ລິ້ງ ສຳຫລັບເຂົ້າຫາ

ຍີ່ປຸ່ນເຂົ້າແຊກແຊງ ໃນຕະຫຼາດເງິນຕາຂອງໂລກ

  • ສິງ ບູຣົມມະວົງ

ຊາຍຄົນນຶ່ງຢືນເບິ່ງລາຄາຕະຫຼາດຮຸ້ນ Nikkei 225 ທີ່ກຸງໂຕກຽວ, ຍີ່ປຸ່ນ, ວັນທີ 3 ສິງຫາ 2011

ຍີ່ປຸ່ນ​ໄດ້​ແຊກ​ແຊງ​ເຂົ້າ​ໃນ​ຕະຫຼາດ​ເງິນຕາ​ຂອງ​ໂລກ​ໃນ​ວັນ​ພະຫັດ​ມື້ນີ້​ ​ໂດຍ​ການ​ປ່ອຍ​ເງິນ​ເຢັນ​ອອກ ເຮັດ​ໃຫ້​ເງິນ​ເຢັນ​ຕົກ​ລາຄາ​ຫລາຍ​ກວ່າ 3 ​ເປີ​ເຊັນ ໃນ​ຄວາມ​ພະຍາຍາມ​ເພື່ອ​ຊ່ອຍ​ສົ່ງ​ເສີມ​ພາກສ່ວນສິນຄ້າ​ສົ່ງ​ອອກ​ຂອງ​ຕົນ.

ທ່ານ Yoshihiko Noda ລັດຖະມົນຕີ​ການ​ເງິນ​ກ່າວ​ວ່າ ການ​ຟື້ນ​ໂຕ​ຄືນ​ຂອງ​ຍີ່ປຸ່ນ​ຈາກ​ໄພພິບັດແຝດ​ນັ້ນ ​ໄດ້​ຮັບ​ຄວາມ​ຫຍຸ້ງຍາກ​ຍ້ອນ​ຄ່າ​ຂອງ​ເງິນ​ເຢັນ​ ທີ່ໄດ້​ຖີບ​ໂຕ​ສູງ​ຂຶ້ນ​ເກືອບ​ເຖິງ​ລະດັບ​ຫລັງ​ຈາກ​ສົງຄາມ​ໂລກ​ຄັ້ງ​ທີ​ສອງ ຊຶ່ງສະຖິຕິທີ່​ວ່າ​ນີ້ໄດ້ມີ​ຂຶ້ນ​ໃນ​ທັນທີ​ຫລັງ​ຈາກໄພ​ແຜ່ນ ດິນ​ໄຫວ​ແລະ​ຄື້ນຟອງ​ຍັກສຸ​ນາ​ມິ​ ປະ​ທະ​ຍີ່ປຸ່ນ​ໃນ​ວັນ​ທີ 11 ມີນາ​ຜ່ານ​ມາ​ນັ້ນ.

ທ່ານ Noda ບໍ່​ໄດ້​ກ່າວ​ເຖິງ​ຂະໜາດ​ຂອງ​ການ​ແຊກ​ແຊງ​ວ່າ​ ນ້ອຍໃຫຍ່​ສໍ່າ​ໃດ ຊຶ່ງ​ຍີ່ປຸ່ນ​ໄດ້​ກະທໍາ​ໄປ​ຫລັງ​ຈາກ​ທໍາ​ການ​ປຶກສາ​ຫາລື​ກັບ​ພວກ​ປະ​ເທດ​ພາ​ຄີນາໆ​ຊາດ​ແລ້ວ. ​ແຕ່​ລາຍ​ງານ​ຂ່າວ​ເວົ້າ​ວ່າ ກະຊວງການ​ເງິນ​ຂອງ​ຍີ່ປຸ່ນ​ໄດ້​ຂາຍ​ເງິນ​ເຢັນ​ອອກ 1 ພັນ​ຕື້​ເຢັນ ຊຶ່ງ​ເປັນ​ມູນ​ຄ່າ​ເທົ່າ​ກັບ 12 ພັນ 600 ລ້ານ​ໂດ​ລາ​ສະຫະລັດ ​ເພື່ອ​ຕີ​ຕະຫຼາດ​ແລະ​ດຶງ​ຄ່າເງິນເຢັນໃຫ້​ຕໍ່າລົງ.

ທະນາຄານແຫ່ງ​ຊາດຍີ່ປຸ່ນ​ກໍໄດ້​ທໍາ​ການ​ເຄື່ອນ​ໄຫວ​ເຊ່ນ​ກັນ ​ໂດຍ​ການ​ຂະຫຍາ​ຍກອງ​ທຶນ​ສໍາລັບ​ຊື້​ເອົາ​ຊັບ​ສິນ​ທາງ​ດ້ານ​ການ​ເງິນ​. ວັດຖຸ​ປະສົງ​ກໍ​ແມ່ນເພື່ອ​ທຸ້ມ​ເງິນ​ເຂົ້າ​ໃນ​ລະ​ບົບ​ ເພື່ອ​ຊ່ອຍ​ເຮັດ​ໃຫ້ຄ່າ​ຂອງເງິນເຢັນລົດ​ລົງ.

ໃນ​ແລງ​ວັນ​ພະຫັດ​ມື້​ນີ້ ຄ່າຂອງ​ເງິນ​ເຢັນ​ຕົກ​ຢູ່​ປະມານ 79.75 ​ເຢັນ​ຕໍ່ 1 ​ໂດ​ລາ​ສະຫະ
ລັດ ​ເມື່ອ​ສົບ​ທຽບ​ໃສ່​ກັບ​ອັດຕາ​ແລກປ່ຽນ 76.29 ​ເຢັນ​ຕໍ່ 1 ​ໂດ​ລາ​ສະຫະລັດ​ໃນ​ວັນ​ຈັນ
ຜ່ານ​ມາ​ນີ້.

XS
SM
MD
LG