ໃນວັນພະຫັດມື້ນີ້ ບັນດາເຈົ້າໜ້າທີ່ຍີ່ປຸ່ນແຈ້ງໃຫ້ຊາບວ່າ ໄດ້ພົບເຫັນກໍາມັນຕະພາບລັງສີໃນລະດັບສູງສຸດທີ່ບໍ່ເຄີຍເຫັນມາກ່ອນໃນມະຫາສະໝຸດຢູ່ໃກ້ໆກັບໂຮງໄຟຟ້ານີວເຄລຍທີ່ໄດ້ຮັບຄວາມເສຍຫາຍນັ້ນ.
ຄໍາປະກາດໃຫ້ຮູ້ທີ່ວ່ານີ້ໄດ້ສ້າງຄວາມຢ້ານກົວຂຶ້ນກ່ຽວກັບການຮົ່ວໄຫລອອກມາຂອງກໍາມັນຕະພາບລົງສີທີ່ຍັງບໍ່ທັນຮູ້ວ່າມັນອອກມາຈາກໃສແລະສົ່ງກໍາມັນຕະພາບລັງສີອອກມາຫລາຍ
ຮູບແບບ ນັບແຕ່ລະບົບທໍາຄວາມເຢັນໄດ້ຮັບຄວາມເສຍຫາຍຈາກໄພແຜ່ນດິນໄຫວແລະຄື້ນ
ຟອງຍັກສຸນາມິທີ່ຮ້າຍແຮງ ໄດ້ເກືອບ 3 ອາທິດຜ່ານມານັ້ນໄດ້.
ທາງການຍີ່ປຸ່ນກ່າວວ່າ ພວກຕົນຈະຕ້ອງໄດ້ພິຈາລະນາຂະຫຍາຍລັດສະໝີ 20 ຫລັກກີໂລແມັດໃນການອົບພະຍົບຜູ້ຄົນໃນເຂດອ້ອມແອ້ມໂຮງໄຟຟ້ານີວເຄລຍ Fukushima ນັ້ນອອກໄປອີກ ຖ້າຍັງກວດເຫັນລະດັບກໍາມັນຕະພາບລັງສີສູງຢູ່ໃນໜູ່ບ້ານແຫ່ງນຶ່ງທີ່ຕັ້ງຢູ່ຫ່າງຈາກໂຮງໄຟຟ້າອອກໄປ 40 ຫລັກກິໂລແມັດນັ້ນ. ແຕ່ທ່ານ Yukio Edano ຫົວໜ້າກອງເລຂາປະຈໍາຄະນະລັດຖະບານກ່າວຕໍ່ບັນດານັກຂ່າວໃນວັນພະຫັດມື້ນີ້ວ່າ ລະດັບກໍາມັນຕະພາບລັງສີ ທີ່ສູງກວ່າລະດັບມາດຕະຖານສາກົນ 2 ເທົ່າສໍາລັບການໃຫ້ຜູ້ຄົນອົບພະຍົບ
ອອກນັ້ນ ຍັງບໍ່ທັນເປັນໄພຂົ່ມຂູ່ຕໍ່ສຸຂະພາບຂອງຜູ້ຄົນເທື່ອໃນເວລານີ້.
ພວກຄວມຄຸມໂຮງໄຟຟ້າແຈ້ງໃຫ້ຊາບເຖິງຄວາມຄືບໜ້າແດ່ເລັກນ້ອຍໃນການປໍ້ານໍ້າແປດເປື້ອນເປັນພິດຢ່າງສູງອອກຈາກຫ້ອງໃຕ້ດິນແລະອຸໂມງເກັບມ້ຽນເຄື່ອງໃຊ້ສອຍທີ່ຢູ່ໃກ້ຄຽງກັນໃນ 3 ເຕົາແຍກນີວເຄລຍໃນເຕົາແຍກນີວເຄລຍທັງໝົດ 6 ໜ່ວຍນັ້ນ. ຈະຕ້ອງໄດ້ປໍ້ານໍ້ານີ້ອອກກ່ອນ ກ່ອນພວກພະນັກງານຈະສາມາດສ້ອມແປງພວກປໍ້ານໍ້າຕ່າງໆທີ່ແລ່ນລະບົບທໍາຄວາມເຢັນທີ່ສໍາຄັນທີ່ສຸດນັ້ນ.
ປະທານາທິບໍດີຝຣັ່ງ ທ່ານ Nicholas Zarkozy ເດີນທາງໄປຮອດກຸງໂຕກຽວແລ້ວໃນຕອນບ່າຍວັນພະຫັດມື້ນີ້ ເພື່ອສະແດງຄວາມເປັນເອກະພາບກັນກັບປະຊາຊົນຍີ່ປຸ່ນ. ຝຣັ່ງ ຊຶ່ງເປັນປະເທດທີ່ອາໄສພະລັງນີວເຄລຍຫລາຍທີ່ສຸດໃນໂລກ ໄດ້ສົ່ງພວກນັກຊ່ຽວຊານໄປຊ່ອຍວຽກໃນໂຮງໄຟຟ້ານິວເຄລຍທີ່ມີບັນຫາຂອງຍີ່ປຸ່ນນັ້ນແລ້ວ.
ໃນແຫ່ງອື່ນໆອີກ ຈໍານວນໂຕເລກທີ່ໄດ້ຮັບການຢືນຢັນກ່ຽວກັບພວກທີ່ເສຍຊີວິດຍ້ອນໄພແຜ່ນດິນໄຫວແລະຄື້ນຟອງສຸນາມິໃນວັນທີ 11 ເດືອນນີ້ແມ່ນສູງກວ່າ 11 ພັນ 400 ຄົນແລະຫລາຍກວ່າ 16 ພັນ500 ຄົນຍັງຫາຍສາບສູນຢູ່. ອົງການຂ່າວ Kyodo ຂອງຍີ່
ປຸ່ນ ແຈ້ງໃຫ້ຊາບວ່າ ທາງການຍີ່ປຸ່ນບໍ່ສາມາດເກັບກູ້ພວກຊາກສົບຂອງຜູ້ຄົນຈໍານວນຫລາຍ ເຖິງ 1000 ສົບທີ່ໄດ້ເສຍຊີວິດໄປຍ້ອນກໍາມັນຕະພາບລັງສີທີ່ແປດເປື້ອນຢູ່ໃນເຂດລັດສະໝີໃຫ້ຜູ້ຄົນອົບພະຍົບອອກນັ້ນໄດ້.
