ການຊ່ວຍເຫລືອມູນຄ່າ 7400 ລ້ານໂດລາ ທີ່ຍີ່ປຸ່ນໄດ້ຮັບປາກວ່າ ຈະມອບໃຫ້ບັນດາປະເທດໃນເຂດລຸ່ມແມ່ນໍ້າຂອງນັ້ນ ແມ່ນແນເປົ້າ ໝາຍໃສ່ການສົ່ງເສີມການສ້າງສາດ້ານໂຄງລ່າງພື້ນຖານ ຢູ່ໃນໄທ ມຽນມາ ກໍາປູເຈຍ ຫວຽດນາມ ແລະລາວ ແລະເລຶ່ອງນີ້ແມ່ນມີຂຶ້ນໃນລະຫວ່າງກອງປະຊຸມທີ່ໂຕກຽວ ກັບບັນດານາຍົກລັດຖະມົນຕີຂອງຫ້າປະເທດເຂດແມ່ນໍ້າ ຂອງດັ່ງກ່າວ.
ຍີ່ປຸ່ນໄດ້ຕັ້ງໂຄງການສໍາຄັນໄວ້ 57 ໂຄງການທີ່ສຸມໃສ່ການພັດທະນາໂຄງ ລ່າງພື້ນຖານໃນພາກສ່ວນຕ່າງໆເຊັ່ນ ທ່າເຮືອ ທາງຫລວງ ໂຮງງານຜະ ລິດກະແສໄຟຟ້າ ແລະລົດໄຟຄວາມໄວສູງ ທີ່ມີມູນຄ່າປະມານ 28 ພັນ ລ້ານໂດລາ.
ທ່ານ Ian Storey ປະຈໍາສະຖາບັນການສຶກສາເອເຊຍຕາເວັນອອກສຽງໃຕ້ ກ່າວວ່າ ໂຄງການຊ່ວຍເຫລືອຂອງຍີ່ປຸ່ນໃນຄັ້ງນີ້ແມ່ນເນັ້ນໃຫ້ເຫັນເຖິງ ການແຂ່ງຂັນທີ່ເພິ່ມທະວີຂຶ້ນນັບມື້ ໃນການໃຊ້ຈ່າຍເພື່ອການພັດທະນາໃນຂົງເຂດດັ່ງກ່າວ.
"ມັນເປັນສ່ວນນຶ່ງຂອງແນວໂນ້ມອັນນັ້ນ ສ່ວນນຶ່ງຂອງປະວັດສາດທີ່ຍີ່ປຸ່ນເຄີຍມີໃນຂົງເຂດນີ້. ແນ່ນອນຢູ່ແລ້ວວ່າ ມີໂຄງການພັດທະນາຢູ່ສາມໂຄງ ການທີ່ກໍາລັງດໍາເນີນໄປໃນເວລາດຽວກັນ ຄືຂອງຈີນ ຂອງຍີ່ປຸ່ນແລະໂຄງ ການລິເລີມແມ່ນໍ້າຂອງຊຶ່ງສະຫະລັດເປັນຜູ້ໃຫ້ທຶນນັ້ນ ດັ່ງນັ້ນມັນກໍເບິ່ງຄືວ່າມີການແຂ່ງຂັນກັນບາງປະການ ໃນລະຫວ່າງສາມປະເທດ ມະຫາອໍານາດໃນຂົງເຂດດັ່ງກ່າວ"
ທ່ານນາງ ຢິ່ງລັກ ຊິນນະວັດ ນາຍົກລັດຖະມົນຕີໄທ ໄດ້ຮຽກຮ້ອງຂໍການສະໜັບສະໜຸນຈາກຍີ່ປຸ່ນ ຕໍ່ການພັດທະນາທ່າເຮືອທະເລເລິກ ແລະພື້ນທີ່ອຸດສາຫະກໍາ ມູນຄ່າ 8600 ລ້ານໂດລາ ໃນເຂດ Dawei ທາງພາກໃຕ້ຂອງມຽນມາ ຊຶ່ງໂຄງການດັ່ງກ່າວນີ້ແມ່ນນໍາພາໂດຍພວກບໍລິສັດພັດທະ ນາແລະກໍ່ສ້າງຂອງໄທ.
ສໍາລັບມຽນມາເອງນັ້ນ ຍີ່ປຸ່ນກໍໄດ້ໃຫ້ການສົ່ງເສີມທີ່ສໍາຄັນ ແກ່ລັດຖະບານພົນລະເຮືອນທີ່ໜຸນຫລັງໂດຍຝ່າຍທະຫານຂອງປະທານາທິບໍດີ ທຽນ ເຊນ ໂດຍການລົບລ້າງເງິນກູ້ຢືມ ຈໍານວນ 3700 ລ້ານໂດລາ ຂອງໜີ້ສິນທີ່ຍັງຄ້າງຄາຢູ່ຂອງປະເທດ. ນອກນີ້ ຍີ່ປຸ່ນຍັງເວົ້າອີກວ່າ ຕົນພ້ອມທີ່ຈະຮື້ຟືນ ການຊ່ວຍເຫລືອທີ່ໄດ້ໂຈະໄວ້ນັ້ນ ໂດຍມີເງື່ອນໄຂວ່າມຽນມາຕ້ອງເຄື່ອນໄຫວໄປໜ້າ ໃນການປະຕິຮູບທາງການເມືອງນັ້ນ
ທ່ານນາງ Kanae Doi ຜູ້ອໍານວຍການກຸ່ມສິ້ງຊອມສິດທິມະນຸດ Human Rights Watch ປະຈໍາຍີ່ປຸ່ນ ກ່າວວ່າ ຍີ່ປຸ່ນຕ້ອງນໍາໃຊ້ການໂຈະການ ລົບລ້າງໜີ້ສິນ ເພື່ອສືບຕໍ່ກົດດັນມຽນມາ ໃຫ້ທໍາການປະຕິຮູບທາງການເມືອງຕໍ່ໄປ.
ທ່ານນາງ Kanae Doi ເວົ້າວ່າ: ລັດຖະບານຍີ່ປຸ່ນຄວນຈະຮັກສາອໍານາດງັດງ້າງຂອງຕົນໄວ້ ສໍາລັບໄລຍະສາມປີຕໍ່ໜ້າ ກ່ອນການເລືອກຕັ້ງທົ່ວປະເທດໃນປີ 2015 ແລະ ຍີ່ປຸ່ນຄວນຈະມອບລາງວັນໃຫ້ມຽນມາ ເວລາໃດທີ່ມຽນມາລົງມືເອົາບາດກ້າວແທ້ໆແລ້ວ ແລະເພື່ອຈະໃຊ້ອໍານາດງັດງ້າງອັນນີ້ ທີ່ພວກເຂົາເຈົ້າໄດ້ປະກາດອອກໄປເມື່ອທ້າຍອາທິດຜ່ານມາ ໃນຖານະເປັນພາກສ່ວນນຶ່ງຂອງການລົບລ້າງໜີ້ສິນ ສໍາລັບປີນຶ່ງຕໍ່ໄປນັ້ນ ກໍຄວນຈະນໍາໃຊ້ມັນຢ່າງລອບຄອບ"
ທ່ານນາງ Doi ກ່າວອີກວ່າ ພວກນະໂຍບາຍທີ່ເອື້ອອໍານວຍຂອງຍີ່ປຸ່ນຕໍ່ມຽນມານັ້ນ ເບິ່ງຊົງວ່າ ຈະນໍາໄປສູ່ການເສີມຂະຫຍາຍການລົງທຶນຂອງຍີ່ປຸ່ນໃນມຽນມາ ໃຫ້ຫລາຍຂຶ້ນ.
ທ່ານນາງ Doi ເວົ້າວ່າ: ວົງການທຸລະກິດຂອງຍີ່ປຸ່ນຈະເລັ່ງລັດການເຄຶ່ອນໄຫວຂອງຕົນໄປຍັງມຽນມາ ແລະເພາະສະນັ້ນ ໃນຖານະເປັນກຸ່ມສັງຄົມພົນລະເມືອງຂອງຍີ່ປຸ່ນນັ້ນ ພວກເຮົາຈຶ່ງຢາກເຮັດໃຫ້ເປັນທີ່ແນ່ໃຈວ່າ ໂອກາດດີດີເຫລົ່ານີ້ ໄດ້ຖືກຊົມໃຊ້ໃຫ້ໄດ້ປະໂຫຍດຢ່າງເຕັມທີ່ນັ້ນເອງ."
ໃນຂະນະດຽວກັນ ຄືເມື່ອວັນຈັນຜ່ານມານີ້ ສະຫະພາບຢູໂຣບກໍໄດ້ປະກາດໂຈະການລົງໂທດຕ່າງໆຕໍ່ມຽນມາໄວ້ເປັນເວລານຶ່ງປີ. ບັນດາເຈົ້າໜ້າທີ່ອີຢູ ກ່າວວ່າ ພວກເຂົາເຈົ້າຈະຮັກສາການຫ້າມຂາຍອາວຸດນັ້ນໄວ້ຢູ່ ແລະໄດ້ ຮຽກຮ້ອງໃຫ້ມີ ການທໍາຄວາມກ້າວໜ້າຕໍ່ໄປໃນການປະຕິຮູບທາງການເມືອງຂອງປະເທດນັ້ນ ພ້ອມທັງການຍຸດຕິການຂັດແຍ້ງລະຫວ່າງກຸ່ມຊົນເຜົ່າ ແລະການປ່ອຍຕົວບັນດານັກໂທດການເມືອງທີ່ຍັງເຫລືອທັງໝົດນັ້ນ.