ຍີ່ປຸ່ນ ສົ່ງສໍາພາລະ ໄປຍັງ ສະຖານີ ອະວະກາດ ນາໆຊາດ (ວີດີໂອ)

ຍີ່ປຸ່ນ​ປະສົບ​ຜົນ​ສໍາ​ເລັດ ​ໃນ​ການ​ຍິງ​ຈະຫຼວດ ທີ່​ບັນທຸກ​ສໍາພາລະ​ຕ່າງໆ​ຂຶ້ນ​ໄປ​ຍັງ ສະຖານີ​ອະ​ວະ​ກາດນາ​ໆຊາດ ​ໂຮມ​ທັງ​ ໄດ້​ສົ່ງຫຸ່ນ​ຍົນ​ນ້ອຍ​ອັນນຶ່ງ ສໍາລັບນັກບິນ​ອະ​ວະ​ກາດ​ຂອງ​ຍີ່ປຸ່ນ​ ທີ່​ຈະ​ຂຶ້ນ​ໄປ​ປະຕິບັດງານ​ໃນ​ທ້າຍ​ປີນີ້.

ບັນດາ​ເຈົ້າໜ້າ​ທີ່ປະ​ຈໍາ​ອົງການ​ສໍາຫຼວດອະ​ວະ​ກາດ​ຍີ່ປຸ່ນ ​ເວົ້າ​ວ່າ ຈະຫຼວດ H2B ຊຶ່ງ​ບັນ ທຸກ​ອາຫານ ນໍ້າ ແລະ​ສະບຽງ​ອື່ນໆ​ ໄດ້​ທະຍານ​ຂຶ້ນຈາກເກາະ Tanegashima ​ໃນ​ຕອນ​ເຊົ້າໆ​ວັນ​ອາທິດ ມື້​ນີ້.

ທີ່​ລວມຢູ່​ໃນ​ສໍາ​ພາ​ລະ​ດັ່ງກ່າວ​ນັ້ນ ກໍ​ມີ​ຫຸ່ນ​ຍົນ​ນ້ອຍ​ອັນ​ນຶ່ງ ທີ່​ໃຫ້​ຊື່ວ່າ Kirobo ຊຶ່ງ​ຈະ​ໃຊ້​ເປັນ​ຕົວ​ຮ່ວມ​ປະຕິບັດ​ງານ ​ສໍາລັບ​ນັກ​ອະວະ​ກາດ Koichi Wakata ຜູ້​ທີ່​ຈະ​ຂຶ້ນ​ໄປ​ຮ່ວມ​ທີ​ມງານ ​ໃນ​ທ້າຍ​ປີ​ນີ້.

ຫຸ່ນ​ຍົນ​ນ້ອຍ​ດັ່ງ​ກ່າວ ມີ​ຄວາມ​ສູງ 34 ​ຊັງ​ຕີ​ແມັດ ສາມາດ​ເວົ້າ​ພາສາ​ຍີ່ປຸ່ນ​ໄດ້ ​ແລະຖືກ​ອອກ​ແບບ ​ໃຫ້ເປັນ​ຕົວສ້າງ​ກໍາລັງ​ໃຈ ​ແກ່​ຜູ້​ຄົນ​ທີ່ຢູ່​ໂດດດ່ຽວ ມາເປັນ​ເວລາ​ດົນ​ນານ​ນັ້ນ ​ໄດ້​ນໍາ.