ລິ້ງ ສຳຫລັບເຂົ້າຫາ

ວັນຈັນ, 03 ຕຸລາ 2022

ບ່ອນຫຼົບໄພຂອງຍີ່ປຸ່ນ ບໍ່ມີນໍ້າ ແລະອາຫານພຽງພໍ (ເບິ່ງສະລາຍດ໌)


ຜູ້ຫຼົບໄພຊາວຍີ່ປຸ່ນ ພັກເຊົາຊົ່ວຄາວ ທີ່ເດີ່ນບານບ້ວງ ໂຮງຮຽນມັດທະຍົມ Koriyama ແຂວງ Fukushima (16 ມີນາ 2011)

ເຈົ້າໜ້າທີ່ຍີ່ປຸ່ນລາຍງານວ່າ ມີບັນຫາເພີ່ມຂຶ້ນໃນການຈັດ
ສົ່ງອາຫານແລະນໍ້າດື່ມໄປໃຫ້ປະຊາຊົນຈຳນວນຫຼາຍຮ້ອຍ
ພັນຄົນທີ່ຍັງພັກຢູ່ບ່ອນຫຼົບໄພຊົ່ວຄາວ ນຶ່ງອາທິດລຸນຫຼັງ
ທີ່ໄດ້ເກີດແຜ່ນດິນໄຫວຂະໜາດແຮງເປັນປະວັດການຢູ່ໃນ
ປະເທດດັ່ງກ່າວທີ່ກໍ່ໃຫ້ເກີດຟອງຍັກສຸນາມິຮ້າຍແຮງນັ້ນ.

ອຸນຫະພູມທີ່ຫຼຸດຕໍ່າລົງ ແລະຫິມະຕົກ ແມ່ນປະກອບເປັນ
ບັນຫາເພີ່ມຕື່ມຂະນະທີ່ຄວາມຫວັງພວມຄ່ອຍໆຈາງຫາຍ
ໄປໃນການທີ່ຈະພົບເຫັນຜູ້ລອດຊີວິດມາໄດ້ຕື່ມອີກໃນ​ເຂດ
ທີ່ຍັງເຫຼືອຂອງປະຊາຄົມແຄມຝັ່ງທະເລ ທີ່ໄດ້ຖືກທຳລາຍ
ໂດຍຟອງຍັກສຸນາມິໃນມື້ວັນສຸກແລ້ວນັ້ນ. ພວກກູ້ໄພ
ຂອງສະຫະລັດທີ່ໄດ້ປະຕິບັດງານຢູ່ທີ່ຫົວເມືອງແຄມທະເລ
ແຫ່ງນຶ່ງກ່າວໃນວັນພະຫັດມື້ນີ້ວ່າ ຕົນບໍ່ໄດ້ພົບເຫັນຜູ້ໃດ
ລອດຊີວິດມາໄດ້.

ໂຕເລກຜູ້ເສຍຊີວິດພວມເພີ່ມສູງຂຶ້ນ ຂະນະທີ່ພວກກູ້ໄພ
ບຸກເຂົ້າໄປເທື່ອລະເລັກລະນ້ອຍ ຫາບັນດາປະຊາຄົມທີ່
ໄດ້ຖືກຕັດຂາດ ນັບແຕ່ໄດ້ເກີດແຜ່ນດິນໄຫວຍ້ອນຖະໜົນຫົນທາງທ່າກຳປັ່ນແລະໂຄງລ່າງ
ພື້ນຖານອື່ນໆໄດ້ຮັບຄວາມເສຍຫາຍຢ່າງໜັກ. ກົມຕຳຫຼວດແຫ່ງຊາດຂອງຍີ່ປຸ່ນ​ໄດ້ປະກາດ ໃຫ້ຊາບກ່ຽວກັບໂຕເລກຜູ້ເສຍຊີວິດໃນຕອນທ່ຽງວັນພະຫັດມື້ນີ້ ວ່າ​ມີຈຳນວນຫຼາຍກວ່າ
5,300 ຄົນແລະຍັງຫາຍສາບສູນ 9,300 ກວ່າຄົນ.

ສື່ມວນຊົນຂອງຍີ່ປຸ່ນກ່າວວ່າ ຍັງມີອີກຫຼາຍກວ່າ 20,000 ຄົນຕົກຄ້າງຢູ່ຕາມຊາກຫັກພັງ ແລະພວມລໍຖ້າການຊ່ອຍເຫຼືອຢູ່ໃນເວລານີ້.

ເຈົ້າໜ້າທີ່ກະຊວງກະເສດຂອງຍີ່ປຸ່ນກ່າວວ່າຕົນບໍ່ສາມາດຈັດສົ່ງປັດໄຈຕ່າງໆໃນປະລິມານ
ທີ່ພຽງພໍໄປໃຫ້ປະຊາຊົນຫຼາຍກວ່າ 5 ແສນຄົນ ທີ່ພັກຢູ່ຕາມບ່ອນຫຼົບໄພຊົ່ວຄາວໃນເຂດ
ພາກຕາເວັນອອກສຽງເໜືອຂອງປະເທດ ຍ້ອນມີການຂາດແຄນນໍ້າມັນ ແລະໂຄງລ່າງພື້ນ
ຖານທີ່ໄດ້ຮັບຄວາມເສຍຫາຍ. ພວກເຈົ້າໜ້າທີ່ເວົ້າວ່າ ໄດ້ມີການຈັດສົ່ງອາຫານ 1 ລ້ານ
2 ແສນ 5 ໝື່ນຄາບແລະນໍ້າເກືອບ 7 ແສນ 5 ໝື່ນແກ້ວໄປໃຫ້ 5 ແຂວງທີ່ໄດ້ຮັບຜົນ
ກະທົບ ຕັ້ງແຕ່ວັນເສົາແລ້ວມາຫາວັນອັງຄານ ແຕ່ປະລິມານດັ່ງກ່າວແມ່ນຍັງບໍ່ພຽງພໍກັບ
ຄວາມຕ້ອງການ.

XS
SM
MD
LG