ສື່ມວນຊົນຍີ່ປຸ່ນກ່າວວ່າ ນໍ້າທໍາຄວາມເຢັນໄດ້ລະເຫີຍອອກ
ແລະຫລອດເຊື້ອໄຟອາດໄດ້ຖືກເຜີຍແບແລະກໍາລັງລະລາຍ
ຢູ່ໃນໂຮງໄຟຟ້ານີວເຄລຍແຫ່ງນຶ່ງໃນພາກເໜືອຂອງປະ
ເທດທີ່ປະທະກັບໄພແຜ່ນດິນໄຫວນັ້ນ.
ວິກິດການໃໝ່ນີ້ແມ່ນເກີດຂຶ້ນທີ່ໂຮງໄຟຟ້ານີວເຄລຍ ໃນ
ເມືອງ Fuku-shima ບ່ອນທີ່ໄດ້ເກີດເຫດລະເບີດໃນຕອນ
ເຊົ້າມື້ນີ້ ທີ່ສົງໄສວ່າເປັນການລະເບີດຂອງທາດ hydrogen
ຊຶ່ງໄດ້ທໍາລາຍຝາຂອງອາຄານຂອງເຕົາແຍກນິວເຄລຍ
ໝາຍເລກ 3 ນັ້ນ. ການລະເບີດໃນທໍານອງດຽວກັນນີ້ ໄດ້ເກີດຂຶ້ນໃນວັນສຸກທີ່ອາຄານຫລັງທີ 1 ໃນໂຮງໄຟຟ້າທີ່ເມືອງ Fukushima ນັ້ນ.
ບັນດາເຈົ້າໜ້າທີ່ກ່າວວ່າ ໂຄງສ້າງອາຄານຫລັງທີ 2 ຍັງດີຢູ່ ແລະວ່າ ອັນຕະລາຍທີ່ວ່າຈະມີການຮົ່ວໄຫລຂອງກໍາມັນຕະພາບລັງສີຢ່າງໃຫຍ່ ນັ້ນ ແມ່ນມີນ້ອຍຫລາຍ. ແຕ່ເວລານີ້ ຍັງບໍ່ເປັນທີ່ແຈ້ງຂາວເທື່ອວ່າ ແມ່ນຫຍັງຈະເກີດຂຶ້ນໃນຂັ້ນຕໍ່ໄປ ຖ້າຫາກມີການລະລາຍທີ່ອາຄານຫລັງທີ 2 ບ່ອນທີ່ບັນດາເຈົ້າໜ້າທີ່ໄດ້ລາຍງານວ່າ ລະບົບທໍາຄວາມເຢັນບໍ່ທໍາງານໃນເຊົ້າມື້ນີ້.
ໄດ້ມີການຍົກຍ້າຍປະຊາຊົນເກືອບຮອດ 2 ແສນຄົນອອກຈາກບໍລິເວນອອ້ມແອ້ມໂຮງໄຟຟ້ານິວເຄລຍ ທີ່ລະບົບທໍາຄວາມເຢັນລົ້ມແຫລວລົງນັ້ນ ແລະພວກນາຍຊ່າງໄດ້ພາກັນຮີບເຮ່ງປ່ອຍອາຍຮ້ອນອອກມາ ແລະພ້ອມດຽວກັນປໍ້ານໍ້າທະເລເຂົ້າໄປໃນຄວາມພະຍາຍາມຢ່າງສຸດຄວາມສາມາດເພື່ອປ້ອງກັນບໍ່ໃຫ້ມີການລະລາຍຂອງນິວເຄລຍ.
ຂະນະດຽວກັນ ຜູ້ບັນຊາການກໍາປັ່ນບັນທຸກເຮືອບິນ USS Ronald Reagan ຂອງສະຫະລັດ ທີ່ໄດ້ໃຫ້ການຊ່ວຍເຫລືອໃນຄວາມພະຍາຍາມກູ້ໄພ ຢູ່ນອກຝັ່ງທະເລຍີ່ປຸ່ນ ໄກອອກໄປປະມານ 160 ຫລັກນັ້ນ ກ່າວວ່າ ທ່ານໄດ້ສັ່ງໃຫ້ຍ້າຍຝູງກໍາປັ່ນຂອງສະຫະລັດ ອອກໄປຫ່າງໄກຈາກໂຮງໄຟຟ້ານິວເຄລຍທີ່ Fukushima ນັ້ນຕື່ມອີກ ຫລັງຈາກມີການພົບເຫັນຝຸ່ນກໍາມັນຕະພາບລັງສີ ໃນລະດັບຕໍ່າ ຢູ່ຕາມເສື້ອຜ້າຂອງລູກເຮືອປະມານ 17 ຄົນ. ທ່ານກ່າວຕື່ມວ່າ ຝຸ່ນກໍາມັນຕະພາບລັງສີດັ່ງກ່າວ ສາມາດລ້າງອອກໄດ້ງ່າຍໆ.
