ມີການຢືນສະຫງົບສະຕິອາລົມ ເພື່ອເປັນການໄວ້ອາໄລຢູ່ທີ່
ປະເທດຍີ່ປຸ່ນ ນຶ່ງອາທິດລຸນຫຼັງທີ່ໄດ້ເກີດແຜ່ນດິນໄຫວຂະ
ໜາດແຮງແລະຟອງຍັກສຸນາມິທີ່ເຮັດໃຫ້ມີຜູ້ເສຍຊີວິດຫຼາຍ
ກວ່າ 6,400 ຄົນ.
ກົມຕຳຫຼວດແຫ່ງຊາດຂອງຍີ່ປຸ່ນ ໄດ້ປະກາດໃຫ້ຊາບກ່ຽວ
ກັບໂຕເລກໃໝ່ຂອງພວກທີ່ເສຍຊີວິດໃນວັນສຸກມື້ນີ້ຂະນະ
ທີ່ພວກກູ້ໄພ ຍັງສືບຕໍ່ດຳເນີນງານ ສ້ອມແປງຖະໜົນຫົນ
ທາງທີ່ໄດ້ຮັບຄວາມເສຍຫາຍແລະຊອກຄົ້ນຫາພວກທີ່ຍັງ
ຫາຍສາບສູນ ອີກຫຼາຍພັນຄົນ ໃນເຂດທີ່ປະສົບໄພພິບັດ
ຮ້າຍແຮງດັ່ງກ່າວຂອງຍີ່ປຸ່ນ.
ລັດຖະບານຂອງປະເທດຕ່າງໆໄດ້ຍົກຍ້າຍປະຊາຊົນຂອງຕົນອອກຈາກປະເທດຍີ່ປຸ່ນແລະ
ກະຊວງການຕ່າງປະເທດສະຫະລັດກ່າວວ່າ ຖ້ຽວບິນທຳອິດທີ່ບັນທຸກພວກທີ່ຖືກຍົກຍ້າຍ
ຊາວອະເມຣິກັນ ໄດ້ອອກເດີນທາງຈາກຍີ່ປຸ່ນໃນວັນພະຫັດວານນີ້.
ຮອງລັດຖະມົນຕີກະຊວງການຕ່າງປະເທດສະຫະລັດ ທ່ານ Patrick Kennedy ກ່າວວ່າ ຖ້ຽວບິນທີ່ມຸ່ງໜ້າໄປຍັງໄຕ້ຫວັນດັ່ງກ່າວບັນທຸກເກືອບ 100 ຄົນ ສ່ວນໃຫຍ່ແລ້ວແມ່ນສະ ມາຊິກໃນຄອບຄົວຂອງພວກເຈົ້າໜ້າທີ່ສະຫະລັດ. ອີກຖ້ຽວບິນນຶ່ງມີກຳນົດທີ່ຈະອອກເດີນ
ທາງໃນວັນສຸກມື້ນີ້. ກະຊວງຕ່າງປະເທດສະຫະລັດບໍ່ໄດ້ມີຄຳສັ່ງ ໃຫ້ຜູ້ຄົນອົບພະຍົບອອກ
ຈາກຍີ່ປຸ່ນ ແຕ່ໄດ້ຈັດຖ້ຽວບິນໄວ້ ສຳລັບພວກທີ່ປະສົງຢາກຈະອອກໄປຈາກຍີ່ປຸ່ນ.
ສະຫະລັດໄດ້ເຕືອນປະຊາຊົນຂອງຕົນ ກ່ຽວກັບສະຖານະການທີ່ພວມຊຸດໂຊມລົງຢູ່ທີ່ໂຮງ
ໄຟຟ້ານິວເຄລຍທີ່ປະສົບບັນຫາ Fukushima Dai-Ichi ແລະມີຄຳສັ່ງໃຫ້ຊາວອະເມຣິກັນ ຢູ່ຫ່າງຈາກໂຮງໄຟຟ້າດັ່ງກ່າວຢ່າງນ້ອຍ 80 ຫຼັກກິໂລແມັດ.
ໃນວັນພະຫັດວານນີ້ປະທານາທິບໍດີສະຫະລັດທ່ານບາຣັກໂອບາມາ ໄດ້ກ່າວປ້ອງກັນກ່ຽວ
ກັບເຂດທີ່ໄດ້ມີການສະເໜີ ໃຫ້ຊາວອະເມຣິກັນ ຢູ່ຫ່າງຈາກໂຮງໄຟຟ້າທີ່ມີບັນຫາ ເຖິງແມ່ນ
ເຂດດັ່ງກ່າວນີ້ໃຫຍ່ກວ່າເຂດທີ່ທາງເຈົ້າໜ້າທີ່ຍີ່ປຸ່ນໄດ້ແນະນຳໄປນັ້ນກໍຈິງ ທ່ານກ່າວຕໍ່ພວກ
ນັກຂ່າວວ່າ ການຕັດສິນໃຈຂອງສະຫະລັດ ແມ່ນອີງຕາມການຊັ່ງຊາຕີລາຄາທາງດ້ານວິທະ
ຍາສາດຢ່າງລະມັດລະວັງ.
ອັງກິດ ຈີນແລະຝຣັ່ງແມ່ນສ່ວນນຶ່ງຂອງລັດຖະບານປະເທດຕ່າງໆທີ່ໄດ້ຈັດແຈງສົ່ງປະຊາຊົນ
ຂອງຕົນອອກຈາກປະເທດຍີ່ປຸ່ນ.
