ນາຍົກລັດຖະມົນຕີຂອງຍີ່ປຸ່ນ ທ່ານຟູມິໂອະ ກິຊິດະ ໄດ້ມີການປັບປຸງຄະນະລັດຖະບານຂອງທ່ານໃນວັນພຸດມື້ນີ້ ໂດຍໄດ້ສັບປ່ຽນລັດຖະມົນຕີຈໍານວນນຶ່ງທີ່ພົວພັນກັບໂບດແຫ່ງຄວາມສາມັກຄີ ຫຼື Unification Church ລຸນຫຼັງທີ່ມີກະແສຕໍ່ຕ້ານລັດຖະບານທີ່ຮຸນແຮງເພີ້ມຂຶ້ນກ່ຽວກັບຄວາມສໍາພັນຂອງພັກລັດ ຖະບານແລະກຸ່ມສາສະໜາດັ່ງກ່າວ ທີ່ສົ່ງຜົນເຮັດໃຫ້ສຽງສະໜັບສະໜຸນຂອງປະຊາຊົນທົ່ວໄປຫຼຸດລົງ, ອີງຕາມລາຍງານຈາກອົງການຂ່າວຣອຍເຕີ.
ທ່ານ ກິຊິດະ ໄດ້ປະກາດຄະນະລັດຖະບານຊຸດໃໝ່ຂອງທ່ານ ເຊິ່ງເປັນການປ່ຽນແປງທີ່ເກີດຂຶ້ນໄວກວ່າທີ່ນັກວິເຄາະໄດ້ຄາດການເອົາໄວ້, ໂດຍເນັ້ນຢໍ້າເຖິງ ຄວາມສໍາພັນຂອງສະມາຊິກສະພາ ກັບຄະນະໂບດ ເຊິ່ງໄດ້ກາຍມາເປັນຄວາມເຊື່ອມເສຍຫຼາຍຂຶ້ນ ລຸນຫຼັງທີ່ທ່ານເຂົ້າກໍາອໍານາດ ບໍ່ເຖິງນຶ່ງປີ.
ສະມາຊິກໃນຄະນະລັດຖະບານທີ່ສໍາຄັນບາງຄົນ ເຊັ່ນວ່າ ລັດຖະມົນຕີກະຊວງການຕ່າງປະເທດ ແລະລັດຖະມົນຕີກະຊວງການເງິນແມ່ນຍັງຄົງດໍາລົງຕໍາແໜ່ງຂອງພວກທ່ານທັງສອງຕໍ່ໄປ. ແຕ່ລັດຖະມົນຕີທິ່ມີຊື່ສຽງຄົນອື່ນໆ ແມ່ນໄດ້ຖືກປົດອອກທັງໝົດ ລວມທັງນ້ອງຊາຍ ຂອງອະດີດນາຍົກລັດຖະມົນຕີທີ່ຖືກລອບສັງຫານ ທ່ານຊິນໂຊະ ອາເບະ ຄືທ່ານໂນບູໂອະ ກິຊິ ເຊິ່ງຖືກປົດອອກຈາກ ຕໍາແໜ່ງລັດຖະມົນຕີກະຊວງປ້ອງກັນປະເທດ.
ຜູ້ຕ້ອງຫາທີ່ສັງຫານທ່ານອາເບະ ກ່າວວ່າ ແມ່ຂອງລາວ ແມ່ນສະມາຊິກຂອງໂບດແຫ່ງຄວາມສາມັກຄີ ໄດ້ລົ້ມລະລາຍ ຍ້ອນການບໍລິຈາກໃຫ້ໂບດ, ແລະກໍຕໍາໜິທ່ານອາເບະ ທີ່ໃຫ້ການສະໜັບສະໜຸນກຸ່ມດັ່ງກ່າວ.
ໃນການສໍາຫຼວດຄວາມຄິດເຫັນຄັ້ງຫຼ້າສຸດພົບວ່າ ການສະໜັບສະໜຸນຂອງທ່ານກິຊິດະ ຫລຸດລົງມາຈາກ 59 ເປີເຊັນເປັນ 46 ເປີເຊັນໃນເວລາພຽງແຕ່ສາມອາທິດແລ້ວນີ້, ສະຖານີໂທລະພາບສາທາລະນະ NHK ເປີດເຜີຍໃນວັນຈັນແລ້ວນີ້ວ່າ ເປັນຄະແນນທີ່ຕໍ່າທີ່ສຸດ ນັບຕັ້ງແຕ່ທ່ານເຂົ້າມາດໍາລົງຕໍາແໜ່ງນາ ຍົກລັດຖະມົນຕີ.
ທ່ານຊິເກໂນບຸ ທາມູຣະ (Shigenobu Tamura), ເຊິ່ງເປັນນັກວິຈານ ທາງດ້ານການເມືອງ ທີ່ເຄີຍເຮັດວຽກ ໃຫ້ພັກເສລີປະຊາທິປັດ ຫຼື LDP ກ່າວວ່າ “ການຕໍາໜິວິຈານກ່ຽວກັບໂບດແຫ່ງຄວາມສາມັກຄີ ໄດ້ສົ່ງຜົນເຮັດໃຫ້ການສະໜັບສະໜຸນລັດຖະບານ ຂອງມະຫາຊົນຫຼຸດລົງຢ່າງຫຼວງຫຼາຍ ແລະເພື່ອຍຸຕິການຫຼຸດລົງຂອງການສະໜັບສະໜຸນດັ່ງກ່າວນັ້ນ ຄືເຫດຜົນອັນສໍາຄັນທີ່ເຮັດໃຫ້ມີການປັບປຸງຄະນະລັດຖະບານ ແລະທ່າທີຕ່າງໆຂອງພັກ.”