ລິ້ງ ສຳຫລັບເຂົ້າຫາ

ວັນເສົາ, ໑໓ ກໍລະກົດ ໒໐໒໔

ຍີ່ປຸ່ນ ແລະ ຟີລິບປິນ ລົງນາມຂໍ້ຕ້ອງລົງດ້ານຄວາມໝັ້ນຄົງ ໃນການປະເຊີນໜ້າກັບສັນ​ຍານເຕືອນໄ​ພຮ່ວມກັນກ່ຽວກັບ ຈີນ


ລັດຖະມົນຕີການຕ່າງປະເທດຍີ່ປຸ່ນ ທ່ານນາງ ໂຢໂກະ ກາມີກາວາ ແລະລັດຖະມົນຕີປ້ອງກັນປະເທດຟີລິບປິນ ທ່ານ ກິລເບີໂຕ ຕີໂອໂດໂຣ ຈັບມືກັນລຸນຫຼັງການເຊັນລົງນາມຂໍ້ຕົກລົງໃນການເຂົ້າເຖິງເຊິ່ງກັນ ແລະກັນ ຢູ່ທີ່ພະລາດຊະວັງ ມາລາການັງ (Malacanang) ໃນນະຄອນຫຼວງມະນິລາ, ວັນທີ 8 ກໍລະກົດ 2024.
ລັດຖະມົນຕີການຕ່າງປະເທດຍີ່ປຸ່ນ ທ່ານນາງ ໂຢໂກະ ກາມີກາວາ ແລະລັດຖະມົນຕີປ້ອງກັນປະເທດຟີລິບປິນ ທ່ານ ກິລເບີໂຕ ຕີໂອໂດໂຣ ຈັບມືກັນລຸນຫຼັງການເຊັນລົງນາມຂໍ້ຕົກລົງໃນການເຂົ້າເຖິງເຊິ່ງກັນ ແລະກັນ ຢູ່ທີ່ພະລາດຊະວັງ ມາລາການັງ (Malacanang) ໃນນະຄອນຫຼວງມະນິລາ, ວັນທີ 8 ກໍລະກົດ 2024.

ຍີ່ປຸ່ນ ແລະ ຟີລິບປິນ ໄດ້ເຊັນລົງນາມໃນຂໍ້ຕົກລົງດ້ານຄວາມໝັ້ນຄົງແຫ່ງຊາດ ສະບັບນຶ່ງໃນວັນຈັນມື້ນີ້, ເຊິ່ງຈະອະນຸຍາດໃຫ້ ຍີ່ປຸ່ນ ສົ່ງກອງກໍາລັງເຂົ້າໃນ ການຊ້ອມລົບຮ່ວມກັນ, ລວມທັງການຊ້ອມລົບຍິງປືນແທ້ຢູ່ໃນຂົງເຂດປະເທດ ເອເຊຍຕາເວັນອອກສຽງໃຕ້ແຫ່ງນີ້ ທີ່ເຄີຍຕົກຢູ່ພາຍໃຕ້ການຍຶດຄອງທີ່ໂຫດ ຮ້າຍຂອງ ຍີ່ປຸ່ນ ໃນຊ່ວງສົງຄາມໂລກຄັ້ງທີ 2, ແຕ່ປັດຈຸບັນ ກຳລັງມີການ ສ້າງພັນທະມິດກັບ ໂຕກຽວ ໃນຂະນະທີ່ພວກເຂົາເຈົ້າຕ້ອງປະເຊີນກັບການ ຮຸກຮານຂອງ ຈີນ ນັບມື້ເພີ້ມຂຶ້ນ.

ສັນຍາ​ການ​ເຂົ້າ​ເຖິງ​ເຊິ່ງກັນ ​ແລະ​ກັນ, ​ເຊັ່ນດຽວກັບ​ການ​ອະນຸຍາດ​ໃຫ້​ກອງ ກຳລັງຂອງ ​ຟີ​ລິບ​ປິນ ໄດ້​ເຂົ້າ​ໄປໃນ​ ຍີ່ປຸ່ນ ​ເພື່ອ​ດໍາເນີນ​ການ​ຊ້ອມ​ລົບ​ຮ່ວມກັນ​ນັ້ນ ​ໄດ້ທໍາການ​ລົງ​ນາມ​ໂດຍ​ລັດຖະມົນຕີ​ປ້ອງ​ກັນ​ປະ​ເທດ​ຟີ​ລິບ​ປິນ ທ່ານ ກິລເບີໂຕ ຕີໂອໂດໂຣ ​ແລະ​ລັດຖະມົນຕີ​ການ​ຕ່າງປະ​ເທດ​ຍີ່ປຸ່ນ ທ່ານນາງ ໂຢໂກະ ຄາມິຄາວະ ຢູ່ທີ່​ພິທີ​ໃນ​ນະຄອນຫຼວງ​ມະ​ນີລາ​ ເຊິ່ງ​ເປັນ​ສັກຂີ​ພິຍານ​ໂດຍ​ປະທານາທິບໍດີ ທ່ານ ເຟີດີນານ ມາໂກສ ຈູເນ່ຍ. ຂໍ້ຕົກລົງດັ່ງກ່າວ ຈະມີຜົນບັງຄັບໃຊ້ຫຼັງຈາກການໃຫ້ສັດຕະຍາບັນໂດຍສະພານິຕິບັນຍັດຂອງ ປະເທດທັງສອງ, ອີງຕາມການກ່າວຂອງບັນດາ​ເຈົ້າ​ໜ້າ​ທີ່​ ຟີ​ລິບ​ປິນ ​ແລະ ຍີ່ປຸ່ນ.

ທ່ານນາງ ຄາ​ມິ​ຄາ​ວະ ຮ້ອງ​ການ​ລົງ​ນາມ​ໃນ​ຂໍ້​ຕົກ​ລົງ​ດ້ານ​ຄວາມໝັ້ນຄົງນີ້ວ່າ “ເປັນ​ຜົນ​ສຳ​ເລັດ​ອັນກ້າວໜ້າ” ທີ່​ຄວນ​ຊຸກ​ຍູ້​ການ​ຮ່ວມ​ມື​ດ້ານ​ຄວາມໝັ້ນຄົງ​ລະ​ຫວ່າງ ຍີ່​ປຸ່ນ ແລະ ຟີ​ລິບ​ປິນ ໃຫ້ເພີ້ມຂຶ້ນ.

ທ່ານ​ນາງ​ກ່າວ​ວ່າ “ຄວາມ​ເປັນ​ລະບຽບ​ຮຽບຮ້ອຍ​ສາກົນ​ທີ່​ເສລີ ​ແລະ​ເປີດ​ກວ້າງ​ບົນພື້ນຖານຂອງ​ກົດໝາຍ ​ແມ່ນ​ພື້ນຖານ​ຂອງ​ສັນຕິພາບ​ ແລະ​ຄວາມ​ຈະ​ເລີ​ນຮຸ່ງ​ເຮືອງ​ຢູ່ໃນ​ພາກ​ພື້ນ, ພວກເຮົາຕ້ອງການທີ່ຈະດໍາເນີນງານຮ່ວມມືກັບ ປະເທດຂອງທ່ານຢ່າງໃກ້ຊິດ ເພື່ອຮັກສາ ແລະເສີມຂະຫຍາຍວຽກງານ ດັ່ງກ່າວ.”

ທ່ານນາງ ຄາ​ມິ​ຄາ​ວະ ​ແລະ​ລັດຖະມົນຕີ​ປ້ອງ​ກັນ​ປະ​ເທດ​ຍີ່​ປຸ່ນ ທ່ານ ມິ​ໂນ​ຣຸ ຄິ​ຮາ​ຣະ ​ໄດ້ຈັດການ​ເຈລະຈາ​ກັບ​ຄູ່​ຕຳ​ແໜ່​ງຟີ​ລິບ​ປິນຂອງພວກທ່ານ ​ເພື່ອ​ແນ ເປົ້າໝາຍໃສ່ການ​ຮັດ​ແໜ້ນ​ສາຍ​ພົວພັນ​ລະຫວ່າງ​ສອງ​ປະ​ເທດໃຫ້ແໜ້ນແຟ້ນ ຍິ່ງຂຶ້ນ.

ຂໍ້ຕົກລົງສັນຍາ​ດ້ານຄວາມໝັ້ນຄົງທີ່ໄດ້ລົງນາມ​ກັບ ​ຟີ​ລິບ​ປິນ ​ແມ່ນ​ສັນຍາ​ສະບັບ​ທຳ​ອິດ​ທີ່​ສ້າງ​ຂຶ້ນໂດຍ ຍີ່ປຸ່ນ ​ຢູ່ໃນຂົງເຂດ​ເອເຊຍ, ເຊິ່ງ ຍີ່ປຸ່ນ​ ໄດ້​ເຊັນ​ລົງນາມສັນຍາ​ທີ່​ຄ້າຍຄື​ກັນນີ້​ກັບ ​ອອສເຕຣເລຍ ​ໃນ​ປີ 2022 ​ແລະ ເຊັນລົງ ນາມກັບ​ ​ອັງກິດ ​ໃນ​ປີ 2023.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG