ຂະແໜງການທ່ອງທ່ຽວຢູ່ໃນຍີ່ປຸ່ນໄດ້ຖີບຕົວສູງຂຶ້ນຢ່າງເປັນປະຫວັດການ ໂດຍມີຈຳນວນນັກທ່ອງທ່ຽວເຂົ້າປະເທດເຖິງ 8 ລ້ານ 6 ແສນຄົນໃນປີ 2010 ທັງນີ້ ກໍເພາະເປັນຍ້ອນການຟື້ນໂຕຄືນຂອງເສດຖະກິດໂລກ.
ອົງການທ່ອງທ່ຽວແຫ່ງຊາດຍີ່ປຸ່ນກ່າວໃນວັນພຸດວານນີ້ວ່າ ໂຕເລກນັກທ່ອງທ່ຽວ ດັ່ງກ່າວແມ່ນເພີ້ມຂຶ້ນຈາກປີ 2009 ເຖິງ 26.8% ຊຶ່ງເປັນການເພີ້ມຂຶ້ນຢ່າງຫລວງຫລາຍປີທີ
ສອງໃນໄລຍະ 5 ທົດສະວັດຜ່ານມາ ແຕ່ກໍຍັງຕໍ່າກ່ວາເປົ້າໝາຍຂອງລັດຖະບານ ທີ່ແນໃສ່ດຶງດູດນັກທ່ອງທ່ຽວໃຫ້ໄດ້ 10 ລ້ານຄົນໃນປີກາຍນີ້.
ການເພີ້ມຂຶ້ນຂອງຈຳນວນນັກທ່ອງທ່ຽວດັ່ງກ່າວນີ້ ແມ່ນມີຂຶ້ນລຸນຫລັງການຫລຸດລົງເຖິງ 18.7% ໃນປີ 2009 ທີ່ມີການໃຫ້ເຫດຜົນວ່າ ເປັນຍ້ອນສະພາບເສດຖະກິດໂລກຖົດຖອຍນັ້ນ.
ນັກທ່ອງທ່ຽວຈາກເກົາຫລີໃຕ້ແມ່ນປະກອບເປັນກຸ່ມໃຫຍ່ທີ່ສຸດທີ່ໄປທ່ຽວຍີ່ປຸ່ນໃນ ປີກາຍນີ້ ໂດຍມີຈຳນວນນັກທ່ອງທ່ຽວ 2 ລ້ານ 4 ແສນ 4 ໝື່ນຄົນ, ຕິດຕາມດ້ວຍຈີນ ທີ່ມີນັກທ່ອງທ່ຽວໄປຍີ່ປຸ່ນ 1 ລ້ານ 4 ແສນ 1 ໝື່ນຄົນ ແລະໄຕ້ຫວັນມາໃນອັນດັບ 3 ໂດຍມີຄົນໄປທ່ຽວຍີ່ປຸ່ນ 1 ລ້ານ 2 ແສນ 7 ໝື່ນຄົນ.
ຝຣັ່ງ, ມາເລເຊຍ, ສິງກະໂປ ແລະໄທ ກໍໄດ້ສົ່ງນັກທ່ອງທ່ຽວຈຳນວນຫລາຍໄປຍັງຍີ່ປຸ່ນໃນ ປີກາຍນີ້.
