ຜູ້ປົກຄອງນະຄອນ Jakarta ທີ່ເປັນຄົນຈີນ ນັບຖືສາສະໜາຄຣິສ ໄດ້ຖືກຕັດສິນລົງ
ໂທດໃຫ້ຕິດຄຸກສອງປີ ຫຼັງຈາກພົບເຫັນວ່າມີຄວາມຜິດໃນຖານໝິ່ນປະໝາດ ສາສະ
ໜາອິສລາມໃນຄະດີທີ່ຖືກເບິ່ງກັນວ່າເປັນການທົດສອບກ່ຽວກັບການໂຍະຍານຜ່ອນ
ຜັນໃນການນັບຖືສາສະໜາຂອງອິນໂດເນເຊຍ.
ການຕັດສິນລົງໂທດ ທີ່ໜັກໄປກວ່າ ທີ່ທາງໄອຍະການຕ້ອງການນັ້ນ ໄດ້ມີຂຶ້ນບໍ່ຮອດ
ນຶ່ງເດືອນ ຫຼັງຈາກທ່ານໄດ້ເສຍໄຊໃນການເລືອກຕັ້ງທີ່ຈະຢູ່ໃນຕຳແໜ່ງ ຂອງທ່ານ
ຕໍ່ໄປ.
ຜູ້ພິພາກສາກ່າວວ່າ “ຈຳເລີຍ Busuki Tjahaya Purnama ຊຶ່ງມີຊື່ຫລິ້ນວ່າ Ahok
ນັ້ນ ໄດ້ພົບເຫັນວ່າ ມີຄວາມຜິດຖືກຕ້ອງຕາມກົດໝາຍ ແລະເຊື່ອວ່າມີຄວາມຜິດ ໃນ
ການໝິ່ນປະໝາດສາສະໜາອິສລາມ ແລະຕິດຄຸກສອງປີ.”ໃນເດືອນແລ້ວນີ້ ໄອຍະ
ການໄດ້ຮຽກຮ້ອງ ໃຫ້ຍົກເລີກການຟ້ອງໃນທຸກຂໍ້ຫາໝິ່ນປະໝາດສາສະໜາອິສລາມ
ເພື່ອແລກປ່ຽນກັບການກ່າວຫາທີ່ເບົາລົງມາກ່ຽວກັບການ “ເຜີຍແຜ່ຄວາມກຽດຊັງ”
ແຕ່ວ່າໃນວັນອັງຄານມື້ນີ້ ບັນດາຜູ້ພິ ພາກສາປາກົດວ່າບໍ່ຫົວຊາກັບຂໍ້ສະເໜີດັ່ງກ່າວ.
ທ່ານ Ahok ໄດ້ຖືກດຳເນີນຄະດີໃນເດືອນທັນວາປີກາຍ ກ່ຽວກັບຂໍ້ກ່າວຫາ ທີ່ ທ່ານ
ໄດ້ໝິ່ນປະໝາດສາສະໜາອິສລາມ ໃນຂະນະທີ່ມີການໂຄສະນາຫາສຽງຢູ່ ເກາະດອນ
ນຶ່ງ ໃກ້ກັບນະຄອນຫລວງ Jakarta. ທ່ານ Ahok ໄດ້ອ້າງຄຳເວົ້າຂອງວັກນຶ່ງໃນຄຳ
ພີ Quran ເພື່ອພິສູດໃຫ້ບັນດາຜູ້ສະໜັບສະໜູນທ່ານຮູ້ວ່າ ບໍ່ມີການຈຳກັດສຳລັບຊາວ
ມຸສລິມ ໃນການລົງຄະແນນສຽງໃຫ້ແກ່ພວກນັກການເມືອງທີ່ບໍ່ແມ່ນມຸສລິມ. ຄຳຖະ
ແຫລງຂອງທ່ານໄດ້ຖືກກວດແກ້ ແລະນຳອອກ ແຜ່ຢ່າງກວ້າງຂວາງທາງສື່ສັງຄົມຊຶ່ງ
ໄດ້ກໍ່ໃຫ້ເກີດການເດີນປະທ້ວງແລະແມ່ນກະທັງມີການຂົ່ມຂູ່ຕໍ່ທ່ານ ໄລລະຫວ່າງການ
ໂຄສະນາຫາສຽງຢູ່ໃນທ້ອງຖິ່ນ.
“ພວກເຮົາຈະຂໍອຸທອນ” ທ່ານ Ahok ໄດ້ກ່າວຫຼັງຈາກການຕັດສິນແລ້ວ. ທ່ານຍັງໄດ້
ຖືກພາອອກໄປຈາກສານໃນທັນທີ ແຕ່ບໍ່ຮູ້ວ່າ ທ່ານໄດ້ຖືກກັກຂັງໂດຍກົງ ຫລືບໍ່.
ຢູ່ໃນຄຳຕັດສິນນັ້ນ ບັນດາຜູ້ພິພາກສາຍັງກ່າວວ່າ ຄະດີນີ້ບໍ່ມີຫຍັງກ່ຽວຂ້ອງກັບການ
ເລືອກຕັ້ງທ້ອງຖິ່ນ.
ປະທານຄະນະຜູ້ພິພາກສາ ທ່ານ Dwiarso Budisantiarto ກ່າວວ່າ “ຄະດີນີ້ມີ
ຄວາມຜິດຢ່າງແທ້ຈິງ ບໍ່ມີຫຍັງພົວພັນກັບການເລືອກຕັ້ງເລີຍ.”
ເຖິງແມ່ນວ່າ 87 ເປີເຊັນຂອງຊາວອິນໂດເນເຊຍເປັນມຸສລິມກໍຈິງ ແຕ່ລັດຖະບານ
ຂອງປະເທດດັ່ງກ່າວ ແມ່ນບໍ່ຫຍຸ້ງກ່ຽວພົວພັນກັບສາສະໜາເລີຍ ແລະລັດຖະທຳ
ມະນູນຂອງປະເທດ ໄດ້ໃຫ້ການຄຸ້ມຄອງ 6 ສາສະໜາ ແລະກໍບໍ່ໄດ້ໃຫ້ສິດພິເສດ
ໃດໆແກ່ສາສະໜາອິສລາມເລີຍ.
