ພວກພະນັກງານຊ້ອຍກູ້ໄພຍີ່ປຸ່ນໄດ້ທໍາການຊອກຄົ້ນນໍາຂີ້ຕົມແລະຊາກຫັກພັງໃນວັນຈັນມື້ນີ້ ເພື່ອຊອກຫາປະຊາຊົນຈໍານວນຫລາຍສິບຄົນທີ່ ຍັງຫາຍສາບສູນໄປຢູ່ ຫລັງຈາກລົມໄຕ້ຝຸ່ນ Talas ໄດ້ພັດເຂົ້າຖະຫລົ່ມ ຝັ່ງທະເລພາກຕາເວັນຕົກຂອງຍີ່ປຸ່ນຢ່າງໜັກ.
ສື່ມວນຊົນຍີ່ປຸ່ນລາຍງານວ່າ ມີຜູ້ເສຍຊີວິດໄປແລ້ວ 27 ຄົນແລະ 50 ກວ່າຄົນຍັງຫາຍສາບສູນ ຍ້ອນໄພນໍ້າຖ້ວມແລະດິນເຈື່ອນທັບ ທີ່ເກີດຈາກພາຍຸທາລັສ ຊຶ່ງນັບວ່າເປັນລົມພາຍຸທີ່ເຮັດໃຫ້ມີຜູ້ເສຍຊີວິດຫລາຍ ທີ່ສຸດໃນຍີ່ປຸ່ນໃນຮອບ 7 ປີຜ່ານມາ. ປະຊາຊົນຈໍານວນຫລາຍພັນຄົນຕື່ມອີກໄດ້ຖືກໂດດດ່ຽວຍ້ອນນໍ້າຖ້ວມ ທີ່ໄດ້ພັດຖະໜົນຫົນທາງຫລາຍສາຍ ແລະຂົວຫລາຍແຫ່ງ ໄຫລໜີໄປ.
ລົມໄຕ້ຝຸ່ນຫົວນີ້ທີ່ປະທະຍີ່ປຸ່ນໃນວັນເສົາຜ່ານມາ ເປັນວິກິດການທໍາອິດທີ່ປະເຊີນໜ້າທ່ານ Yoshihiko Noda ນາຍົກລັດຖະມົນຕີຄົນໃໝ່ ຂອງຍີ່ປຸ່ນ ທີ່ໄດ້ກ່າວຕໍ່ບັນດານັກຂ່າວໃນວັນຈັນມື້ນີ້ວ່າ ລັດຖະບານຂອງທ່ານຈະເຮັດທຸກສິ່ງທຸກຢ່າງສຸດຄວາມສາມາດ ເພື່ອຊ່ອຍກູ້ຊີວິດຜູ້ຄົນແລະຊອກຫາພວກທີ່ຫາຍສາບສູນໄປນັ້ນ.
