ລິ້ງ ສຳຫລັບເຂົ້າຫາ

ຍີ່ປຸ່ນຈະກົດດັນເອົາອໍານາດ ໃນການດໍາເນີນຄະດີ ທະຫານອາເມຣິກັນ ຢູ່ໂອກີນາວາ ຫລາຍຂຶ້ນ

  • ທອງປານ ເທບວົງສາ

ປ້າຍປະທ້ວງກໍາລັງທະຫານສະຫະລັດທີ່ເກາະໂອກິນາວາ ຂອງຍີ່ປຸ່ນ

ລັດຖະມົນຕີ​ຕ່າງປະ​ເທດ​ຍີ່ປຸ່ນ​ໄດ້​ໃຫ້​ຄໍາ​ໝັ້ນ​ສັນຍາ​ວ່າ ​ໂຕ​ກຽວ​ຈະ​ກົດ​ດັນ​ສະຫະລັດ ​ໃຫ້​
ມອບ​ອໍານາດ​ເພີ່ມ​ຕື່ມໃຫ້​ແກ່​ພວກ​ເຈົ້າໜ້າ​ທີ່​ຍີ່ປຸ່ນ ໃນ​ການ​ດໍາ​ເນີນ​ຄະດີກ່ຽວ​ກັບ​ຂໍ້​ຫາ​ກໍ່
ອາຊະ​ຍາ​ກໍາ​ໂດຍ​ກໍາລັງ​ທະຫານ​ສະຫະລັດ​ຢູ່ ເກາະ​ໂອ​ກິ​ນາວານັ້ນ.

ທ່ານ Koichiro Gemba ​ໄດ້​ຮັບປາກ​ເມື່ອ​ວັນເສົາ​ວານ​ນີ້ຢູ່​ໃນ​ກອງ​ປະຊຸມ​ກັບ​ຜູ້​ວ່າການ
ເກາະ​ໂອ​ກິ​ນາວາ ທ່ານ Hirokazu Nakaima.

ທ່ານ Gemba ກ່າວ​ວ່າ ທ່ານ​ຈະ​ກະທໍາ​ທຸກ​ຢ່າງ​ທີ່​ເປັນ​ໄປ​ໄດ້​ເພື່ອ​ເກ້​ຍ ກ່ອມ​ໃຫ້​ສະຫະລັດ
ທໍາ​ການ​ປ່ຽນ​ແປງ​ຫລາຍ​ຂຶ້ນ ຕໍ່​ຂໍ້​ຕົກລົງ​ອັນ​ນຶ່ງ ​ທີ່​ໃຫ້ ສະຫະລັດ​ມີອໍານາດໃນ​ການດໍາ​ເນີນ
ຄະດີ​ໃນ​ເບື້ອງ​ຕົ້ນ ຕໍ່ທະຫານແລະ​ຄອບ​ຄົວ​ຂອງ​ພວກ​ເຂົາ​ເຈົ້າທີ່​ຖືກ​ກ່າວ​ຫາ​ວ່າກໍ່ອາຊະຍາ
ກໍາ​ຢູ່​ໃນ​ດິນ​ແດນ​ຍີ່ປຸ່ນ​ນັ້ນ.

ທ່ານຜູ້​ວ່າ​ເກາະ​ໂອ​ກິ​ນາວາ Nakaima ກ່າວ​ວ່າ ທ່ານ​ດີ​ໃຈ​ໃນ​ຄວາມ​ພະຍາ​ຍາມ​ຂອງ​ຍີ່ປຸ່ນ
ເພື່ອ​ດັດ​ແປງ​ຂໍ້​ຕົກລົງ​ດັ່ງກ່າວ​ເພີ່ມ​ຕື່ມ.

ອາ​ຊະ​ຍາ​ກໍາ​ທີ່​ໄດ້​ກໍ່​ຂຶ້ນ​ໂດຍ​ທະຫານ​ສະຫະລັ​ດ​ໃນ​ຍີ່ປຸ່ນ​ນັ້ນ ​ແມ່ນ​ໄດ້ສ້າງ​ ຄວາມ​ໂກດ​ແຄ້ນ
ໃນ​ພວກ​ມະຫາຊົນ​ຍີ່ປຸ່ນ​ຢ່າງ​ໃຫຍ່ ບວກ​ກັບ​ການ​ຊັກຊ້າ​ໃນ​ການ​ມອບ​ສົ່ງ​ຜູ້​ຕ້ອງ​ສົງ​ໃສ​ຕໍ່​ໃຫ້
ພວກ​ເຈົ້າໜ້າ​ທີ່​ຍີ່ປຸ່ນ ​ແລະ​ການ​ລົງ ​ໂທດ​ຕ່າງ​ໆ ​ທີ່​ເຫັນ​ວ່າເບົາ​ເກີນ​ໄປ​ນັ້ນ​.

XS
SM
MD
LG