ນາຍົກລັດຖະມົນຕີ ຍີ່ປຸ່ນ ທ່ານ Shinzo Abe ໄດ້ສະແດງ
“ຄວາມເປັນຫ່ວງຢ່າງຍິ່ງ” ຕໍ່ຂໍ້ກ່າວຫາ ທີ່ວ່າສະຫະລັດ
ໄດ້ສອດແນມເບິ່ງ ບັນດາເຈົ້າໜ້າທີ່ອະວຸໂສ ແລະ ນັກທຸລະກິດ
ຂອງຍີ່ປຸນ.
ນາຍົກລັດຖະມົນຕີ Abe ຍັງໄດ້ຮຽກຮ້ອງໃຫ້ ທຳການສືບສວນ
ສອບສວນ ໃນກໍລະນີດັ່ງກ່າວ ລະຫວ່າງການສົນທະນາທາງ
ໂທລະສັບ ກັບຮອງປະທານາທິບໍດີສະຫະລັດ ທ່ານ Joe Biden
ອີງຕາມຫົວໜ້າໂຄສົກລັດຖະບານ ຍີ່ປຸ່ນ ທ່ານ Yoshihide Suga.
ທ່ານ Suga ໄດ້ອ້າງເຖິງຄຳເວົ້າຂອງທ່ານ Abe ທີ່ບອກໃຫ້ທ່ານ
Biden ວ່າ “ຖ້າມັນເປັນເລື້ອງຈິງ ວ່າ ບັນດາເຈົ້າໜ້າທີ່ເຫຼົ່ານີ້ ໄດ້ຕົກເປັນເປົ້າໝາຍ
ມັນອາດສ້າງຄວາມສັ່ນຄອນ ຕໍ່ຄວາມສຳພັນດ້ານຄວາມເຊື່ອຖື ໃນການເປັນພັນ
ທະມິດ ຂອງພວກເຮົາ ແລະ ຂ້າພະເຈົ້າຈະຕ້ອງ ໄດ້ສະແດງຄວາມກັງວົນເປັນ
ຢ່າງຍິ່ງ.”
ທ່ານ Suga ກ່າວວ່າ ທ່ານ Biden ໄດ້ຂໍອະໄພໂທດ ສຳຫລັບເລື້ອງ ດັ່ງກ່າວ ໂດຍໃຫ້ຂໍ້
ສັງເກດວ່າ “ໄດ້ກໍ່ໃຫ້ເກີດມີການອະພິປາຍກັນໃນຍີ່ປຸ່ນ.” ທ່ານ Suga ບໍ່ໄດ້ກ່າວວ່າ
ທ່ານ Biden ໄດ້ໃຫ້ການຢືນຢັນ ກ່ຽວກັບ ການສອດແນມນັ້ນ ຫຼືບໍ່.
ເມື່ອອາທິດແລ້ວນີ້ ອົງການ WikiLeaks ໄດ້ນຳອອກເຜີຍແຜ່ເອກະສານ ທີ່ຕົນກ່າວວ່າ
ສະແດງໃຫ້ເຫັນ ເຖິງການສອດແນມຂອງສະຫະລັດ ເບິ່ງ 35 ບໍລິສັດ ບັນດາກະຊວງ
ຂອງລັດຖະບານ ແລະ ສ່ວນບຸກຄົນ ໃນຍີ່ປຸ່ນ.
ອົງການ WikiLeaks ກ່າວວ່າ ການສະກັດເອົາຂໍ້ມູນ ທີ່ຕົນຈັບໄດ້ ແມ່ນພົວພັນກັບເລື້ອງ ຕ່າງໆເຊັ່ນ ຄວາມສຳພັນລະຫວ່າງ ສະຫະລັດ ກັບຍີ່ປຸ່ນ ການເຈລະຈາດ້ານການຄ້າ ແລະ
ແຜນຍຸດທະສາດ ກ່ຽວກັບການປ່ຽນແປງດ້ານດິນຟ້າອາກາດ. ອົງການ WikiLeaks ກ່າວວ່າ ການສອດແນມ ແມ່ນເລີ້ມມາ ແຕ່ປີ 2006 ຊຶ່ງເປັນການເຂົ້າ ຮັບຕຳແໜ່ງໃນສະໄໝທຳອິດຂອງທ່ານ Abe.
ໃນຖະແຫຼງການສະບັບນຶ່ງ ທີ່ອອກໃນແລງວັນອັງຄານວານນີ້ ທຳນຽບຂາວກ່າວວ່າ ທ່ານ
Biden ໄດ້ໃຊ້ການໂອ້ລົມ ທາງໂທລະສັບ ຂອງທ່ານກັບທ່ານ Abe ເພື່ອຢືນຢັນອີກຄັ້ງນຶ່ງ
ເຖິງຄວາມໝາຍໝັ້ນ ຢ່າງແຂງຂັນຂອງສະຫະລັດ ຕໍ່ການເປັນພັນທະມິດ ລະຫວ່າງ
ສະຫະລັດ ກັບ ຍີ່ປຸ່ນ ແລະ ຂອບໃຈນາຍົກລັດຖະມົນຕີ Abe ໃນການເປັນພາຄີທີ່ໝັ້ນ ຄົງຂອງທ່ານ.
