ລັດຖະມົນຕີຕ່າງປະເທດຍີ່ປຸ່ນ ທ່ານ Koichiro Gemba ໄດ້ພົບປະກັບທ່ານນາງອອງຊານຊູຈີ ຜູ້ນໍາພາປະຊາທິປະໄຕໃນມຽນມາ ເພື່ອພະຍາຍາມໃຫ້ຄໍາປະກັນຕໍ່ທ່ານນາງກ່ຽວກັບຄວາມສະໜັບສະໜຸນ ຢ່າງເຕັມສ່ວນຂອງລັດຖະບານກຸງໂຕກຽວສໍາລັບການປົກຄອງແບບປະ ຊາທິປະໄຕທີ່ຂະຫຍາຍໂຕອອກໃນປະເທດໃນພາກພື້ນເອເຊຍຕາເວັນອອກສຽງໃຕ້ແຫ່ງນີ້.
ທ່ານ Gemba ໄດ້ພົບປະເຈລະຈາໃນມື້ວັນຈັນວານນີ້ ກັບທ່ານນາງອອງຊານຊູຈີ ຜູ້ທີ່ໄດ້ຮັບລາງວັນໂນແບນຂະແໜງສັນຕິພາບຢູ່ທີ່ບ້ານພັກຂອງທ່ານນາງໃນນະຄອນຢັ້ງກຸ້ງແລະໃນເວລາຕໍ່ມາທ່ານ Gemba ໄດ້ກ່າວຕໍ່ບັນດານັກຂ່າວວ່າ ທ່ານຢາກໃຫ້ທ່ານນາງອອງຊານຊູຈີແລະບັນດາຜູ້ນໍາຂອງຄະນະລັດຖະບານພົນລະເຮືອນໃໝ່ຂອງມຽນມາໄປຮ່ວມໃນກອງປະຊຸມສຸດຍອດໃນຍີ່ປຸ່ນໃນປີໜ້ານີ້.
ໃນພາກສ່ວນຂອງທ່ານນາງ ທ່ານນາງອອງຊານຊູຈີ ທີ່ໄດ້ໃຊ້ເວລາສ່ວນໃຫຍ່ຂອງທ່ານ
ນາງໃນລະຫວ່າງ 2 ທົດສະວັດພາຍໃຕ້ການຖືກກັກຢູ່ໃນບໍລິເວນບ້ານພັກນັ້ນ ໄດ້ກ່າວ
ຂອບອົກຂອບໃຈຕໍ່ຍີ່ປຸ່ນສໍາລັບການຊ່ອຍເຫຼືອສະໜັບສະໜຸນນັ້ນ.
ໃນເຊົ້າວັນຈັນວານນີ້ ລັດຖະມົນຕີການຕ່າງປະເທດຍີ່ປຸ່ນໄດ້ຕົກລົງກັບຄະນະນໍາພາຂອງມຽນມາເພື່ອໄຂການພົບປະເຈລະຈາກັນເລື້ອງສົນທິ ສັນຍາການລົງທຶນລະຫວ່າງສອງຝ່າຍນັ້ນ. ນອກນັ້ນທ່ານ Gemba ຍັງຮຽກຮ້ອງໃຫ້ຄູ່ຕໍາແໜ່ງຝ່າຍມຽນມາທ່ານ Wunna Maung Lwin ໃຫ້ປ່ອຍພວກນັກໂທດການເມືອງຕື່ມອີກແລະໃຫ້ຫລຸດຜ່ອນຂໍ້ຈໍາກັດຮັດແຄບຕ່າງໆຕໍ່ສື່ມວນຊົນແລະວົງການທຸລະກິດນັ້ນ.