ລິ້ງ ສຳຫລັບເຂົ້າຫາ

ຍີ່ປຸ່ນວ່າ ໄພພິບັດ ທີ່ໂຮງງານໄຟຟ້າ Fukushima ເປັນຄວາມຜິດພາດ ຂອງມະນຸດ

  • ທອງປານ ເທບວົງສາ

ເຕົາປະຕິກອນປະລະມະນູໜ່ວຍທີ່ສາມເປີດໃຊ້ການແລ້ວ ທີ່ໂຮງໄຟຟ້າ ນີວເຄຼຍ OHI ໃນຍີ່ປຸ່ນ

ກໍາມະການ​ສະພາ​ຍີ່ປຸ່ນ​ຄະນະ​ນຶ່ງ ​ໄດ້​ສະ​ລຸບຜົນ​ການ​ສືບສວນ​ສອບ​ສວນ ກ່ຽວ​ກັບໄພພິບັດ​ນີວ​ເຄລຍທີ່​ໂຮງ​ໄຟຟ້າ Fukushima ​ເມື່ອ​ປີຜ່ານມາ​ນີ້​ວ່າ ​ເຮັດ​ຂຶ້ນ​ໂດຍມະນຸດ ໃນ​ຂະນະ​ທີ່​ບັນດາ​ເຈົ້າໜ້າ​ທີ່​ໄດ້​ປະກາດການ​ໃຊ້​ງານ​ໄຟຟ້າ​ນີວ​ເຄຼຍທີ່​ຍັງ​ເປັນ​ບັນຫາ​ໂຕ້​ແຍ້​ງ ຄືນໃໝ່​ອີກ​ເປັນ​ເທື່ອ​ທໍາ​ອິດ ຫຼັງຈາກ​ໄດ້​ເກີດ​ວິ​ກິດ​ການ.

ລາຍ​ງານ ອີງ​ຕາມ​ການ​ສືບສວນ​ສອບ​ສວນ​ເປັນ​ເວລາ​ຫົກ​ເດືອນ ພົບ​ວ່າ ​ເປັນຄວາມຜິດ​ໂດຍ​ທັງຝ່າຍ​ລັດຖະບານ ​ແລະ​ບໍລິສັດ​ໄຟຟ້າ​ໂຕ​ກຽວ ຫຼື Tokyo Electric Power Company ຜູ້​ບໍລິຫານ​ໂຮງ​ໄຟຟ້ານີວ​ເຄຼຍ Fukushima ທີ່​ບໍ່​ໄດ້ມອງ​ເຫັນສະພາບ​ການ​ລ່ວງ​ໜ້າ ຫຼືວາງ​ແຜນ​ປ້ອງ​ກັນ​ອຸບັດ​ເຫດ​ນີວ​ເຄຼຍຄັ້ງ​ຮ້າຍ​ແຮງ​ທີ່​ສຸດ ​ນັບ​ຕັ້ງ​ແຕ່ເກີດ​ໄພ​ພິບັດ​ທີ່ໂຮງໄຟຟ້າ​ນີວເຄຼຍ Chernobyl ​ໃນ​ປີ 1986 ທີ່​ປະ​ເທດ​ຢູ​ເຄຣນທາງ​ພາກ
​ຕາ​ເວັນ​ອອກ​ຂອງ​ຢູໂຣບນັ້ນ.

ຄະນະ​ກໍາມະການ​ສອບ​ສວນ ພົບ​ວ່າບັນດາ​ເຈົ້າໜ້າ​ທີ່​ກ່ຽວຂ້ອງ​ໃນ​ເວລານັ້ນ ມີ​ເຈຕະນາ​ຖ່ວງ​ເວລາ​ການ​ຕັດສິນ​ໃຈ ທີ່​ອາດສາມາດ​ປ້ອງ​ກັນ​ໂຮງ ​ໄຟຟ້າ​ນີວ​ເຄຼຍຟູ​ກູ​ຊິ​ມະ ຈາກ​ໄພ​ແຜ່ນດິນ​ໄຫວ ​ແລະ​ສຸ​ນາ​ມິ​ຄັ້ງ​ຮ້າຍ​ແຮງທີ່​ຖະຫຼົ່ມຍີ່ປຸ່ນ​ເມື່ອເດືອນ​ມີນາ​ປີຜ່ານມາ​ໄວ້​ໄດ້.

​ໃນ​ລາຍ​ງານ​ທີ່​ເອົາ​ຈິງ​ເອົາ​ຈັງ​ດັ່ງກ່າວ ຄະນະ​ກໍາມະການ​ສອບ​ສວນ ກ່າວ​ວ່າ ອຸບັດ​ເຫດ​ນີ້ ບໍ່​ໃຫ້​ຄຶດ​ວ່າ​ເປັນ​ໄພ​ພິບັດທໍາ​ມະ​ຊາດ ​ແລະ​ວ່າ​ຜົນ​ກະທົບ​ຂອງ​ມັນ​ນັ້ນ​ອາດ​ສາມາດ​ເຮັດ​ໃຫ້​ເບົາບາງ​ລົງ​ໄດ້​ຈາກ​ການ​ຮັບ​ມື​ຢ່າງ​ມີ​ປະ ສິດທິ​ຜົນຂອງມະນຸດນັ້ນຫຼາຍກວ່າ.

​ໃນ​ຂະນະ​ນີ້ ​ຈັກ​ຫຼືປະຕິ​ກອນ​ນິວ​ເຄຼຍ​ແຫ່ງ​ນຶ່ງ ທາງ​ພາກ​ຕາ​ເວັນ​ຕົກ​ຂອງ ຍີ່ປຸ່ນ ​ໄດ້ເລີ່ມຜະລິດ​ກະ​ແສ​ໄຟຟ້າ​ທີ່​ຕ້ອງການ​ທີ່​ສຸດ​ນັ້ນ ​ເປັນ​ເທື່ອ​ທໍາ​ອິດ​ນັບ​ຕັ້ງ​ແຕ່ການ​ປິດ​ໂຮງງານ​ໄຟຟ້າ​ທົ່ວ​ປະ​ເທດ ​ໄດ້​ມີ​ການ​ຈັດ​ຕັ້ງ​ປະຕິບັດ​ຫຼັງຈາກ​ໄດ້​ເກີດ​ໄພພິບັດ​ນັ້ນ.

​ປະ​ຕິກອນ​ນີວ​ເຄຼຍ​ໜ່ວຍ​ທີ​ສາມ ທີ່​ໂຮງງານ​ໄຟຟ້າ​ນີວ​ເຄຼຍ Ohi ກໍ​ເປີດ​ໃຊ້ ການ​ຄືນ​ແລ້ວ​ເມື່ອ​ວັນ​ພະຫັດ​ມື້​ນີ້ ​ເຖິງ​ແມ່ນ​ຈະ​ມີ​ການ​ຄັດຄ້ານ​ຈາກ​ມະຫາ ຊົນ​ຢ່າງ​ກວ້າງຂວາງ ​ເພື່ອ​ຜະລິດກະ​ແສ​ໄຟຟ້າ​ພະລັງ​ນີວ​ເຄຼຍຄືນ​ໃໝ່​ນັ້ນ ກໍ​ຕາມ.

XS
SM
MD
LG