ບໍລິສັດໄຟຟ້າໂຕກຽວກ່າວວ່າ ໄດ້ມີການຍົກຍ້າຍພວກ
ພະນັກງານອອກຈາກອາຄານຂອງເຕົາແຍກນີວເຄລຍ
ໜ່ວຍນຶ່ງໃນວັນອາທິດມື້ນີ້ ຫລັງຈາກໄດ້ກວດພົບເຫັນ
ກໍາມັນຕະພາບລັງສີໃນລະດັບທີ່ສູງຫລາຍ.
ໂຄສົກບໍລິສັດໄຟຟ້າ TEPCO ກ່າວຕໍ່ບັນດານັກຂ່າວວ່າ
ກໍາມັນຕະພາບລັງສີໄດ້ເພີ່ມຂຶ້ນສູງກວ່າລະດັບທໍາມະດາ
10 ລ້ານເທົ່າຢູ່ໃນນໍ້າທີ່ ໄດ້ສະສົມຂຶ້ນໃນບ່ອນຕິດຕັ້ງກັງ
ຫັນສໍາລັບເຕົາແຍກນີວເຄລຍໜ່ວຍທີ 2 ນັ້ນ.
ກ່ອນໜ້ານັ້ນໃນມື້ນີ້ ອົງການຮັກສາຄວາມປອດໄພນີວເຄລຍຂອງຍີ່ປຸ່ນ ກ່າວວ່າ ລະດັບກໍາມັນຕະພາບລັງສີໃນນໍ້າທະເລ ຢູ່ໃກ້ໆໂຮງໄຟຟ້າ Fukushima ທີ່ໄດ້ຮັບຄວາມເສຍຫາຍ ໄດ້ເພີ່ມຂຶ້ນ 1850 ເທົ່າ ສູງກວ່າກໍານົດທີ່ປອດໄພ ຄືສູງຈາກລະດັບ 1200 ໃນວັນເສົາວານນີ້.
ບັນດາເຈົ້າໜ້າທີ່ກ່າວວ່າ ເຂົາເຈົ້າໄດ້ພົບເຫັນລະດັບກໍາມັນຕະພາບລັງສີ Iodine ທີ່ສູງຂຶ້ນນີ້ ໃນນໍ້າໃນມະຫາສະໝຸດປາຊີຟິກ ພາຍໃນວົງລັດສະໜີ 300 ແມັດ ຈາກໂຮງໄຟຟ້າ. ອົງການຮັກສາຄວາມປອດໄພນີວເຄລຍ ກ່າວວ່າ ນໍ້າທະເລເຄິ່ງລີດບັນຈຸກໍາມັນຕະພາບລັງສີໃນປະລິມານເທົ່າໆກັນ ທີ່ຜູ້ຄົນສາມາດຖືກເຜີຍແບໃສ່ໄດ້ຢ່າງປອດໄພເຖິງນຶ່ງປີ.
ເຖິງຢ່າງໃດກໍດີ ພວກເຈົ້າໜ້າທີ່ກ່າວວ່າ ນໍ້າໃນມະຫາສະໝຸດຈະເຮັດໃຫ້ຄວາມແປດເປື້ອນດ້ວຍກໍາມັນຕະພາບລັງສີທີ່ຮ້າຍແຮງສຸດນີ້ ຈືດຈາງໄປໂດຍໄວ ແລະວ່າ ບໍ່ມີໄພຂົ່ມຂູ່ໃນທັນທີນີ້ແຕ່ຢ່າງໃດຕໍ່ຊີວິດຂອງພວກສັດນໍ້າ ຫລືຄວາມປອດໄພຂອງອາຫານທະເລນັ້ນ.
ນໍ້າທະເລທີ່ແປດເປື້ອນນີ້ເປັນຮ່ອງຮອຍຫລ້າສຸດ ທີ່ສະແດງໃຫ້ເຫັນວ່າກໍາມັນຕະພາບລັງສີຈາກໂຮງໄຟຟ້າຍັງແຜ່ລາມອອກໄປຢູ່.
