ປະຊາຊົນຫຼາຍກ່ວານຶ່ງຮ້ອຍຄົນ ໄດ້ພາກັນທໍາການປະທ້ວງຢູ່ອ້ອມແອ້ມຄ້າຍ Iwakuni
ຂອງທະຫານ Marine ສະຫະລັດ ທາງພາກຕາເວັນຕົກຂອງຍີ່ປຸ່ນ ໃນວັນຈັນມື້ນີ້
ໃນຂະນະທີ່ເຮືອບິນບັນທຸກລໍານຶ່ງ ລໍາລຽງເຮືອບິນ MV-22 Osprey 12 ລໍາ ມາສົ່ງ
ທີ່ຄ້າຍແຫ່ງນັ້ນ.
ການຄັດຄ້ານຂອງປະຊາຊົນທ້ອງຖິ່ນ ຕໍ່ເຮືອບິນດັ່ງກ່າວນີ້ ໄດ້ເພີ່ມທະວີຂຶ້ນ ນັບຕັ້ງແຕ່
ເຮືອບິນ Osprey ລໍານຶ່ງໄດ້ຕົກລົງ ຢູ່ປະເທດ Morocco ໃນເດືອນເມສາ ປີນີ້ ແລະອີກ
ລໍານຶ່ງໄດ້ຕົກລົງທີ່ລັດ Florida ໃນເດືອນມີຖຸນາ ຜ່ານມາ.
ເຮືອບິນທີ່ມີສອງໝາກປິ່ນອ່ຽງດັ່ງກ່າວນີ້ ໄດ້ນໍາມາທົດລອງໃຊ້ຢູ່ຄ້າຍ Iwakuni ຈົນກວ່າ
ຈະນໍາໄປໃຊ້ງານ ຢູ່ຖານທັບອາກາດ Futenma ທີ່ເກາະ Okinawa ໃນເດືອນຕຸລາ.
ສະຖານເອກອັກຄະລັດຖະທູດສະຫະລັດໃນຍີ່ປຸ່ນ ກ່າວໃນຄໍາຖະແຫລງໃນວັນຈັນມື້
ນີ້ວ່າ ກໍາລັງສະຫະລັດໃນຍີ່ປຸ່ນຈະລະເວັ້ນຈາກການໃຊ້ເຮືອບິນ Osprey ບິນ ປະຕິ
ບັດງານ ຈົນກວ່າວ່າ ການສືບສວນສອບສວນກ່ຽວກັບອຸບປະຕິເຫດ ຈະຢືນຢັນຄວາມ
ປອດໄພຂອງເຮືອບິນດັ່ງກ່າວ.