ນາຍົກລັດຖະມົນຕີຍີ່ປຸ່ນ ທ່ານ Yoshihiko Noda ໄດ້ຊັບຊ້ອນຄະນະລັດຖະບານຂອງ
ທ່ານໃນວັນສຸກມື້ນີ້ ໃນຄວາມພະຍາຍາມເພື່ອໃຫ້ໄດ້ຮັບຄວາມສະໜັບສະໜຸນຈາກທຸກໆ
ກຸ່ມພາຍໃນພັກ ຕໍ່ແຜນການທີ່ຈະຂຶ້ນພາສີການຂາຍສິນຄ້າຢູ່ໃນປະເທດຍີ່ປຸ່ນ.
ທ່ານ Noda ໄດ້ຊັບປ່ຽນລັດຖະມົນຕີ 5 ທ່ານຢູ່ໃນຄະນະລັດຖະບານ ແຕ່ຢູ່ໃນ 12 ກະ
ຊວງບໍ່ມີການປ່ຽນແປງໃດໆ ຮວມທັງກະຊວງການເງິນແລະກະຊວງການຕ່າງປະເທດ.
ທ່ານ Naoki Tanaka ຈະເຂົ້າຮັບຕຳແໜ່ງແທນທ່ານ Yasuo Ichikawa ເປັນລັດຖະ
ມົນຕີກະຊວງປ້ອງກັນປະເທດໃນຂະນະທີ່ທ່ານ Jin Matsubara ເຂົ້າຮັບຕຳແໜ່ງເປັນ
ລັດຖະມົນຕີກິດຈະການຜູ້ບໍລິໂພກ ແທນທ່ານ Kenji Yamaoka. ລັດຖະມົນຕີທັງສອງ
ທ່ານນີ້ໄດ້ຖືກຕິຕຽນໂດຍພັກຝ່າຍຄ້ານວ່າໃຫ້ຄວາມເຫັນທີ່ບໍ່ເໝາະສົມ.
ນອກນັ້ນແລ້ວທ່ານ Noda ຍັງໄດ້ແຕ່ງຕັ້ງໃຫ້ທ່ານ Katsuya Okada ອະດີດລັດຖະ
ມົນຕີການຕ່າງປະເທດ ທີ່ໄດ້ຮັບການເຄົາລົບນັບຖືຢ່າງກວ້າງຂວາງເປັນຮອງນາຍົກລັດ
ຖະມົນຕີນຳດ້ວຍ. ເປັນທີ່ຄາດກັນວ່າ ນັກການເມືອງອະວຸໂສທ່ານນີ້ຈະເປັນຜູ້ນຳພາໃນ
ການດຳເນີນຄວາມພະຍາຍາມຂອງລັດຖະບານ ເພື່ອຫຼຸດຜ່ອນການຂາດດຸນງົບປະມານ
ໃນຈຳນວນມະຫາສານຂອງຍີ່ປຸ່ນໂດຍທຳການປະຕິຮູບລະບົບຄໍ້າປະກັນສັງຄົມແລະພາ
ສີຂອງປະເທດ.
ໂດຍສະເພາະແລ້ວນັ້ນທ່ານ Noda ແມ່ນພວມພະຍາຍາມຫາທາງເພື່ອໃຫ້ພັກຝ່າຍຄ້ານ
ໃຫ້ການສະໜັບສະໜຸນ ຕໍ່ແຜນການທີ່ປະຊາຊົນບໍ່ນິຍົມ ຊຶ່ງຈະເພີ່ມພາສີການຂາຍສິນຄ້າ
ບໍລິໂພກຂຶ້ນສອງເທົ່າເປັນ 10% ພາຍໃນປີ 2015. ທ່ານໃຫ້ຄຳໝັ້ນສັນຍາວ່າຈະຍື່ນຂໍ້
ສະເໜີດັ່ງກ່າວໃນລະຫວ່າງກອງປະຊຸມສະພາແຫ່ງຊາດທີ່ກຳລັງດຳເນີນຢູ່ໃນເວລານີ້.
