ທ່ານ Yoshihiko Noda ອະດີດລັດຖະມົນຕີການເງິນໄດ້ຮັບການຢືນຢັນຈາກສະພາໃນວັນອັງຄານມື້ນີ້ເປັນນາຍົກລັດຖະມົນຕີຄົນໃໝ່ຂອງຍີ່ປຸ່ນແລະກໍານົດຈະດໍາເນີນການໃນທັນທີ ເພື່ອຄັດເລືອກເອົາຄະນະລັດຖະບານຂອງທ່ານ.
ວຽກບູລິມະສິດຂອງລັດຖະບານໃໝ່ຄາດວ່າ ຈະແມ່ນເລື້ອງການເສດ ຖະກິດທີ່ຕົກຢູ່ໃນສະພາບບໍ່ມີການເຕີບໂຕມາເປັນເວລາດົນນານ ຊຶ່ງໄດ້ຮັບຜົນກະທົບຈາກໄພແຜ່ນດິນໄຫວແລະຄື້ນຟອງຍັກສຸນາມິໃນເດືອນມີນາຜ່ານມາ. ນອກນັ້ນ ທ່ານໂນດະຈະຕ້ອງຮັບມືກັບວິກິດການໂຮງໄຟຟ້ານີວເຄຍ Fukushima ທີ່ຍັງດໍາເນີນສືບຕໍ່ມາທີ່ມີສ່ວນ ຊ່ອຍທໍາລາຍການສະໜັບສະໜຸນຂອງປະຊາຊົນ ຕໍ່ທ່ານນາໂອໂຕກັນ ຜູ້ທີ່ດໍາລົງຕໍາແໜ່ງມາກ່ອນທ່ານນັ້ນ.
ທ່ານໂນດະກ່າວຕໍ່ບັນດານັກຂ່າວກ່ອນການລົງມະຕິຮັບຮອງເອົາທ່ານໃນວັນອັງຄານມື້ນີ້ວ່າ
ທ່ານຄາດວ່າຈະບັນຈຸຕຳແໜ່ງຕ່າງໆໃນພັກລັດຖະບານແລະຕໍາແໜ່ງບັນດາລັດຖະມົນຕີໃນ
ຄະນະລັດຖະບານໃຫ້ທັນເວລາກັບພິທີສາບານໂຕເຂົ້າຮັບຕໍາແໜ່ງນາຍົກລັດຖະມົນຕີໃນ
ທ້າຍສັບປະດານີ້.
ຜູ້ນໍາຄົນໃໝ່ຂອງຍີ່ປຸ່ນຍັງພະຍາຍາມຫາທາງລະງັບບັນຫາໂຕ້ແຍ້ງກັນກ່ຽວກັບຖ້ອຍຖະແຫລງຕອນນຶ່ງຫວ່າງໄວໆຜ່ານມານີ້ທີ່ວ່າ ພວກຜູ້ນໍາໃນປາງສົງຄາມໂລກຄັ້ງທີສອງຂອງຍີ່ປຸ່ນບໍ່ໄດ້ເປັນພວກອາຊະຍາກອນສົງຄາມພາຍໃຕ້ກົດໝາຍຂອງຍີ່ປຸ່ນນັ້ນ ໂດຍກ່າວວ່າ ທ່ານຈະພະຍາຍາມຊອກຫາສາຍພົວພັນທີ່ເປັນຜົນປະໂຫຍດຊຶ່ງກັນແລະກັນກັບພວກປະເທດເພື່ອນບ້ານໃນເອເຊຍຂອງທ່ານນັ້ນ.
ທ່ານໂນດະທີ່ຈະຮັບໜ້າທີ່ເປັນນາຍົກລັດຖະມົນຕີພາງໄປຈົນຮອດມື້ທ່ານສາບານໂຕເຂົ້າຮັບຕໍາແໜ່ງ ຕໍ່ໜ້າເຈົ້າຈັກກະພັດ Akihito ຈະເປັນນາຍົກລັດຖະມົນຕີຄົນທີ 6 ຂອງຍີ່ປຸ່ນໃນຮອບ 5 ປີຜ່ານມາ. ທ່ານໂນດະມີຊື່ສຽງວ່າເປັນຜູ້ມີຫົວປະຢັດມັດທະຍັດໃນດ້ານງົບປະມານ ຊຶ່ງອາດຈະສາມາດດໍາເນີນງານໄດ້ດີກວ່າທ່ານ Naoto Kan ກັບຝ່າຍຄ້ານຫົວນິຍົມແນວ ທາງເດີມນັ້ນ.
