ນັກເຄື່ອນໄຫວ ຕໍ່ຕ້ານການລ່າ ປາບາແລນ ຊາວນິວຊີແລນ ຄົນນຶ່ງ ໄດ້ຖືກຕັດສິນວ່າ ມີຄວາມຜິດ ໃນຂໍ້ຫາ ພະຍາຍາມ ລົບກວນ ເຮືອລ່າປາບາແລນ ຂອງຍີ່ປຸ່ນ ໃນເຂດມະຫາສະມຸດ ແອນຕາກຕິກ ທີ່ຂວັ້ນໂລກໃຕ້.
ສານແຫ່ງນຶ່ງ ທີ່ກຸງໂຕກຽວ ໄດ້ຕັດສິນໂທດ ນາຍ PETER BETHUNE ໃຫ້ຈຳຄຸກ ເປັນເວລາ 2 ປີ ແຕ່ໄດ້ຝາກໂທດໄວ້ ເປັນເວລາ 5 ປີ.
ນາຍ BETHUNE ໄດ້ຖືກຟ້ອງ ໃນຂໍ້ຫາ ແກວ່ງລະເບີດ ທີ່ມີກິ່ນເໝັນ ເຮັດຈາກ ນໍ້າມັນເບີເນົ່າ ຂຶ້ນໄປເທິງກຳປັ່ນ SHONAN MARU 2 ຂອງຍີ່ປຸ່ນ ໃນລະຫວ່າງ ການລ່າປາບາແລນ ເມື່ອເດືອນກຸມພາ ປີນີ້ ທີ່ເຮັດໃຫ້ລູກເຮືອ ຂອງກຳປັ່ນ ຍີ່ປຸ່ນ ຢ່າງນ້ອຍນຶ່ງຄົນ ຖືກສານເຄມີໃໝ້.
ກ່ອນໜ້ານີ້ ລາວໄດ້ຍອມຮັບຜິດ ຕໍ່ສານ ໃນຂໍ້ຫາອື່ນໆ ອີກຫຼາຍໆຢ່າງ ຮວມທັງ ການລ່ວງລໍ້າ ທຳລາຍຊັບສິນ ຂັດຂວາງ ການເຮັດທຸລະກິດ ແລະລະເມີດກົດໝາຍ ຄວບຄຸມອາວຸດ ຂອງຍີ່ປຸ່ນ ຊຶ່ງຂໍ້ຫາເຫລົ່ານີ້ ແມ່ນສືບເນື່ອງ ມາຈາກການທີ່ ນາຍ BETHUNE ໄດ້ຂຶ້ນໄປ ເທິງກຳປັ່ນ SHONAN MARU 2 ໃນຫຼາຍໆມື້ຕໍ່ມາ ແລະປະກາດວ່າ ລາວຈະຈັບ ກັບຕັນ ຂອງກຳປັ່ນລຳນີ້ ໃນນາມ ຂອງປະຊາຊົນ ຍ້ອນໄດ້ຈົມ ກຳປັ່ນຂອງພວກປະທ້ວງ ເມື່ອນຶ່ງເດືອນກ່ອນນັ້ນ.
