ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ຍີ່ປຸ່ນຫາທາງປ້ອງກັນ ການຂ້າໂຕຕາຍ ຂອງປະຊາຊົນໃນເຂດປະສົບໄພສຸນາມິ (ເບິ່ງວີດິໂອພາສາລາວ-ອັງກິດ)


ຜູ້ຍິງເຫລົ່ານີ້ມີຄວາມເປັນຫ່ວງຕໍ່ລູກນ້ອຍຂອງຕົນ ເຂົາເຈົ້າເປັນຄົນຈໍານວນນຶ່ງໃນໝູ່ປະຊາ​ຊົນຫລາຍ​ກວ່າ 430,000 ທີ່ຕ້ອງ​ໄດ້ໄປ​ອາ​ໃສ​ຢູ່​ບ່ອນພັກ​ສຸກ​ເສີນຊົ່ວ​ຄາວ ພາຍຫລັງທີ່ຄື້ນຍັກສຸນາມິ ຖະຫລົ່ມທໍາລາຍບ້ານ
ເຮືອນຂອງພວກເຂົາເຈົ້າໃນວັນທີ 11 ມີນາປີນີ້ ທີ່ເມືອງເຊນດາຍຂອງຍີ່
ຜູ້ຍິງເຫລົ່ານີ້ມີຄວາມເປັນຫ່ວງຕໍ່ລູກນ້ອຍຂອງຕົນ ເຂົາເຈົ້າເປັນຄົນຈໍານວນນຶ່ງໃນໝູ່ປະຊາ​ຊົນຫລາຍ​ກວ່າ 430,000 ທີ່ຕ້ອງ​ໄດ້ໄປ​ອາ​ໃສ​ຢູ່​ບ່ອນພັກ​ສຸກ​ເສີນຊົ່ວ​ຄາວ ພາຍຫລັງທີ່ຄື້ນຍັກສຸນາມິ ຖະຫລົ່ມທໍາລາຍບ້ານ ເຮືອນຂອງພວກເຂົາເຈົ້າໃນວັນທີ 11 ມີນາປີນີ້ ທີ່ເມືອງເຊນດາຍຂອງຍີ່

ເວລາຜ່ານມາໄດ້ຫລາຍເດືອນແລ້ວ ທີ່ຍີ່ປຸ່ນໄດ້ປະສົບກັບໄພຫາຍະນະຈາກແຜ່ນດິນໄຫວ ແລະຄື້ນຟອງສຸນາມິນັ້ນ ແຕ່ພວກຊ່ຽວຊານດ້ານສຸຂະພາບຈິດກ່າວວ່າ ຜົນກະທົບທາງດ້ານ ຈິດໃຈຈາກໄພພິບັດດັ່ງກ່າວ ອາດຈະຫາກໍປາກົດຂຶ້ນມາໃນເວລານີ້ເອງ. ຜູ້ສື່ຂ່າວວີໂອເອ Henry Rigwell ລາຍງານມາຈາກເຂດທີ່ໄດ້ປະສົບກັບໄພພິບັດນັ້ນວ່າ ເວລານີ້ ພວກບໍລິ ສັດໃຫ້ຄໍາປຶກສາທາງໂທລະສັບ ກໍາລັງພາກັນເຂົ້າໄປມີໜ້າ ແລະໃຫ້ການບໍລິການຢູ່ໃນເຂດ ເລາະລຽບຝັ່ງທະເລ ທາງພາກຕາເວັນອອກສຽງເໜືອຂອງຍີ່ປຸ່ນ ເພາະຢ້ານວ່າຈະເກີດມີ ການຂ້າຕົວຕາຍກັນຫລາຍຂຶ້ນ ແລະບັນຫາສຸຂະພາບຈິດອື່ນໆ. ດາຣາມີເລຶ່ອງນີ້ມາສະເໜີ ທ່ານ.

ຜົນ​ສະທ້ອນ​ດ້ານ​ວັດຖຸ​ຈາກຄື້ນ​ຟອງ​ສຸ​ນາ​ມິ ຍັງ​ມີ​ປາກົດ​ໃຫ້​ເຫັນ​ຢ່າງ​ແຈ້ງຂາວ​ຢູ່.

ແຕ່​ວ່າ ​ໃນ​ຂະນະທີ່ຄວາມ​ພະຍາຍາມ​ສ້າງສາ​ຄືນ​ໃໝ່ດໍາ​ເນີນ​ໄປ​ຢູ່ນັ້ນ ກໍ​ປາກົດ​ມີ​ຄວາມ
​ເປັນ​ຫ່ວງ​ເພີ່ມ​ຂຶ້ນນັບ​ມື້ ກ່ຽວ​ກັບບາດ​ແຜ​ຫລື​ຄວາມ​ບອບຊໍ້າທາງດ້ານ​ຈິດ​ໃຈ​ ທີ່​ຄື້ນຟອງ
​ສຸ​ນາ​ມິໄດ້ປະ​ໄວ້ເບື້ອງ​ຫລັງ.

ໄພພິບັດ​ຄັ້ງ​ນັ້ນ ​ໄດ້​ຍັງ​ຜົນ​ໃຫ້​ປະຊາ​ຊົນຫລາຍ​ກວ່າ 430,000 ຕ້ອງ​ໄດ້ໄປ​ອາ​ໃສ​ຢູ່​ບ່ອນ
ພັກ​ສຸກ​ເສີນຊົ່ວ​ຄາວ.

ບ້ານ​ເຮືອນ​ຈໍານວນ​ຫລວງຫລາຍຖືກ​ທໍາ​ລາຍ….ປະຊາ​ຄົມ​ຕ່າງໆ​ຖືກ​ຕັດຂາດ​ຈາກ​ກັນ …

ທ່ານນາງ ກາ​ຊູ​ໂກະ ​ເດ​ມູຣະ(Kazuko Demura) ​ເປັນປະທານ​ໜ່ວຍ​ບໍລິການ​ໃຫ້ຄໍາ​ປຶກ
ສາທາງໂທລະສັບ​ Inochi no Denwa ທີ່ເມືອງ Sendai ຊຶ່ງ​ເປັນນຶ່ງ​ໃນ​ບັນດາເມືອງ​ທີ່​
ຖືກ​ກະທົບ​ຢ່າງໜັກ​ໜ່ວງ​ທີ່​ສຸດ. ທ່ານນາງ ກາ​ຊູ​ໂກະ ​ເດ​ມູຣະ ​ເວົ້າ​ວ່າ:

ທັນທີ​ຫລັງ​ຈາກ​ແຜ່ນດິນ​ໄຫວ​ແລະ​ຄື້ນ​ຟອງ​ສຸ​ນາ​ມີນັ້ນ ໝົດ​ທຸກ​ຄົນ​ແມ່ນ​ມີຄວາມ​ຢ້ານ​
ກົວ​ຫລາຍ​ແທ້ໆ. ​ເວລາ​ຄຸຍ​ກັນ​ທາງ​ໂທລະສັບ ທຸກໆ​ຄົນ​ກ່າວ​ວ່າ ພວກ​ເຂົາ​ເຈົ້າຢ້ານ
ຈົນສັ່ນ​ເຊັນ ​ໂດຍ​ສະ​ເພາະ​ພວກ​ທີ່​ມີ​ບັນຫາ​ສຸຂະພາບ​ຈິດຢູ່​ແລ້ວ​ນັ້ນ. ຕົວ​ຢ່າງ ຢູ່​ໃນ​
ສະຖານ​ທີ່ພັກ​ເຊົາ​ຊົ່ວຄາວ​ນັ້ນ ພວກເຂົາ​ເຈົ້າຈະ​ນອນ​ບໍ່​ຫລັບ ​ເຂົາ​ເຈົ້າບໍ່​ມີ​ຢຸກຢາ​ກິນ
ດັ່ງ​ນັ້ນ ສຸຂະພາບ​ຈິດ​ຂອງພວກ​ເຂົາ​ເຈົ້າກໍເລີຍ​ເຊື່ອມ​ໂຊມ ຮ້າຍ​ແຮງ​ລົງ​ໄປ​ເລື້​ອຍໆ.”

ກໍາ​ມັນ​ຕະພາບ​ລັງສີ​ ທີ່​ຮັ່ວ​ໄຫລອອກ​ມາ​ຈາກ​ໂຮງ​ໄຟຟ້າ​ນີວ​ເຄລຍໃນ​ເມືອງຟູ​ກູ​ຊີ​ມະ
​ໄປ​ແປ​ດ​ເປື້ອນຜົນລະປູກ​ນັ້ນ ​ເປັນ​ເຫດ​ໃຫ້ກະສິກອນ​ຄົນ​ນື່ງ​ຜູກ​ຄໍ​ຕາຍ​.

ສື່​ມ​ວນຊົນ​ທ້ອງ​ຖິ່ນ​ກ່າວ​ວ່າ ພະນັກງານ​ລັດຖະບານ​ຄົນ​ນຶ່ງກໍ​ຂ້າ​ຕົວ​ຕາຍ ​ໃນເດືອນ​ເມສາ
ຄື​ກັນ​ກັບ​ພໍ່ຄົນ​ນຶ່ງ​ທີ່​ສູນ​ເສຍ​ລູກ​ສາວ​ໄປ​. ​ມີ​ຄວາມ​ຢ້ານ​ກົວ​ກັນວ່າ​ ເລຶ່ອງຂ້າ​ຕົວ​ຕາຍຈະໜັກ
ໜ່ວງ​ລົງ​ໄປ​ກວ່າ​ນີ້.

ຍີ່ປຸ່ນ​ມີ​ສະຖິຕິ​ຄົນ​ຂ້າ​ຕົວ​ຕາຍ​ສູງ​ທີ່​ສຸດ​ໃນ​ໂລກຢູ່​ແລ້ວ ຄືໃນ​ອັດຕາ​ຫລາຍກວ່າ 30,000 ຄົນ
ຕໍ່​ປີ ​ໃນ​ໄລຍະ 13 ປີຜ່ານ​ມາ.

ຄລິກບ່ອນນີ້ ເພື່ອເບິ່ງວີດີໂອພາສາລາວ

ທ່ານນາງ ກາ​ຊູ​ໂກະ ​ເດ​ມູຣະ ປະທານ​ໜ່ວຍ​ບໍລິການ​ໃຫ້ກາ​ນປຶກສາ​ທາງ​ໂທລະສັບ ກ່າວ
​ຕື່ມ​ວ່າ ​ເວລາຫລາຍ​ເດືອນຜ່ານ​ມາ ນັບຕັ້ງ​ແຕ່​ຄື້ນ​ຟອງ​ສຸ​ນາ​ມິ​ກະທົບ​ຍີ່ປຸ່ນ ຜົນ​ສະທ້ອນ
​ທາງ​ດ້ານ​ຈິດ​ໃຈກໍ​ຍັງ​ມີ​ຢູ່​ຢ່າງ​ໃຫຍ່​ຫລວງ. ທ່ານນາງ ກາ​ຊູ​ໂກະ ​ເດ​ມູຣະ ​ເວົ້າ​ວ່າ:

“​ປະຊາຊົນ​ພວກ​ນີ້​ຕົກ​ຢູ່​ໃນ​ສະພາບ​ທີ່ເກີນ​ຄວາມ​ເສົ້າໂສກ​ເສຍ​ໃຈ​ ຄືພວກ​ເຂົາ​ເຈົ້າ
ຮູ້ສຶກຜິດ ​ທີ່ໂຕ​ເອງຍັງ​ມີຊີວິດ​ຢູ່. ​ເຂົາ​ເຈົ້າພາກັນ​ສະຫງົບ​ຈິດ​ສະຫງົບ​ໃຈ​ລົງ​ໄປ​ເທື່ອ
​ລະເລັກ​ລະ​ນ້ອຍ ​ແຕ່ເຫດການເຫລົ່າ​ນັ້ນ ກໍ​ມັກ​ຈະ​ກັບມາ​ຫລອກ​ຫລອນ​ເຂົາ​ເຈົ້າ
ຢູ່ເລື້ອຍໆ ​ແລະ​ຄື້ນ​ຟອງ​ສຸ​ນາ​ມິ​ນັ້ນກໍກາຍ​ມາເປັນບາດ​ແຜທີ່​ກະທົບກະ​ ເທືອ​ນຈິດ​
ໃຈຂອງພວກເຂົາ​ເຈົ້າ​ ​ແລະ​ຕໍ່​ມາ​ ​ເຂົາ​ເຈົ້າກໍ​ເລີ່​ມພາກັນ​ເປັນ​ຫ່ວງ​ກ່ຽວກັບ​ອະນາຄົດ.”

ແຕ່​ກໍ​ຍັງ​ມີ​ຫລາຍໆຕົວຢ່າງທີ່ໜ້າ​ສັງ​ເກດ​ຂອງ​ຄວາມ​ເຂ້​ມ​ແຂງຂອງ​ຊາວ​ຍີ່ປຸ່ນ ທີ່​ໄດ້​ຮັບ​ການ ​ຍ້ອງຍໍ​ສັນ​ລະເສີນ​ຫລາຍ​ທີ່​ສຸດ.

ຕົວ​ຢ່າງ​ນຶ່ງ​ນັ້ນ ກໍ​ຄື ນາຍ ຣຽວອີ​ຈິ ຊູ​ຊູ​ກິ (Ryuichi Suzuki) ຊຶ່ງບ້ານ​ຂອງລາວ ທີ່​ປຸກ
​ຢູ່ແຄ​ມຝັ່ງທະ​ເລ ໃກ້​ເມືອງ Sendai ​ໄດ້ຖືກ​ຟອງ​ສຸ​ນາ​ມິພັດ​ໄປ ​ໂດຍ​ບໍ່ເຫລືອ​ຮ່ອງຮອຍ
ຫຍັງ​ເລີຍ. ຫລັງຈາກ​ໄດ້​ໄປ​ອາ​ໃສ​ຢູ່​ສະຖານ​ພັກ​ຊົ່ວ​ຄາວເປັນ​ເວລາ​ສອງ​ເດືອນ ​ບັດ​ນີ້ ນາຍ
ຊູ​ຊູ​ກິກັບ​ພັນ​ລະ​ຍາ ກໍ​ໄດ້​ມາອາ​ໃສ​ຢູ່​ບ້ານ​ສໍາ​ເລັດ​ຮູບ​ຫລັງ​ນຶ່ງ ​ແລະລາວ​ເວົ້າວ່າ:

“ມັນ​ບໍ່​ມີ​ເຫດຜົນ​ຫຍັງທີ່​ຂ້ອຍ​ຕ້ອງ​ຄິດ​ເຖິງ​ສິ່ງ​ທີ່​ຂ້ອຍ​ໄດ້​ສູນ​ເສຍ​ໄປ. ຂ້ອຍຄວນ​ຈະ
ລືມ​ມັນ​ໄປ​ດີກ​ວ່າ ​ແລະ​ຄິດ​ເຖິງ​ອະນາຄົດ. ຂ້ອຍ​ກ໋ະວ່າ​ຂ້ອຍ​ຈະ​ມີ​ຊີວິດຢູ່​ຕໍ່​ໄປ​ອີກ
​ຈັກ 10 ຫາ 15 ປີ ດັ່ງ​ນັ້ນ​ຂ້ອຍ​ຢາກ​ລືມ​ເລຶ່ອງ​ໄພພິບັດ​ນີ້​ໃຫ້​ໄດ້ ຂ້ອຍ​ຈະໃຊ້​ຊີວິດ
ຢູ່​ດ້ວຍ​ການ​ມອງ​ໂລກ​ໃນແງ່​ດີໆ ຄິດ​ແຕ່​ສິ່ງ​ທີ່​ດີໆ ​ແລະຂ້ອຍ​ຈະ​ເຮັດ​ໃຫ້​ດີ​ທີ່​ສຸດ​.”

ນາຍ​ຊູ​ຊູ​ກິ​ກ່າວ​ຕໍ່​ໄປ​ວ່າ ລາວ​ພໍ​ໃຈແລະມີ​ຄວາມສຸກ​ໃຈ​ກັບ​ບ້ານ​ຊົ່ວຄາວ​ຫລັງ​ໃໝ່ຂອງ​ລາວ
ຊຶ່ງ​ລາວ​ກ່າວ​ວ່າ ຢ່າງ​ນ້ອຍ ​ມັນກໍ​ມີ​ຫລັງ​ຄາ ມີ​ຝາ ​ແຖມ​ຍັງ​ມີ​ສ້ວມ​ຖ່າຍ​ໄຟຟ້າໄຮ-​ເທັກອີກ
ຕ່າງຫາກ ທີ່​ພຽງ​ແຕ່​ກົດ​ປຸ່ມ ກໍ​ສາມາດ​ຟັງ​ດົນຕີ​ໄດ້ຫລື​ຈະ​ກົດ​ປຸ່ມ​ໃຫ້​ນໍ້າ​ສີດ​ທໍາ​ຄວາມ​ສະ
ອາດ​ໃຫ້ ​ກໍ​ໄດ້. ສໍາລັບ​ອະນາຄົດ​ນັ້ນ ລາວ​ກ່າວ​ວ່າ:

“ຄວາມ​ຫວັງ​ອັນ​ທໍາ​ອິດ​ຂອງ​ຂ້ອຍ​ນັ້ນ ກໍ​ແມ່ນ​ວ່າ ລັດຖະບານ​ຍີ່ປຸ່ນ​ຈະ​ຊົດເຊີຍ​ຄ່າ
​ເສຍ​ຫາຍຂອງ​ຂ້ອຍ ​ແລະ​ບ້ານ​ຂອງ​ຂ້ອຍ​ຫລາຍ​ພໍ​ສົມຄວນ. ອັນ​ທີສອງ​ຫັ້ນ​ວະ?
​ເບິ່ງ​ກ່ອນ...​ເອີ​... ຂ້ອຍ​ຫວັງ​ຢາກມີ​ລົດ​ຕູ້​ແຄມ​ເປີ​ ຈັກ​ຄັນ​ນຶ່ງ ເພື່ອ​ວ່າ ຍາມ​ອາກາດ
​ໜາວ ຂ້ອຍ​ກໍ​ຈະ​ໄປ​ຢູ່​ບ່ອນ​ໃດ​ທີ່​ມັນ​ອຸ່ນດີ ຍາມ​ອາກາດ​ຮ້ອນ​ເກີນ​ໄປ ຂ້ອຍ​ກໍ​ໄປ​ຢູ່
ບ່ອນ​ທີ່​ມັນ​ເຢັນ​ກວ່າ ປຽບ​ເໝືອນດອກ​ຕາ​ເວັນ​ເນາະ ຂ້ອຍ​ຈະ​ໄປ​ຕາມຕາເວັນ.”

ຢູ່​ທົ່ວ​ຂົງ​ເຂດ​ນີ້ ຈະ​ເຫັນ​ປ້າຍ​ໂຄສະ​ນາ​ຕ່າງໆ​ຕິດຢູ່​ຕາມ​ຕຶກ​ອາຄານ ຕາມລົດ​ເມ ​ແລະ
ຕາມລົດແທັກ​ຊີ້ ​ຮ້ອງ​ຂໍ​ໃຫ້​ຊາວ​ຍີ່ປຸ່ນ​ຈົ່ງພາກັນລຸກຂຶ້ນ ​ແລະ​ປະ​ເຊີນ​ກັບ​ສິ່ງ​ທ້າ​ທາຍ​ແລະ
​ຢ່າ​ໄດ້​ທໍ້ຖອຍ.

ແຕ່​ພວກ​ໃຫ້​ຄໍາ​ປຶກສາ​ທັງຫລາຍ​ ​ຢູ່​ໜ່ວຍ​ໃຫ້ການ​ປຶກສາ Inochi no Denwa ກ່າວ​ວ່າ
ທາງ​ດ້ານ​ຈິດ​ໃຈ​ແລ້ວ ພວກ​ທີ່​ລອດ​ຊີວິດ​ຫລາຍໆ​ຄົນ ຍັງ​ດິ້ນຮົນ​ຕໍ່ສູ້​ກັບ​ເຫດການ ​ຄັ້ງ​ວັນ
​ທີ 11 ​ເດືອນ​ມີນາ​ຜ່ານ​ມາ​ ທີ່​ໄດ້​ປ່ຽນແປງວິຖີ​ຊີວິດ​ຂອງ​ພວກ​ເຂົາ​ເຈົ້າ​ຕະຫລອດ​ໄປນັ້ນຢູ່.

ເບິ່ງວີດີໂອ ພາສາອັງກິດ:

XS
SM
MD
LG