້ມທະວີການໃຊ້
ຈ່າຍຢູ່ພາຍໃນປະເທດໃຫ້ຫລາຍຂຶ້ນ.
ໃນການກ່າວຢູ່ໃນງານວາງສະແດງສິນຄ້າຢູ່ນະຄອນຊຽງໄຮນັ້ນ ທ່ານ ສີ ໃຫ້ຄຳ
ໝັ້ນສັນຍາວ່າ ຈະ “ອ້າແຂນຕ້ອນຮັບໂລກ” ໃນຂະນະທີ່ຈີນສົ່ງເສີມຕະຫລາດ
ການຊົມໃຊ້ ຢູ່ໃນປະເທດທີ່ມີເສດຖະກິດໃຫຍ່ອັນດັບສອງຂອງໂລກຢູ່ນັ້ນ.
ທ່ານບໍ່ໄດ້ເອີ່ຍເຖິງຊື່ ປະທານາທິບໍດີສະຫະລັດ ທ່ານ ດໍໂນລ ທຣຳ ແຕ່ວ່າ ກໍໄດ້
ພາດພິງເຖິງນະໂຍບາຍ “ອາເມຣິກາມາກ່ອນໝູ່ໝົດ” ຂອງທ່ານທຣຳ ໂດຍການ
ຕຳນິລັດທິການຢູ່ແບບໂດດດ່ຽວ ແລະອ້າງວ່າ ຕ້ອງມີການປົກປ້ອງການຄ້າແບບ
ຫລາຍຝ່າຍ.
ສະຫະລັດ ແລະຈີນຕົກຢູ່ໃນສະພາບຕໍ່ສູ້ກັນແບບ ບໍ່ໄປບໍ່ມາ ທາງດ້ານການຄ້າ
ໂດຍທີ່ທ່ານທຣຳ ໄດ້ສະແດງຄວາມບໍ່ພໍໃຈ ກ່ຽວກັບຊ່ອງຫວ່າງແຕກໂຕນກັນ
ທາງການຄ້າຂອງສອງປະເທດ ແລະກ່າວຫາຈີນວ່າ ໄດ້ລັກຂະໂມຍເອົາຊັບສິນ
ທາງປັນຍາ ແລະວາງນະໂຍບາຍທີ່ເຮັດໃຫ້ບໍລິສັດສະຫະລັດ ມີຄວາມຫຍຸ້ງຍາກ
ຫລາຍຂຶ້ນ ໃນການເຂົ້າເຖິງຕະຫລາດຂອງຈີນ.
ທ່ານທຣຳ ໄດ້ປະກາດວ່າ ຈະເກັບພາສີເພີ້ມຂຶ້ນ ຕໍ່ສິນຄ້າຈີນໃນມູນຄ່າ 250 ຕື້ໂດລາ
ໃນຂະນະທີ່ຈີນໄດ້ທໍາການຕອບໂຕ້ຄືນ ດ້ວຍການເກັບພາສີ ຕໍ່ສິນຄ້າຂອງສະຫະລັດ
ໃນມູນຄ່າ 110 ຕື້ໂດລາ. ຄາດວ່າ ທ່ານ ສີ ກັບ ທ່ານ ທຣຳ ຈະພົບປະກັນ ໃນທ້າຍ
ເດືອນນີ້.
ສະຫະພາບຢູໂຣບ ຫລື ອີຢູ ກໍໄດ້ສະແດງຄວາມບໍ່ພໍໃຈ ຕໍ່ນະໂຍບາຍການຄ້າຂອງຈີນ ເຊັ່ນກັນ, ຊຶ່ງລວມມີ ການຕຳນິທ່ານສີ ທີ່ບໍ່ໄດ້ປະຕິບັດຕາມຄຳໝັ້ນສັນຍາ ວ່າຈະທຳການປະຕິຮູບ ທີ່ໄດ້ໃຫ້ໄວ້ໃນເມື່ອກ່ອນ. ໃນອາທິດແລ້ວນີ້ ອີຢູໄດ້ຮຽກຮ້ອງໃຫ້ທ່ານສີ ສະແດງໃຫ້ເຫັນ ເຖິງບາດກ້າວອັນໜັກແໜ້ນ ໃນການເປີດກວ້າງ ຕະຫລາດຂອງຕົນ.
